வைசாவின் கருத்து

நாயா? குதிரையா?

2007-07-11T20:01:00.000Z

பின்னங்காலில் எழுந்து நின்றால் 6 அடி 5 அங்குலம் (ஏறத்தாழ 2 மீட்டர்) இருக்கும்! இதன் நிறையோ 276 இராத்தல் (125 கிலோ)! சாதாரணமாக இது எழுந்து நின்றால் ஏறத்தாழ 50 அங்குலங்கள் (1.27 மீட்டர்) இருக்குமாம் - பாதத்திலிருந்து தலை வரை. மார்பு அளவு 59 அங்குலங்கள் (1.5 மீட்டர்). 29 அங்குல (74 செண்டிமீட்டர்) கழுத்து. குதிரைகளுக்குப் பயன்படுத்தப்படும் மேலங்கிகளைத்தான் குளிர், மழைக்காலத்தில் இதற்கும் பயன்படுத்த வேண்டும். இதன் பாதம் ஒரு சாப்பாடுத் தட்டளவு பெரியது.

உண்மையிலேயே ஓர் அரக்கன் தான். இன்னும் வளர்ந்து கொண்டிருக்கும் இந்தப் பாரிய நாய்தான் பிரிட்டனில் மிகப் பெரியதாம்.

பெயர்: ஸாம்சன்.

இதற்குத் தீனி போட மட்டும் மாதம் 60 பவுண்டுகள் செலவாகிறதாம். ஒரு நாளைக்கு நான்கு தடவைகள் இரண்டு மைல் நடை கூட்டிச் செல்ல வேண்டுமாம். இந்த நாயைக் ஆறு மாதக்குட்டியாக வாங்கியபோதே 226 இராத்தல் நிறை இதற்கு. இவன் எப்படி உருவானான்? நியூஃபண்ட்லாண்ட் இன அப்பாவுக்கும் கிரேட் டேய்ன் இன அம்மாவுக்கும் நடந்த கள்ளக் காதலில் வந்து உதித்தவன் இவன். இப்போது இவனுக்கு மூன்று வயதாகிறது.

நியூஃபண்ட்லாண்ட் இன நாய்கள் பெயர் சுட்டுவது போல கனடாவில் 1700களில் உருவாயின. பெரிய அளவான இந்த நாய்கள் பண்ணைகளில் வேலை செய்யப் பயன்படுத்தப்பட்டன. என்னென்ன வேலைகளை இவை செய்ய வல்லன? பாதுகாத்தல், மாடுகளை மான்களை ஒன்றாக ஓரிடத்தில் ஒடுங்கவைத்தல்,

சிறிய வண்டிகளை இழுத்தல், வேட்டையாடுதல், நீரினுள்ளிருந்தோ மலைகளிலோ ஆபத்திலிருந்து மனிதரைக் காப்பாற்றுதல் போன்றவை. கிரேட் டேய்ன் இன நாய்கள் 1400களில் ஜேர்மனியில் தோன்றின (பெயரைப் பார்த்து டென்மார்க்கிலிருந்து தோன்றியிருக்கலாம் என்று எண்ணாதீர்கள்). மிகப் பெரியளவு வளரக்கூடிய நாய்கள் இவை. நியூஃபண்ட்லாண்ட் இன நாய்கள் செய்யக்கூடிய அத்தனை பணிகளையும் இந்த கிரேட் டேய்ன் இன நாய்களும் செய்யக்கூடியன. ஆக இந்த இரண்டும் சேர்ந்து உருவான இந்த ஸாம்சன் இத்தனை பாரிய அளவில் வளர்ந்திருப்பதில் ஆச்சரியமேதுமில்லை.

இவ்வளவுக்கும் இவன் நல்லவனாம். யாருக்கும் எந்தத் தீங்கும் செய்யாதாவன். ஆனால் ஒரே ஒரு பிரச்சனை: இவனது உறட்டை ஒலியைத் தாங்க முடியவில்லையாம்.

நியூஃபண்ட்லாண்ட் இன நாய் மற்றும் கிரேட் டேய்ன் இன நாய்

படங்கள்: இணையத்திலிருந்து

மனம் மயங்குதே

2007-07-09T21:02:00.000Z

அழகான பொருள்களிலும் அழகான மனிதர்களையும் கண்டால் நமது மனம் ஈர்க்கப் படுகிறதே, ஏன்? அந்த மனதை மயக்கும் அழகு அல்லது ஏதோ ஒன்று என்ன? கொஞ்சம் பெரிய தலை, பெரிய விழிகள் இவற்றைக் கண்டால் போதும், நமது மனம் தன்னிலை இழந்து விடுகிறதே! இவற்றுக்கு அப்படி என்னதான் சக்தி இருக்கிறது, இப்படி எங்களைக் கட்டிப் போட. இதற்கும் ஏதாவது அறிவியல் விளக்கம் உண்டா?

மனதை மயக்கும் சக்தி கொண்டவை என்று இதுவரை கண்டறியப் பட்டவை: கொஞ்சம் பெரிய தலை, பெரிய கொஞ்சம் கீழாக இருக்கின்ற கண்கள், ஆப்பிள் கன்னங்கள், சிறிய சற்று பருத்த கைகள் மற்றும் கால்கள், சிறிய உள்ளங்கைகள் மற்றும் பாதங்கள். இவையெல்லாம் ஒரு குழந்தையின் தன்மைகள் அல்லவா? அதுவும் குழந்தை பிறந்தவுடன் இப்படியான தன்மைகளை நன்கு வெளிப்படுத்தும். குழந்தை வளர வளர இந்தத் தன்மைகளில் பல மறைந்து போகும். உடம்புடன் ஒப்பிடும்போது தலையின் அளவு சிறிதாகிவிடும்; நாடி பெருத்துவிடும்; கைகளும் கால்களும் நீண்டு வளர்ந்து விடும். குழந்தைத் தன்மை விட்டுப் போய் விடும்.

அப்படியானால் ஏன் குழந்தைத் தன்மைகள் அந்த அளவுக்கு எங்களை மயக்கி வைக்கின்றன? இதற்கு ஏதாவது காரணம் இருக்க வேண்டுமல்லவா? பரிணமத்தின் படி யோசித்தால், இப்படி ஒரு மயக்கும் தன்மை எங்கள் மனதில் உண்டாவதால் நமக்கு ஏதோ ஒரு நன்மை இருந்தாக வேண்டுமே! அப்படி என்ன நன்மை இருக்க முடியும்?

லட்சக்கணக்கான ஆண்டுகளுக்கு முன் நமது மூளையின் அளவு அதிகரிக்க ஆரம்பித்தது. அதனால் பிறக்கும் குழந்தையின் தலையும் பெருக்க ஆரம்பித்தது. ஆனால் பெரிய தலை உள்ள குழந்தைகள் பிறப்பது பெரிய சங்கடமாகிவிட்டது. குழந்தையின் தலையின் அளவு அது வெளியே வரவேண்டிய பாதையின் அளவினால் மட்டுப்படுத்தப் பட்டது. அப்படியானால் இதற்கு என்ன வழி? இயற்கை கண்டுபிடித்த வழி: நமது குழந்தைகளில் மூளை பிறக்கும்போது ஏறத்தாழ 25% மட்டும்தான் வளர்ச்சியடைந்திருக்கும். மிருகங்களை எடுத்துக் கொண்டால் அவற்றின் மூளை வளர்ச்சி பிறக்கும்போதே ஏறத்தாழ முற்றுப் பெற்றிருக்கும். பிறந்த உடனேயே பல மிருகங்களின் குட்டிகள் தாமாகவே நடக்க ஆரம்பித்துவிடுகின்றன. நமது குழந்தைகளோ தானாக நடக்க ஆரம்பிக்க ஏறத்தாழ 12-16 மாதங்கள் எடுத்துக் கொள்கின்றனர். பல வருடங்களுக்கு இந்த மனிதக் குழந்தைகள் பெற்றோரையே நம்பி இருக்கின்றனர். வளர்ந்தவர்கள் எவரதும் உதவி இல்லாவிடில் குழந்தைகள் உயிர் தப்பவே முடியாது.

குழந்தைகள் வளர்ந்தோரையே நம்பி இருக்கவேண்டுமென்றால், அத்தனை காலத்திற்கு தம்மை மிகக் கவனமாக பார்த்துக் கொள்வதற்கு வளர்ந்தோரை ஈர்க்கும் சாதனமே மேற்சொன்ன மயங்க வைக்கும் தன்மைகள். இந்த சக்தி மிகப் பலம் வாய்ந்தது. அதனால் தான் எமது குழந்தைகள் அல்லாமல் வேறு எந்தக் குழந்தையைக் கண்டோமென்றால் கூட, அதன் மீது உடனடியாக ஒரு பாசமும் பரிவும் ஏற்படுகிறது. மயக்கும் தன்மைகளைக் கூடுதலாகக் கொண்ட பிள்ளைகளை நாம் கூடுதலாகக் கவனித்து கொள்கிறோமாம் - இத் தன்மைகளை குறைவாகக் கொண்ட பிள்ளைகளோடு ஒப்பிடும்போது! இந்தப் பழக்கம் பரிணாம வளர்ச்சியில் எமது உயிரணுக்களிலேயே இது இருப்பதாக நம்பப்படுகிறது. குழந்தைகளும் பிறந்த உடனேயே அழகான முகங்களைத் தேடிப் பார்ப்பதும் இதனால்தான். அழகான மாணாக்கர்கள் ஆசிரியர்களின் கவனத்தை இலகுவாக ஈர்ப்பதும் இதனால்தான்.

இதில் வேடிக்கை என்னவென்றால், இந்த சக்தியின் காரணமாக குழந்தைகளின் தன்மைகள் கொண்ட வளர்ந்தோரைக் கண்டும் நாம் ஈர்க்கப் படுகிறோம். இத்தன்மைகள் கொண்ட மிருகங்களிலும், படங்களிலும் கூட நாம் அன்பு செலுத்துகிறோம். வோல்ட் டிஸ்னி இத்தனை வருடங்களாக இதை வைத்தே கோடிக்கணக்கில் சம்பாதிக்கிறார்கள் அல்லவா?

(படங்கள் இணையத்திலிருந்து)

நோவு வேண்டேன்; நூறாண்டு வேண்டினேன்

2007-07-06T13:28:00.000Z

பாரதிக்குத் தெரியாததா என்ன? நோவு இல்லாத வாழ்வல்லவா கேட்கிறார். தலைவலி, நெங்சுவலி, முதுகுவலி, மூட்டுவலி, வயிற்றுவலி, காதுவலி, கண்வலி, கால் வலி, முழங்கால் வலி, கை வலி, குத்து வலி, திருகு வலி, உடல் வலி. குத்து, நமைச்சல், எரிவு. அப்பப்பா! வலிகளில் தான் எத்தனை வகை! இத்தனையையும் தாங்கிக் கொண்டு எப்படித்தான் வாழ்கிறோமோ? ஆனால் இவைகளில் ஏதோ ஒன்றாவது நாளாந்தம் ஒவ்வொருவருக்கும் வந்து மறைந்து கொண்டுதான் இருக்கிறது. ஏன் அப்படி? நோவே இல்லாத வாழ்வு இருக்க முடியாதா? வலியென்று வந்து விட்டால் அதை எப்படியாவது நிறுத்திவிட வேண்டும் என்று துடிக்கிறோம் அல்லவா? இதுவேதான் வலிவருவதற்கும் ஒருவகையில் காரணமாகிறது. அதாவது வலி என்று நமது மூளை உணர்ந்து கொள்வதற்கு இது காரணமாகிறது. எப்படி?

முதலில் வலி எப்படி உருவாகிறது என்று பார்ப்போம். முள்ளந்தண்டு வடத்திலிருந்து தோல், தசைகள் மற்றும் உள்ளுறுப்புகளுக்கு நரம்புகள் தொடுப்புகளை ஏற்படுத்தியிருக்கின்றன. நரம்புகளின் முடிவுகளில் சில தொடுகை, அதிர்வு, குளிர், வெப்பம் போன்றவற்றை உணரக்கூடியன. ஏனையவை உடலின் திசுக்களின் அழிவை அல்லது வரப்போகும் அழிவை உணரக்கூடியன. இந்த இரண்டாவது வகை நரம்புகள் அதிகம் காயம்படக் கூடிய இடங்களில், உதாரணமாக கை கால் விரல்களில், காணப்படுகின்றன. ஆபத்தை இவை உணரும்போது, மின் அலைகளை நரம்புகளினூடாக அனுப்புகின்றன. வலி பயங்கரமானதானால், மின் அலைத் தகவல்கள் உடனடியாக அனுப்பப்படும். ஒவ்வொரு கணத்திலும் லட்சக்கணக்கான தகவல்கள் இவ்வாறு நரம்புகளினூடாக முள்ளந்தண்டு வடத்திற்கு வந்து சேர்கின்றன.

இந்தத் தகவல்களெல்லாம் மூளையை நேரடியாக வந்து சேர்ந்தால் அவற்றைப் புரிந்து கொள்வதிலேயே மூளை தனது நேரத்தைச் செலவிட நேரிடும். ஆனால், இங்குதான் முள்ளந்தண்டு வடத்திலுள்ள சிறப்பு நரம்புக்கூறுகள் தமது பணியைச் செய்கின்றன. கடும் வலிகளை அறிவுறுத்தும் தகவல்களை உடனடியாக மூளைக்குப் போக வழிவிடுவார்கள் இந்த துவாரபாலகர்கள். ஆனால், சும்மா வெறுமனே ஏதோ காலில் படுகிறது என்பது போன்ற தகவல்களை இந்த நரம்புக் கூறுகள் அங்கேயே தடுத்து நிறுத்தி விடுகின்றன.

மூளை தனக்குக் கிடைக்கும் தகவல்களை மூன்று வெவ்வேறு பகுதிகளுக்கு அனுப்புகிறது. அந்தப் பகுதிகளிலிருந்து அந்த வலிக்கு என்ன நடவடிக்கை எடுப்பது என்பது தீர்மானிக்கப் படுகிறது. கையைச் சுடுநீருனுள் வைத்துவிட்டொமென்றால் அதில் நாம் உணரும் வலி காரணமாக நாம் உடனடியாகக் கையை எடுத்துவிடுகிறொம் அல்லவா? மேலே உள்ள முறைப்படி தான் தகவல்கள் மூளையை அடைந்து கையை உடனடியாக சுடுநீரிலிருந்து எடுத்துவிட வேண்டும் என்ற முடிவு எடுக்கப் பட்டது. வலி என்பது இருப்பதற்கான காரணமும் இதுவே. வலி என்பது உடலின் ஏதோ ஒருபகுதி காயப்பட்டுவிட்டது அல்லது காயப்படப்போகிறது என்பதை எமக்கு உணர்த்தவே பரிணாம வளர்ச்சியில் உருவாகியிருக்கிறது. எமது வாழ்விற்கு இது மிக முக்கியமானது.

உங்களுக்குக் கடும் தலைவலி என்று வைத்துக் கொள்வோம். ஆனாலும் உங்கள் வேலையையும் செய்து முடித்தாக வேண்டும். ஆகையால் உங்கள் முழு கவனத்தையும் வேலையில் செலுத்த முயல்கிறீர்கள். இது சாத்தியமா? தலைவலி போன்ற கடுமையான வலிகளுடன் வேறு விடயங்களில் கவனம் செலுத்துவது மிகக் கடினம். ஏன்? மூளையின் ஏதோ ஒருபகுதிதான் இவ்வாறு நமது கவனத்தைக் குழப்புவதாக இருக்க வேண்டும். அண்மையில் அமெரிக்காவில் சில அறிவியலாளர்கள் இந்தப் பகுதியைக் கண்டுபிடித்துவிட்டார்கள். ஒருவகை காந்த அதிர்வுப் படமாக்கல் முறையை வைத்து அவர்கள் செய்த சோதனைகளில் ஞாபக சக்தியோடு பின்னிப் பிணைந்திருக்கும் lateral occipital complex என்ற பகுதிதான் ஞாபகத்தோடு சம்பந்தப்பட்ட வேலைகளைச் செய்வதற்குப் பயன்படும் அதேவேளையில், வலி எற்படும் போது பாதிக்கவும் செய்கிறது. அதனால் தான் வேலையில் கவனம் செலுத்தமுடியாமல் போகிறது என்று அவர்கள் கூறுகிறார்கள். மேலும், வலி இருக்கின்றபோது மூளையின் rostral anterior cingulate cortex என்ற பகுதியினூடாக வலி இந்த LOC பகுதியைப் பாதிக்கிறது. வலி இல்லாதபோது, LOC பகுதி மூளையின் வேறொரு பகுதியிலிருந்து சமிக்ஞைகளைப் பெறுகிறதாம்.

இன்னுமொரு விடயமும் கவனிக்கத்தக்கது. வலியும் வலி வந்துவிடுமோ என்ற பயமும் வெவ்வேறு. ஆனால், இவற்றை உணரும் மூளையின் பகுதிகள் இரண்டும் அருகருகே இருக்கின்றன. இதுவும் பரிணாம வளர்ச்சியில் முக்கியமானது. வலி வந்துவிடுமோ என்ற பயமும் வலியைத் தரக்கூடிய ஆபத்தான நிலைமைகளிலிருந்து எங்களைக் காப்பாற்றும் அல்லவா?

இப்போது சொல்லுங்கள்: வலியில்லாத வாழ்க்கை வேண்டுமா?

(படங்கள் இணையத்திலிருந்து)

லண்டன் 2012 - ஒலிம்பிக் சின்னம்

2007-06-14T22:25:00.000Z

2012ஆம் ஆண்டு ஒலிம்பிக் போட்டிகள் நடத்துவதற்கு லண்டன் தேர்வு செய்யப்பட்ட மறுநாளே லண்டனின் பாதாள ரயில்களில் வெடிகுண்டுகள் வெடித்தன. அப்படி ஒரு பாரிய சோகத்துடன் தான் இந்த லண்டன் ஒலிம்பிக் பயணம் ஆரம்பித்தது. ஆரம்பத்தில் இந்தப் போட்டிகளை நடத்துவதற்கு 240 கோடி பவுண்டுகள் தேவை என்று கணக்கு வைத்து அரசாங்கமும் இதற்கு ஒப்புக்கொண்டு அதை விண்ணப்பத்தில் இவர்கள் போட்டு லண்டன் தெரிவாகிவிட்டது.

ஆனால் குறைந்தது 330 கோடி பவுண்டுகளாவது தேவை என்று இப்போது அரசாங்கமே ஒப்புக்கொண்டுவிட்டது. பத்திரிகைகளோ இந்தப் போட்டிகள் நடத்தி முடிக்கப்படுகின்றபோது செலவு 1000 கோடி பவுண்டுகளைத் தாண்டிவிடும் என்கின்றன.

அதை விடுங்கள். இந்த நிலையில் சுமார் 4 லட்சம் பவுண்டுகள் செலவில் இந்த 2012 லண்டன் ஒலிம்பிக் போட்டிகளுக்காக ஒரு சின்னத்தை வடிவமைத்துள்ளார்கள். ஒரு சின்னத்திற்கு இவ்வளவு செலவா என்பதை விட்டுத் தள்ளுங்கள். அப்படி இவ்வளவு செலவில் மிக அழகான் சின்னம் வெளிவந்திருக்கிறதா என்றால்.....?

இந்தச் சின்னத்தைக் கிண்டல் செய்து ஒரு பத்திரிகையில் அதன் வாசகர்கள் உருவாக்கிய சின்னங்களில் சில இதோ:

உணர்வின் பிரதிபலிப்பு

பிரிட்டன் வரைபடம்!

பாலைவனத்தில் ஒட்டகம்

பேஸ்பால் ஆட்டக்காரர்

நீச்சலடிக்கும் வாத்துகள்

காண்டாமிருகம்

இன்னுமொரு பத்திரிகை இதற்கு மாற்றாக ஒரு சின்னத்தை வடிவமைக்கும்் போட்டி ஒன்றை நடத்தி மாற்றுச் சின்னம் ஒன்றைத் தெரிந்தெடுத்துள்ளது. வெற்றி பெற்றவை இவை:

படங்கள் நன்றி: thelondonpaper, London Lite

புதிய வெம்பிளி ஸ்டேடியம் - படங்களுடன்

2007-04-11T16:29:00.000Z

ஒரு வழியாக புதிய வெம்பிளி அரங்கம் கட்டி முடிக்கப்பட்டு விட்டது. 1923ம் ஆண்டு வெம்பிளியில் கட்டப்பட்ட அரங்கம் 2000ம் ஆண்டு மூடப்பட்டு, 2002ம் ஆண்டில் இடித்தழிக்கப் பட்டது. 2005இலேயே கட்டி முடிக்கப்பட்டிருக்க வேண்டிய இந்த அரங்கம் இப்போதுதான் முடிக்கப்பட்டுள்ளது. மொத்தச் செலவு? 75,70,00,000 பவுண்டுகள். ஆஸ்திரேலிய கட்டிட நிறுவனமான மல்ட்டிப்ளெக்ஸ் இதை நிர்மாணித்து முடித்திருக்கிறது.

கடந்த மாதம் 17ம் தேதி வெம்பிளி மக்களில் 60,000 பேர் மைதானத்துக்குள்ளே அநுமதிக்கப் பட்டனர். அடுத்ததாக இங்கிலாந்து இளம் கால்பந்து வீரர்கள் (21 வயதிற்குக் குறைந்தோர்) பங்குபற்றும் பந்தயம் ஒன்று நடந்தது. இனி கால்பந்து சங்கக் கோப்பை இறுதிப் பந்தயம் அடுத்த மாதம் நடைபெற இருக்கிறது. முதலாவது சர்வதேச பந்தயமாக இங்கிலாந்து-பிரேசில் ஆட்டம் ஜூன் முதலாம் தேதியன்று நடைபெறவுள்ளது.

இதனது சிறப்பம்சம் இதனது பிரமாண்ட வளைவு. 133 மீட்டர்கள் வரை இந்த வளைவு உயர்ந்து நிற்கிறது. 1750 டன்கள் எடையுள்ளது. இதனது விட்டம் ஏழு மீட்டர்கள். ஆக இந்த வளைவுக்கூடாக ஒரு புகைவண்டி போகலாம். 315 மீட்டர்கள் நீளத்திற்கு இந்த வளைவு வைக்கப் பட்டிருக்கிறது. 500 உருக்குக் குழாய்களைக் கொண்டு உருவானது. பாரிய இரு 70 டன் நிறையுள்ள பிணையல்களில் இது பொருத்தப் பட்டிருக்கிறது.

இந்த அரங்கத்தில் 90,000 இருக்கைகள் அமைக்கப் பட்டிருக்கின்றன. எந்த இருக்கையில் இருந்து பார்த்தாலும் முழு மைதானமும் மறைவின்றித் தெரியும். இதன் கூரை 52 மீட்டர்கள் உயரம் வரை இருக்கிறது. இந்தக் கூரையின் நிறை 7,000 டன்கள்! இம் மைதானத்தின் உள்ளே இரு புறத்திலும் உள்ள பாரிய இரு தொலைக்காட்சிப் பெட்டிகள் ஒவ்வொன்றும் 600 சாதாரண தொலைக்காட்சிப் பெட்டிகளின் அளவு. இதனுள்ளே 2,618 கழிப்பறைகள் இருக்கின்றன.

இதெல்லாம் சரிதான். ஆனால், இதனது வடிவமைப்பு ஏற்கனவே செய்யப்பட்ட ஒரு வடிவமப்பின் நகல் என்று ஒரு குற்றச்சாட்டு எழுந்துள்ளது. 1941ம் ஆண்டு பிரேசில் நாட்டைச் சேர்ந்த பிரபல கட்டிட நிபுணர் ஒஸ்கார் நீமெயர், பிரேசில் நாட்டு சர்வதேச அரங்கம் ஒன்றை வடிவமைத்தார். அதில் ஒரு பாரிய வளைவை நிறுவி வடிவமைத்தார். இந்த அரங்கம் கட்டப்படவேயில்லை. நோர்மன் ஃபொஸ்டர் வடிவமைத்த இந்த வெம்பிளி அரங்கம் ஏறத்தாழ அதை ஒத்திருக்கிறது! நோர்மன் ஃபொஸ்டர் திருடிவிட்டாரா என்பதைப் படங்களைப் பார்த்து நீங்களே முடிவு செய்யுங்கள்.

(படங்கள்: இணையத்திலிருந்து)

உப்புள்ள பண்டம் குப்பையிலே

2007-03-15T12:46:00.000Z

உப்புத் தூக்கலாக உள்ள உணவை உட்கொள்வது உடம்புக்குக் கெடுதலை விளைவிக்கும் என்பதை நாம் எல்லோரும் அறிவோம். மைக்ரோவேவ் உணவுகளைத் தவிர்த்தாலும் கூட, உங்கள் உணவில் உப்பைத் தவிர்த்தாலும் கூட நாளாந்த உப்பு தேவையானதை விடக் கூடுதலாக இருக்க பெருமளவு வாய்ப்பு இருக்கிறது. எப்படி என்று கேட்கிறீர்களா? சத்துள்ள உண்வு என்று நீங்கள் நம்பி வாங்கும் உணவுகளும், சாப்பிடும் போது உப்புத் தெரியவில்லை யெனினும், அளவுக்கதிகமான உப்பைக் கொண்டிருக்கின்றன.

உப்பு என்பது சோடியம் குளோரட். இதிலுள்ள சோடியம் தான் உடம்புக்கு கேடு விளைவிக்க வல்லது. உப்பைத் தவிர உணவுப் பதார்த்தங்களில் சேர்க்கப்படும் மொனோ சோடியம் குளுடமேட், சோடியம் பைகாபனேட் போன்றவையும் சோடியத்தைக் கொண்டுள்ளன என்பதை நினைவில் வைத்திருங்கள். இரத்த அழுத்தத்தை அதிகரிக்கச் செய்வதில் சோடியம் பங்கு வகிக்கிறது. ஏறத்தாழ 12000 வருடங்களுக்கு முன்னர்தான் உப்பை உணவில் சேர்த்துக் கொள்ளும் பழக்கம் வந்ததென்று அறியப்படுகிறது.

நாம் எல்லோருமே பொதுவாக 75% உப்பை கடைகளில் வாங்கும் தயாரிக்கப்பட்ட உணவுப் பதார்த்தங்களூடாகவே பெறுகிறோம். நீங்களே எல்லா உணவுகளையும் தயார்செய்கிறீர்கள் என்று வைத்துக் கொண்டாலும் பிஸ்கட்டையோ அல்லது ப்ரெட்டையோ கடையில் வாங்குவீர்கள். இவை அதிகளவு உப்பைக் கொண்டிருக்கக் கூடும்.

உப்பு அதிகமுள்ள உணவு வகைகள்:

Baked beans
Biscuits - sweet and savoury
Breakfast cereals
Cooking sauces
Hot chocolate
Pizza
Ready meals
Soup
Tinned spaghetti
Tinned vegetables and pulses (with added salt)

உப்பு அதிகமாக இருக்கக்கூடிய உணவு வகைகள்:

Anchovies
Bacon
Cheese
Chips (if salt added)
Crisps
Gravy granules
Olives
Pickles
Pretzels
Salted and dry roasted nuts
Salt fish
Sausages
Smoked meat and fish
Soy sauce
Stock cubes
Yeast extract

இப்படிக் கூறியதற்காகவே மேற்சொன்ன உணவுப் பொருள்கள் எதனையும் சாப்பிட வேண்டாம் என்று சொல்ல வரவில்லை. அந்த உணவுப் பொருள்களிலுள்ள உப்பின் அளவை அவற்றில் குறிப்பிட்டுள்ளதை வாசித்து அறிந்து கொள்ளப் பழகிக் கொள்ளவேண்டும்.

எவ்வளவு உப்பை ஒரு நாளுக்கு நாம் உட்கொள்ளலாம்? 6 கிராம். அதாவது ஒரு தேக்கரண்டியளவு உப்பு! இது ஒரு பெரிய அளவு இல்லை. அதிலும் 75% உப்பு நாளாந்த உணவுகளில் இருக்கிறதென்றால், இந்த அளவு மிகச் சிறியது. இது வளர்ந்தோர்களுக்குத் தான். பிள்ளைகளுக்கு வேறு அளவுகள் உள்ளன. பன்னிரண்டு மாதங்களுக்குக் குறைவான குழந்தைகளுக்கு 1 கிராமிலும் குறைவானளவு உப்புத்தான் ஒரு நாளுக்குத் தேவைப்படும். இதைவிடக் கூடியளவு உப்பை அவர்களது கிட்னிகள் சமாளிக்க மாட்டா. குழந்தைகளுக்குத் தாய்ப்பால் ஊட்டினாலோ அல்லது ஃபோமுலா பால் ஊட்டினாலோ தேவையானளவு உப்பு அவர்களுக்குப் போய்ச் சேரும். மேலதிக உப்பு அவர்களுக்குக் கொடுக்கக் கூடாது. அவர்களது உணவில் உப்புச் சேர்க்கக் கூடாது. குழந்தைகளுக்கு என்று தயாரித்து விற்கப்படும் உணவுப் பொருள்களைத் தவிர வேறு உணவுப் பொருள்களை வாங்கிக் கொடுக்கக் கூடாது. ஏனெனில் அம்மாதிரியான உண்வுப் பொருள்களில் அதிகளவு உப்பு இருக்கக் கூடும்.

பிள்ளைகளுக்குக் கொடுக்கக் கூடிய உப்பின் அளவுகள்:

1-3 வயது: ஒரு நாளுக்கு 2 கிராம் உப்பு (0.8 கிராம் சோடியம்)
4-6 வயது: ஒரு நாளுக்கு 3 கிராம் உப்பு (1.2 கிராம் சோடியம்)
7-10 வயது: ஒரு நாளுக்கு 5 கிராம் உப்பு (2 கிராம் சோடியம்)
11 வயது அல்லது அதற்கு மேல்: 6 கிராம் உப்பு (2.5 கிராம் சோடியம்)

இவை பிள்ளைகளுக்குக் கொடுக்ககூடிய ஆகக் கூடுதலான உப்பின் அளவு. இதை விடக் குறைவாகக் கொடுப்பதே நல்லது. பிள்ளைகளுக்கெனவே தயாரிக்கப்பட்ட உணவுகளைக் கூட வாங்குவதற்கு முன் அவற்றிலுள்ள உப்பின் அளவை அதில் கொடுக்கப்பட்டுள்ள தகவல்களை வாசித்துத் தெரிந்து கொள்ள வேண்டும். பிள்ளைகள் அதிகளவு உப்பு சாப்பிட்டு வந்தால் அது பிற்காலத்தில் பல உடல்நல பிரச்சனைகளைத் தோற்றுவிக்கும். மேலும், சிறுவயதிலேயே உப்புடன் சாப்பிட்டு ருசிப்பட்டுக் கொண்டால், வளர்ந்த பிறகும் அதிகளவு உப்பை அவர்கள் உட்கொள்வதற்கு வாய்ப்புகள் உள்ளன.

சரி. கொடுக்கப்பட்டிருக்கும் தகவல்களிலிருந்து எப்படி உப்பின் அளவைத் தீர்மானிப்பது? பொதுவாக விற்கப்படும் எல்லா உணவுப்பண்டங்களிலும் 100 கிராமிற்கு இவ்வளவு உப்பு அல்லது சோடியம் இருக்கிறது என்று தந்திருப்பார்கள். 100 கிராமில் 1.25 கிராம் உப்பு (0.5 கிராம் சோடியம்) இருந்தால் அது "அதிகளவு" உப்பைக் கொண்டிருக்கிறது என்று கொள்ளலாம். 100 கிராமில் 0.25 கிராம் உப்பு (0.1 கிராம் சோடியம்) இருந்தால் அது "குறைந்தளவு" உப்பைக் கொண்டிருக்கிறது எனலாம். ஓர் உணவுப் பொருளில் 100 கிராமில் 0.25 கிராமிலிருந்து 1.25 கிராம் அளவுக்கு உப்பு இருந்தால் நடுத்தர அளவு உப்பைக் கொண்டிருக்கிறது என்று அர்த்தம்.

அதிகளவு உப்புள்ள (அதாவது 100 கிராமில் 1.25 கிராம் அல்லது அதற்குக் கூடுதலானளவு உப்புள்ள) உணவுப் பொருள்களைப் பெருமளவில் சாப்பிடுவதைத் தவிர்த்துக் கொள்ளுங்கள். ஏனெனில், இம்மாதிரியான பதார்த்தங்களை நிறைய சாப்பிடும்போது இலகுவாக 6 கிராமிற்கும் மேற்பட்ட உப்பை நாம் உட்கொண்டு விடுவோம். "மேலதிகமாக உப்புச் சேர்க்காதது" என்று குறிப்பிட்டிருக்கும் உணவுப் பொருள்களைத் தேர்ந்தெடுங்கள்.

சோடியம் மாத்திரம் ஓர் உணவுப் பொருளில் குறிப்பிடப் பட்டிருந்தால், அந்த அளவை 2.5னால் பெருக்கினால் உப்பின் அளவு கிடைக்கும்.

நினைவிருக்கட்டும். உணவில் உப்பின் அளவைக் குறைக்கும் போது இரத்த அழுத்தம் குறைகிறது. இரத்த அழுத்தம் குறையும்போது இதய நோய்கள் வரும் வாய்ப்புகள் குறைகின்றன. உங்களுக்கு ஏற்கனவே இரத்த அழுத்தம் அதிகம் என்றால், சாப்பாட்டில் உப்பைக் குறைப்பதன் மூலம் உங்கள் இரத்த அழுத்தத்தை சில வாரங்களிலேயே குறைத்துவிட முடியும்.

(படங்கள் இணையத்திலிருந்து)

குட்டையான ஆணே கவர்ச்சியானவன்!

2007-03-14T00:30:00.000Z

நம்பினால் நம்புங்கள். உயரம் குறைந்த ஆண்களே பெண்களின் கண்களுக்குக் கவர்ச்சியானவர்களாகத் தோன்றுகிறார்கள். கால்கள் எந்தளவுக்குக் குட்டையாக இருக்கிறதோ அந்த அளவுக்கு ஆண்கள் பெண்களை ஈர்க்கக் கூடியதாக இருக்கிறது.

இதென்ன புதுக் கதை என்று யோசிக்கிறீர்களா? இது இப்போது அல்ல. இதெல்லாம் லட்சக் கணக்கான வருடங்களுக்கு முந்தைய கதை. ஏறத்தாழ 40 லட்சம் வருடங்களுக்கு முன்னர் இருந்து 20 லட்சம் வருடங்களுக்கு முன்பு வரையான காலப் பகுதியில் காணப்பட்ட மனித ஆண்கள் குட்டையானவர்களாகவே காணப்பட்டனர். மனித முன்னோடிகளான ஹோமோக்களுக்கு நேரடியாக முன்னோடிகளான ஒஸ்ட்ரலோபிதகஸ் இனத்து ஆண்கள் 4 அடி 6 அங்குலங்களும் பெண்கள் 3 அடி 9 அங்குலங்களும் உயரமுடையவராகவே வாழ்ந்தனர். இதற்குக் கூறப்பட்ட காரணம் அந்நாளில் காடுகள் நிறைந்த உலகில் மரங்களில் ஏறி நிலை தடுமாறாது இருப்பதற்குக் குட்டையான கால்கள் அத்தியாவசியமானவை என்பதாகும். மிக உயரமான மரங்களில் திரிகின்றபோது கீழே விழுந்தால் மரணம் தான். எனவே உடலின் நிறை மையம் முடிந்தளவுக்கு நிலத்திற்குக் கிட்டவாக இருந்தால் (அதாவது கால்கள் குட்டையாக இருந்தால்) நிலை தளம்பாமல் மரங்களில் உலவ வசதியாக இருக்கும்.

யூட்டா பல்கலைகழகத்தைச் சேர்ந்த பேராசிரியர் டேவிட் காரியர் இதை முழுமையாக ஒப்புக்கொள்ள மறுக்கிறார். அவர் அண்மையில் இது தொடர்பாக எழுதியுள்ள ஓர் ஆய்வுக் கட்டுரையில், "இந்த ஒரு காரணமே கால்கள் குட்டையாயிருப்பதற்குப் போதாது" என்கிறார். "எதற்காக 20 லடசம் வருடங்களுக்கு ஒஸ்ட்ரலோபித்துகள் குட்டையான கால்களையே வைத்திருக்க வேண்டும்?", என்பது அவரது கேள்வி. இத்தனை மிக நீண்ட காலத்திற்கு ஒரு உடலுறுப்பின் தன்மை மாறாது இருக்கின்றதென்றால் அதற்கு வேறு ஏதாவது முக்கிய காரணம் இருக்க வேண்டும். மேலும் "தற்போதைய வாலில்லாக் குரங்குகளை ஆராய்ந்தால், அவற்றின் கால்களும் குட்டையே. ஆனால் அவை மிகக் குறைந்தளவு நேரத்தையே மரங்களின் மேல் செலவிடுகின்றன."

பேராசிரியர் டேவிட் காரியர் கூறும் காரணமே வேறு: உடலின் நிறை மையம் முடிந்தளவுக்கு நிலத்திற்குக் கிட்டவாக இருந்தால் நிலத்தில் நிற்கும்போது உறுதியாக நிற்க முடிகிறது.
போட்டிக்காக அல்லது சண்டை என்று வரும்போது எதிராளியைக் கீழே வீழ்த்துவதற்கு உறுதியாக நிற்கும் குட்டைக் கால்கள் உதவுகின்றன. "கால்கள் குட்டையாக இருக்கும்போது, சண்டையிடும்போத உயாமான எதிராளியைத் தோற்கடிப்பது சுலபமாகிறது", என்கிறார் டேவிட் காரியர். இதுதான் பெண்களைக் கிறங்கடிக்க வைத்த ஆண்களது முக்கிய அம்சமாக இருந்திருக்கிறது.

இந்தப் புதிய எடுகோளை எப்படி இவர் முன்வைக்கிறார்? ஆஸ்திரேலிய பழங்குடி மக்கள், வாலில்லாக் குரங்குகள், பபூன்கள் எனப் பலதரப்பட்ட இனங்களிலிருந்து கால் நீளங்களையும் நிறைகளையும் எடுத்து, அவற்றினது சண்டையிடும் தன்மைகளை ஒப்பிட்டார். இதிலிருந்து, பின்கால்களின் நீளம் சண்டையிடும் தன்மைக்கு எதிர்மறையாகத் தொடர்பு டட்டிருப்பதாகக் கண்டுபிடித்தார். அதாவது, கால்களின் நீளம் அதிகரிக்க அதிகரிக்க, சண்டையிடும் தன்மை குறைந்து கொண்டு போவதை அவதானித்தார். கை நீளத்திற்கும் சண்டையிடும் தன்மைக்கும் ஒரு தொடர்பும் இல்லை என்றும் கண்டறிந்தார். மேலுள்ள இனங்களில் மனிதர்களைத் தவிர ஏனையவற்றில் ஆண்களை விட பெண்களின் கால்கள் நீளமானவையாகக் காணப்படுகின்றன.

மனிதர்கள் மட்டும் ஒரு விசேட வகையாகி விட்டனர். சண்டை பிடிக்கும் தன்மை எவ்விதத்திலும் குறையாவிடினும், கால்கள் நீளமாகிவிட்டன. இது ஒரு வகையில் தவிர்க்க முடியாததாகி விட்டது. எப்போதுமே நிலத்துலேயே இருக்க ஆரம்பித்த பிறகு, ஆபத்திலிருந்து தப்பி ஓடுவதற்கும் வேட்டையாடுவதற்கும் வேகமாக ஓடுவதற்கு நீண்ட கால்கள் தேவைப்பட்டன. டேவிட் காரியரின் இன்னொரு ஆய்வில், குட்டையான ஒஸ்ட்ரலோபித்துகள் ஆயுதங்களைப் பயன்படுத்தக் கற்றுக் கொண்ட பின்னரே ஹோமோக்களானார்கள் (மனிதர்களது முன்னோடிகள்) என்று கூறியிருக்கிறார்.

(படங்கள்: இணையத்திலிருந்து)

சுற்றுலாப் பயணிகளை ஈர்த்தவை

2007-03-12T14:05:00.000Z

கடந்த ஆண்டு சுற்றுலாப் பயணிகளைக் கவர்ந்த முதல் பத்து இடங்களில் ஒன்பது லண்டனில் அமைந்துள்ளன. முதல் 20 இடங்களை எடுத்துக் கொண்டால், 14 இடங்கள் லண்டனில் இருக்கின்றன. ஜூலை 07 குண்டு வெடிப்புக்குப் பின்னர் தளர்ந்து போய் இருந்த சுற்றுலாப் பயணிகள் வருவை கடந்த ஆண்டு மீண்டும் நல்ல நிலைக்கு வந்துள்ளது.
2 கோடி 80 லட்சம் பேர் லண்டனின் முக்கிய இடங்களுக்கு கடந்த ஆண்டிலே போய் வந்திருக்கிறார்கள்.

Blackpool Pleasure Beach

Tate Modern

The British Museum

முதல் 20 இடங்கள் பற்றிய விபரங்களும் இதோ:

1	Blackpool Pleasure beach	தெற்கு இங்கிலாந்து	5,730,000	இலவசம்
2	Tate Modern	லண்டன்	4,915,000	இலவசம்
3	British Museum	லண்டன்	4,837,878	இலவசம்
4	The National Gallery	லண்டன்	4,562,471	இலவசம்
5	Natural History Museum	லண்டன்	3,754,496	இலவசம்
6	Science Museum	லண்டன்	2,421,440	இலவசம்
7	Victoria and Albert Museum	லண்டன்	2,372,919	இலவசம்
8	Tower of London	லண்டன்	2,084,468
9	St Paul’s Cathedral	லண்டன்	1,626,034
10	National Portrait Gallery	லண்டன்	1,601,448	இலவசம்
11	Tate Britain	லண்டன்	1,597,000	இலவசம்
12	National Maritime Museum	லண்டன்	1,572,310	இலவசம்
13	Kew Gardens	லண்டன்	1,357,522
14	Edinburgh Castle	ஸ்கொட்லாந்து	1,213,907
15	British Library	லண்டன்	1,182,393	இலவசம்
16	Chester Zoo	வடமேற்கு இங்கிலாந்து	1,161,922
17	Eden Project	தென்மேற்கு இங்கிலாந்து	1,152,332
18	Canterbury Cathedral	தென்கிழக்கு இங்கிலாந்து	1,047,380
19	Westminster Abbey	லண்டன்	1,028,991
20	Roman Baths & Pump Room, Bath	தென்மேற்கு இங்கிலாந்து	986,720

(படங்கள் இணையத்திலிருந்து)

பறவைக் காய்ச்சலுக்குத் தயாராகிறது பிரிட்டன்

2007-03-06T12:15:00.000Z

அண்மையில் இங்கிலாந்தின் கிழக்குப் பகுதியில் கோழிப் பண்ணையில் பறவைக் காய்ச்சல் பரவியது உங்களுக்குத் தெரிந்திருக்கும். நோயைக் கட்டுக்குள் வைத்திருப்பதற்காக 1 லட்சத்து 59 ஆயிரம் வான்கோழிகளை வெட்டி எரித்து விட்டார்கள். இனி வசந்த காலம் வரவிருப்பதால், தென்கிழக்காசியாவிலிருந்து இடம் பெயர்ந்து வரும் பறவைகள் பிரிட்டனுக்குப் பறவைக் காய்ச்சல் வைரஸை (H5N1) கொண்டுவரக் கூடும் என அஞ்சப்படுகிறது.

அதற்கு என்ன இப்போது என்கிறீர்களா? காரணம் உண்டு. பிரிட்டிஷ் அரசு பறவைக் காய்ச்சல் தொற்று நோய்ப் பரவல் சமயம் நடைமுறைப் படுத்த வேண்டிய திட்டங்களை அமுல்படுத்துவது என தீர்மானித்துள்ளது. முக்கியமாக லண்டனில் இத்தகைய ஒரு திட்டம் இன்றியமையாததாகிறது. இதில் நான்கில் ஒரு லண்டன் வாசி நோய் வாய்ப்படுவாரென்றும், 50,000 பேர் வரை இறப்பார்கள் எனவும் கணக்கிடுகிறார்கள். பாரிய லண்டன் அதிகாரசபை ஏறத்தாழ 10 லட்சம் பவுண்டுகள் செலவில் 1,00,000 டாமிஃபுளூ மருந்தை வாங்கி வைத்துள்ளது. இம்மருந்து H5N1 வைரஸ் வருவதைத் தடுத்து நிறுத்தாது. ஆனால், இந்தப் பறவைக் காய்ச்சலின் முக்கிய கொல்லியான சுவாசப்பையினுள் திரவம் தோன்றுதலைத் தடுத்து நிறுத்தும். இதன் மூலம், உடம்பே பிறபொருள் எதிரியை உற்பத்தி செய்து வைரஸை கொல்வதற்குப் போதிய அவகாசம் கிடைக்கிறது. ஆனால், வைரஸைத் தடுத்து நிறுத்தவல்ல தடுப்பூசியை உற்பத்தி செய்வதற்கு, அந்த வைரஸ் எது என்பது தெரிய வந்த பின்னர் ஆறு மாதகால அவகாசம் தேவைப்படும்.

தொற்று நோய் பரவ ஆரம்பிக்கும்போது யாருக்கெல்லாம் இந்த டாமிஃபுளூ மருந்து முதலில் கொடுக்கப்படும்? போலீஸார், தீயணைப்புப் படையினர், வைத்தியசாலை ஊழியர்கள் மற்றும் அம்புலன்ஸ் ஊழியர்கள். அப்படிக் கொடுத்தால் அது எத்தனை காலத்துக்கு பயனுள்ளதாக இருக்கும்? ஐந்து மாதங்கள். சாதாரண பொது மக்களுக்கு முதலிலேயே இம்மருந்து கொடுக்கப்பட மாட்டாது. நோய் வந்த பின்னரே அது கொடுக்கப்படும். அதில் கொஞ்சம் அபாயம் உள்ளது. ஏனென்றால், நோய் வந்து ஒரு குறிப்பிட்ட காலத்துக்குள் இம்மருந்து கொடுக்கப்படாவிட்டால் அதில் எந்த பயனும் இல்லை. ஆயினும், செலவைக் கட்டுக்குள் வைத்திருப்பதற்காக அரசு இந்த முடிவை எடுத்துள்ளது.

வேறு என்ன நடவடிக்கைகள் எடுக்கப்படும்? பாடசாலைகள் மூடப்படும். நிறுவனங்களை வேலை ஆரம்பிக்கும் மற்றும் முடிக்கும் நேரத்தை மாற்றி அமைப்பதற்குக் கேட்பார்கள். இதன் மூலம் போக்குவரத்தில் நெரிசல் ஏற்படுவதைத் தவிர்க்கலாம். இப்போதே கணினி மென்பொருள்களைக் கொண்டு இந்த நடவடிக்கைகள் எந்த அளவுக்கு உதவும் என்று ஆராய்ந்து வருகிறார்கள்.

என்ன நடக்கும் என்பதைக் காலம் தான் சொல்லும்.

(படங்கள்: இணையத்திலிருந்து)

உண்மையான உலக வெப்பமாக்கல்?

2007-02-28T12:45:00.000Z

மனிதர்களைப் பொறுத்தவரையில் சூரியன் அழிவில்லாமல் என்றும் இருக்கும் எமது சொந்தத் தாரகை. ஆனால், இந்த நட்சத்திரமும் ஏனைய நட்சத்திரங்களுக்குக் கிடைக்கும் அதே முடிவைத் தான் எதிர் நோக்குகிறது. அதாவது இறுதியில் பொலிவிழந்து இறந்து போகத் தான் போகிறது. ஏற்கனவே கூறியது போல, நம்மைப் பொறுத்தவரையில் சூரியன் அழிவில்லாதது. சூரியனுக்கு முடிவு நெருங்க இன்னும் 350 கோடி வருடங்கள் இருக்கின்றன. அப்பாடா!

பூமியைப் பொறுத்தவரையில் சூரியனின் சக்தி மிக முக்கியமானதாகும். உலகின் இன்றியமையாததான இரசாயனத் தாக்கமாகிய ஒளிச்சேர்க்கைக்குத் தேவையானது சூரிய சக்தி. பக்டீரியா, பாசிகள், தாவரங்கள் போன்றவை சூரிய ஒளியைக் கொண்டு காபன் டை ஆக்ஸைடையும் நீரையும் ஆக்ஸிஜனாகவும் உணவாகவும் மாற்றிக் கொள்கின்றன. இந்தத் தாக்கத்தை நம்பித்தான் உலக உணவுச் சங்கிலியும் காலநிலையும் இயங்குகின்றன. ஆனால் சூரியனுக்குச் சக்தியை வழங்கும் ஹைட்ரஜன் முடியும்போதுதான் உலகமும் தனது முடிவை எதிர் நோக்கும்.

சூரியன் பிறந்தது எப்போது? ஏறத்தாழ 450 கோடி வருடங்களுக்கு முன் பாரிய உடைந்து கொண்டிருக்கும் நட்சத்திரம் ஒன்றிலிருந்து நமது சூரியன் பிறந்தது. அவ்வாறான பெரிய நட்சத்திரத்திலிருந்து உதிர்ந்த பாரிய முகில்கள் மேலும் உடைந்து சிறிய துண்டங்களாகி இவை ஒன்றுசேர்ந்து சிறிய நட்சத்திரங்கள் உருவாகின்றன. அவற்றில் சில, எமது சூரியனைப் போல, தமது மிக நெருக்கமான நடுப்பாகத்தில் ஹைட்ரஜன் இணைப்பு அணுத் தாக்கத்தைக் கொண்டிருக்கும். இம்மாதிரியான நட்சத்திரங்களில் சில தான் கோடிக் கணக்கான வருடங்களுக்கு ஒளியையும் வெப்பத்தையும் வழங்க வல்லனவாகின்றன.

தற்போதுள்ள நிலையில் சூரியன் பூமியிலிருந்து 14 கோடி 95 லட்சத்து 97 ஆயிரத்து 900 கிலோமீற்றர் தொலைவில் இருக்கிறது. சூரியன் தன்னைத் தானே சுற்றிவர ஏறத்தாழ 25 (பூமி) நாட்கள் எடுக்கிறது. அதனது விட்டம் ஏறத்தாழ 13 லட்சத்து 91 ஆயிரம் கிலோமீற்றர்கள். பூமியின் விட்டத்தைப் போல் 109 மடங்கு இது. பூமியின் எடையை விட 3 லட்சத்து 32 ஆயிரத்து 900 மடங்கு பெரியது. சூரினுக்கூள் 74% ஹைட்ரஜனும் 25% ஹீலியமும் இருக்கின்றன. ஆகையால் இப்போதைக்கு சூரியனைக் கொண்டிழுப்பதற்குப் போதுமானளவு எரிபொருள் இருக்கிறது. சூரியனின் நடுப்பகுதியில் 1 கோடியே 50 லட்சம் செல்சியஸ் வெப்பநிலை காணப்படுகிறது. அதன் மேற்பரப்பில் வெப்பநிலை ஏறத்தாழ 6000C. கரும்புள்ளிகள் இருக்கும் பகுதியில் மட்டும் வெப்பநிலை குறைந்து 4000C ஆகவிருக்கும். ஆனால் இன்னும் 350 கோடி வருடங்களில் சூரியனின் முடிவுக்காலம் ஆரம்பமாகும். அப்போது என்ன நடக்கும்? சூரியனுக்கு ஒளியையும் வெப்பத்தையும் அள்ளி வழங்கும் ஹைட்ரஜன் இணைப்புத் தாக்கம் குறையத் தொடங்கிவிடும். ஏனென்றால் சூரியனிலிருந்த ஹைட்ரஜனின் பெரும்பகுதி ஹீலியமாக மாறியிருக்கும். இத்தருணத்தில் சூரியனில் வெப்பநிலை 10%ஆல் அதிகரித்திருக்கும். பூமியில் அச்சமயத்தில் வெப்பநிலை 2000C ஆகவிருக்கும்! மனிதன் அப்போதும் இருப்பானானால் வேறு ஏதாவது கோளில் குடி புகுந்திருப்பான்.

இப்போதிருந்து 550 கோடி வருடங்களில், சூரியனின் நடுப்பகுதியில் ஹைட்ரஜன் ஏதும் மீதமிருக்காது. அப்படியாயின், அது அப்போது ஹீலியத்தை எரிக்க ஆரம்பிக்கும். இச்சமயத்தில் அது 10,000 மடங்கு பிரகாசமாகத் தோற்றமளிக்கும். அத்துடன், அதனது விட்டம் 80 மடங்கு அதிகரிக்கும். அதனது மேற்பரப்பின் வெப்பநிலை குறைந்து 3500C ஆகி சிவப்பாகத் தோற்றமளிக்கும். இப்போது நமது சூரியன் செவ்வரக்கன் ஆகிவிட்டான். சூரியனுக்குக் கிட்டவுள்ள கோளான புதன் சூரியனுக்குள் ஐக்கியமாகி விட்டிருக்கும். ஆனால், பூமியும் வெள்ளியும் (சூரியனுக்குக் கிட்டவுள்ள அடுத்த இரு கோள்களும்) தப்பித்து விடும். ஏனெனில், சூரியனுடைய குறைந்த எடை காரணமாக அதனது ஈர்ப்பு சக்தி குறைந்து போயிருக்கும். எனவே, இந்த இரு கோள்களும் தமது தற்போதைய பாதையில் இருந்து விலகி சூரியனிலிருந்து சற்று விலகிய பாதையில் சுற்றத் தொடங்கியிருக்கும். பூமியின் வளி மண்டலத்தை சூரியப் புயல்கள் அடித்து தள்ளிக் கொண்டு போயிருக்கும். சமுத்திரங்களெல்லாம் கொதித்து முழுமையாக வற்றிப் போயிருக்கும். உயிர் வாழ்வதென்பது இயலாததொன்றாகியிருக்கும். இது தான் மிகப் பெரிய உலக வெப்பமாக்கலாக இருக்கும்!

இப்போதிருந்து 650 கோடி வருடங்களில், சூரிய உடைவின் முதல் கட்டம் ஆரம்பமாகும். சூரியனின் மேற்பரப்பில் மணிக்கு 60 லட்சம் கிலோமீற்றர்கள் வேகத்தில் சூறாவளிகள் தோன்றும். இந்தப் பாரிய வேகத்தில், அதனது வாயுக்களில் பெருமளவு அதனை விட்டு வெளியேறி விடும். இவை தன்னிச்சியாக சூரியனைச் சுற்றி பாரிய முகில்களை உருவாக்கும்.

இப்போதிருந்து 750 கோடி வருடங்களில், சூரியனின் நடுப்பாகத்திலுள்ள எரிபொருள் பற்றாக் குறையினால், அது ஒரு வெள்ளைக் குள்ளன் ஆகிவிடும். நடுப்பாகத்தைச் சுற்றியிருந்த வாயுக்களெல்லாம் தப்பித்து ஓடிவிட, இந்த நடுப்பாகம் மட்டும் நன்றாகச் சுருங்கிப்போய், இருக்கும் கொஞ்ச எரிபொருள்களையும் எரித்து மின்னிக் கொண்டிருக்கும். அதனுடைய பருமன் தற்போதையதைப் போல் 10 லட்சத்தில் ஒரு பகுதியாகத் தான் இருக்கும். இத் தருணத்தில் நமது சூரியன் இறந்து விட்டதாகக் கருதலாம். இதன் பிறகு கொஞ்சம் கொஞ்சமாக எரிபொருள் முழுவதுமாக தீர்ந்து போக, சூரியன் எந்த ஒளியையும் சிந்தாமல் ஒரு கருப்புக் குள்ளன் ஆக மாறுவான்.

அப்படி சூரியன் இறக்கும்போது இந்தப் பிரபஞ்சத்தின் வயது வெறும் 2000 கோடி வருடங்கள் ஆகத்தான் இருக்கும்!

(படங்கள்: இணையத்திலிருந்து)

மன்னிக்க வேண்டுகிறேன்....

2007-02-26T13:45:00.000Z

அண்மையில் பத்திரிகை ஒன்றில் வந்த செய்தி என் கவனத்தை ஈர்த்தது. அதன் சாராம்சத்தை இந்தப் பதிவிலே பார்ப்போம். அனாமதேயமாக மன்னிப்புக் கேட்கும் வசதிக்காக ஓர் இலவசத் தொலைபேசி எண். அந்த முனையில் யாரும் பதிலளிக்க மாட்டார்கள். ஒலிப்பதிவு சாதனத்தில் உங்கள் மன்னிப்புச் செய்தியைப் பதிவு செய்து விடலாம். பெயர் விபரங்களைக் கொடுக்கத் தேவையில்லை. கொடுக்க வேண்டாம் என்றுதான் இந்தத் தொலைபேசி இணைப்பை நடத்துபவர்கள் கூறுகிறார்கள். மன்னிப்புச் செய்தி எதற்காகவேனும் இருக்கலாம். என்ன சொல்லப் போகிறீர்கள் என்பது உங்களைப் பொறுத்தது.

பிரிட்டனில் இப்போது இருக்கும் இந்தச் சேவை அமெரிக்காவிலுள்ள சேவையைப் பின்பற்றுகிறது. அங்கு இந்தச் சேவை 1980ல் நியூ யோர்க்கில் ஆலன் பிரிட்ஜ் என்ற ஓவியரால் ஆரம்பிக்கப் பட்டது. அமெரிக்கர்களை விட பிரித்தானியர்கள் தங்கள் உணர்ச்சிகளை வெளிக்காட்டுவதில் தயக்கம் காட்டுபவர்கள். "ஆகவே, அமெரிக்காவை விட இங்குதான் இப்படியான ஒரு சேவைக்கு முக்கிய தேவை இருக்கிறது" என்கிறார், இந்தத் தொலைபேசிச் சேவையைப் பிரிட்டனில் ஆரம்பித்து வைத்துள்ள ஓவியர் ஜேம்ஸ் லீஸ்.
மன்னிப்புக் கேட்பதென்பது மிக முக்கியமானதொன்று. குற்ற உணர்ச்சி மிக மிகக் கொடூரமானது. ஒருவரது வாழ்வை முழுமையாக ஆக்கிரமிக்கக் கூடிய தன்மை வாய்ந்தது. மன்னிப்புக் கேட்பது அதற்கு ஒரு வடிகாலாக அமையும். தற்கொலைக்கு முயல்பவர்களில் 80% பேர் ஏதோ ஒரு வகையில் குற்ற உணர்ச்சிகளை மனதுக்குள் அடக்கி வைத்திருப்பவர்கள் தான்.

மன்னிப்புக் கேட்பதென்பது இந்த அளவுக்கு நல்லது என்றால், நாம் ஏன் அதை அதிகம் செய்வதில்லை? இதற்கு முக்கியமான காரணம், அப்படி செய்வது தனது பலவீனத்தின் அறிகுறி என்று மற்றவர்கள் நினைத்து விடுவார்கள் என்பது தான். மன்னிப்புக் கேட்பது தோல்வியல்ல, மனிதனுடைய சாதாரண வாழ்வோடு இணைந்தது தான் என்பதைப் புரிந்து கொண்டால் மீதம் இலகுவாகி விடும்.

உண்மையில் மன்னிப்பு என்பது பாதிக்கப் பட்டவரிடம் கேட்கப் பட வேண்டியது. அப்படியாயின், இந்தத் தொலைபேசிச் சேவை எதற்கு? இதில் பதிவு செய்து வைப்பதால் பாதிக்கப் பட்டவர் இது குறித்து அறிந்து கொள்ள வழியில்லையே? உண்மைதான். ஆனால் பலரால் வார்த்தைகளைக் கோர்த்து சம்பந்தப் பட்டவரிடம் மன்னிப்புக் கேட்க முடிவதில்லை. இந்தத் தொலைபேசிச் சேவை அதற்கு ஒரு முதற் படியாக அமைகிறது. இதன் பின்னர் அவர்கள் சம்பந்தப் பட்டவரிடம் மன்னிப்புக் கேட்டால் நல்லது. இல்லையெனிலும் பரவாயில்லை; அவர்களது உணர்ச்சிகளுக்கு வடிகாலாக இந்தச் சேவை அமைந்திருக்கும். அதுவும் நன்மைக்கே.

ஒரு வகையில் பார்த்தால், சர்ச்சில் பாவ மன்னிப்புக் கேட்பதற்கும் இதற்கும் பெரியளவு வித்தியாசம் இல்லை.

இதோ மன்னிப்புக் கேட்டு விடப்பட்ட சில பதிவுகள்:

"1997ல் ஸ்டேசன் வீதியில் இருக்கும் தம்பதிடம் மன்னிப்புக் கோருகிறேன். அவர்கள் வீட்டில் தங்கி விட்டுப் பின்னர் வெளியேறும் போது அவர்களது வீட்டு முன்கதவைத் தாளிடாமல் வந்து விட்டேன். அவர்கள் வீட்டுக்குள் கள்வர் புகுந்து விடவில்லை என நம்புகிறேன்."

"எனது காதலனின் கண்ணில் குத்து விட்டதற்கு மன்னிக்க வேண்டுகிறேன்."

"அரசியலாளர்கள் பொய் கூறுவதற்காக எதிர்காலத் தலைமுறையிடம் மன்னிப்புக் கேட்கிறேன். இவர்களால் உணமையைச் சொல்லவே முடியாது. உண்மையைச் சொல்லும் ஆற்றல் இவர்களுக்கு இல்லை. ஆகவே, இந்த மன்னிப்புப் பதிவைக் கவனமாக வைத்திருந்து 100 ஆண்டுகளுக்குப் பிறகு இருக்கும் மக்களுக்குக் கிடைக்கச் செய்யுங்கள். நன்றி."

எல்லாம் சரி. அந்த எண் என்ன? பிரிட்டனில் இலவசமாக அழைக்கக்கூடிய அந்த எண்: 0800 970 9394. பிரிட்டனுக்கு வெளியேயிருந்து அழைக்கும் போது (இது இலவசம் இல்லை) + 44 800 970 9394

(படம்: இணையத்திலிருந்து)

பெண்ணின் புத்திசாலித்தனம்

2007-02-23T14:53:00.000Z

மின்னஞ்சலில் வந்த ஒரு ஜோக் இது. இதற்கும் எனது கருத்துகளுக்கும் எந்த சம்பந்தமும் இல்லை! தமிழாக்கம் மட்டும் தான் என்னுடையது.

ஒரு பெண் கால்ஃப் விளையாடிக் கொண்டிருந்தாள். ஒரு முறை அவள் அடித்த பந்து மரங்களுக்கிடையில் போய் விழுந்து விட்டது. பெண்மணியும் விடாமல் தனது பந்தைத் தேடிக் கண்டுபிடித்தாள். அப்போது அங்கு பந்துக்குப் பக்கத்தில் ஒரு தவளையை அவள் கண்டாள். பார்க்கவே அருவருப்பான தோற்றமுடையதாக அந்தத் தவளை இருந்தது. முகத்தைச் சுழித்துக் கொண்டாள் நமது நாயகி. பந்தை அடிப்பதற்கு அவள் தயாராகிக் கொண்டிருந்த போதுதான் அந்த அதிசயம் நடந்தது.

தவளை பேசத் தொடங்கியது. "நான் ஒரு பூதம். ஏதோவொரு சாபத்தால் இப்படித் தவளையாகி விட்டேன். எனக்கு ஒரே ஒரு முத்தம் கொடு. நான் பழைய நிலைக்கு மாறிவிடுவேன். அதன் பின்னர், நீ கேட்கும் மூன்று வரங்களை நிறைவேற்றி வைக்கிறேன்" என்றது தவளை. இவளும் யோசித்துப் பார்த்தாள். "அருவருப்பாகவே இருந்தாலும், அது சொல்வது உண்மையோ பொய்யோ என்று தெரியாவிடினும், ஏதோ செய்வோம். நான் எதை இழந்து விடப் போகிறேன்" என்று சிந்தித்து விட்டு, அந்தத் தவளையை எடுத்து ஒரு முத்தம் கொடுத்தாள்.

அவ்வளவுதான்! அந்தத் தவளை பூதமாக மாறியது. "நீ விரும்பும் மூன்று வரங்களையும் கேள். நிறைவேற்றி வைக்கத் தயாராக இருக்கிறேன்" என்றது பூதம். "ஆனால் ஒரு நிபந்தனையைக் கூற மறந்துவிட்டேன். நீ கேட்கும் ஒவ்வொன்றும் பத்து மடங்காக உனது கணவனுக்கும் கிடைக்கும்".அந்தப் பெண் சிறிது நேரம் யோசித்தாள். பின்னர் தவளையிடம், "இந்த உலகிலேயே மிகச் சிறந்த அழகியாக நான் மாற வேண்டும்" என்றாள். "நன்றாக யோசி. உனது கணவன் உலகிலேயே மிகச் சிறந்த அழகனாவான்" என்று கேட்டபடியே பூதம் அவளை நன்றாக உற்றுப் பார்த்தது. "அவர் எனது கணவனல்லவா? அவர் சிறந்த அழகனாக இருந்தால் எனக்கு எவ்வளவு மகிழ்ச்சி!" என்று அவள் பதிலளித்தாள். அடுத்த கணம் அவள் மிகச் சிறந்த அழகியானாள்.

"உனது இரண்டாவது வரம் என்ன?" என்று கேட்டது பூதம். சற்றும் தயக்கமில்லாமல், "உலகிலேயே மிகுந்த பணக்காரியாக என்னை மாற்று" என்றாள். "மறந்து விடாதே. இதன் மூலம் உனது கணவன் உன்னை விட பத்து மடங்கு பணக்காரனாக இருப்பான்!" தவளை நிபந்தனையை மீண்டும் நினைவூட்டியது. "இதில் என்ன இருக்கிறது? என்னிடம் இருப்பதில் பாதி அவருக்கு, அவரிடம் இருப்பதில் பாதி எனக்கு அல்லவா?" அடுத்த நொடியில் அவள் உலகிலேயே மிகப் பெரிய பணக்காரியானாள்.

"அடுத்த வரம்?" தூண்டியது அந்த பூதம். நமது நாயகி முகத்தில் புன்னகை. "எனக்கு மெலிதாக மாரடைப்பு வர வேண்டும்" என்றாள்.

பெண்களுக்கு
பயங்கர மாரடைப்பில் கணவன் காலியாகிவிட மிக அழகியாகவும் மிகப் பெரிய பணக்காரியாகவும் நீண்ட காலம் சந்தோஷமாக அவள் வாழ்ந்தாள்.
இந்தக் கதையின் நீதி: பெண்கள் எதைச் செய்தாலும் புத்திசாலித்தனமாகச் செய்வார்கள்!
பெண்களே, இத்துடன் இந்தக் கதையை வாசிப்பதை நிறுத்தி விடுங்கள்.

ஆண்களுக்கு:
உண்மையில் அவளது கணவனுக்குப் பத்து மடங்கு மெலிதான மாரடைப்புத் தான் வந்தது. அதை அவன் உணரக் கூட இல்லை.
இந்தக் கதையின் நீதி: பெண்கள் புத்திசாலித்தனமாகச் செய்வதாக நினைத்துக் கொண்டு அதற்கு எதிமாறாக நடந்து கொள்வார்கள்!
பெண்களே, இப்போதும் இதை வாசிக்கிறீர்கள் என்றால், மற்றவர் சொல்வதை நீங்கள் காதில் வாங்கிக் கொள்வதில்லை என்ற குற்றச்சாட்டை உறுதி செய்கிறீர்கள் என்று அர்த்தம்!

(படம் இணையத்திலிருந்து)

எங்கும் பனிமழை பொழிகிறது!

2007-02-21T18:33:00.000Z

கடந்த சில வாரங்களுக்குள் இரு தடவைகள் லண்டனில் பனிமழை பொழிந்தது. முதல் தடவை சுமார் ஓர் அங்குல அளவுக்கும் இரண்டாவது தடவை சுமார் ஐந்து அங்குல அளவுக்கும் இந்தப் பனிமழை பொழிந்திருந்தது. அவ்வளவுதான் லண்டனின் அத்தனை போக்குவரத்து சாதனங்களும் பெருமளவுக்குப் பாதிக்கப்பட்டன. இது ஒன்றும் புதிது இல்லை. லண்டனில் பனிமழை பொழிவது குறைவு. அதனால், லண்டன் எப்பொதுமே பனிமழைக்குத் தன்னைத் தயாராக்கி வைத்திருப்பதில்லை. எப்போது பனிமழை பொழிந்தாலும் போக்குவரத்துப் பாதிக்கப்படுதல் வழமையாகிவிட்டது. யாராவது ரயில் அலுவலர்களைக் கேட்டால் பிழையான வகைப் பனிமழை பொழிந்துவிட்டது என்பார்கள்!

பனிமழை எப்படி உருவாகிறது? பனிமழைகளில் எத்தனை வகை உண்டு? ஏன் இவ்வாறு வெவ்வேறு வகையான பனிமழைகள் பொழிகின்றன? இந்தக் கேள்விகளுக்கான விடைகளை இந்தப் பதிவிலே பார்ப்போம்.

பனிமழையும் சாதாரண மழையைப் போலவே, நீர் ஆவியில் தனது பயணத்தை ஆரம்பிக்கிறது. சமுத்திரம், ஏரிகள், ஆறுகள் போன்றவற்றிலிருந்து ஆவியாகும் நீர் காற்றினில் கலந்து விடுகிறது. ஆவியுடன் சேர்ந்த காற்றுக் குளிர்ச்சியடையும்போது, ஒரு கட்டத்தில் காற்றினிடையே இருக்கும் நீராவி நீராக மாறும். இந்த நிகழ்வு பூமிக்கு அண்மையாக நடந்தால், புற்களிலே பனித்துளிகளாகக் காட்சியளிக்கும். இதுவே பூமியிலிருந்து மிக உயரத்தில் நிகழ்ந்தால், தூசித்துகள்களிலே படிந்து முகிலாக மாறுகிறது. முகிலென்பது கணக்கிட முடியாதளவு நுண்ணிய நீர்த்துளிகளின் சேர்க்கை. இதில் ஒவ்வொரு நீர்த்துளியின் நடுவிலும் ஒரு துகள் இருக்கும். குளிர்காலத்தில், வெளிவெப்பநிலை நீர் உறைந்து விடக்கூடியதற்கும் குறைவாக இருந்தாலும் பனிமழை பொழியவல்ல முகில்கள் நீர்த்துளிகளையே பெரும்பாலும் கொண்டிருக்கும். ஆனால், மேலும் மேலும் வெப்பநிலை குறைய ஒரு கட்டத்தில், அதாவது -10C அளவில், இந்நீர்த்துளிகள் உறைய ஆரம்பிக்கும். இவ்வாறு உறைவது மிக மெதுவாகவே நடைபெறும்.

பனிமழை என்பது உறைந்த நீர்த்துளிகளின் மழை அல்ல. இப்படி நிகழ்வதுண்டு. ஆனால் அது பனிமழை அல்ல. முகில்களில் நீர்த்துளிகள் உறைந்துபோய் இருப்பதில்லை. அவை கீழே விழும்போது உறைந்து வெறுமனே சிறிய பனிக்கட்டிகளாகப் பொழியும். அப்படியானால், பனிமழையில் கீழே விழும் பனிப்பூக்கள் எப்படி உருவாகின்றன?

முகிலிடையேயுள்ள ஒரு குறிப்பிட்ட நீர்த்துளி உறைகின்றபோது, அது ஒரு நுண்ணிய பனிக்கட்டியாக மாறும். அதனைச் சுற்றி ஏனைய நீர்த்துளிகள் இருக்கும். அந்தப் பனிகட்டியைச் சுற்றியுள்ள நீராவி அதன் மேற்பரப்பில் உறையத் தொடங்கும்போது, அந்தப் பனிக்கட்டி வளர ஆரம்பிக்கிறது. இதுவே பனிப்பூவாக உருவாகிறது. பனிக்கட்டி மேலும் வளர வளர மீதமுள்ள நீர்த்துளிகள் ஆவியாகி இன்னும் கூடுதலாக நீராவியைக் காற்றில் சேர்க்கின்றன. நீராவி பனிப்பூவின் மேல் படர்ந்து அது மேலும் வளரும். இவ்வாறே முகிலினுள் பனிப்பூக்கள் உதிக்கின்றன.

பனிப்பூக்கள் நிறமற்றவை, கண்ணாடி போல. ஆனால், அவற்றின் மேற்பரப்பு சிறியளவு ஒளியைத் தெறிப்படைய வைக்கும். ஒரு பனிக்குவியல் இருக்கும்போது, அதிலுள்ள அத்தனை பனிப்பூக்களும் சிறியளவு ஒளியைத் தெறிக்கச் செய்வதால், அதிலிருந்து ஒளிக்கற்றைகள் எல்லா இடமும் சிதறி விழும். நாம் அவற்றைப் பார்க்கும் போது எல்லா நிறங்களும் தெரிவதால் அந்தக் குவியல் வெள்ளை நிறமாகத் தெரியும். இதே காரணத்தினாலேயே சர்க்கரையும் உப்பும் வெள்ளையாகத் தெரிகின்றன. உண்மையில் பனிப்பூக்கள் மிகச் சிறியளவு ஒளியை உள்வாங்கிக் கொள்கின்றன. அதிலும் சிவப்பு நிறக் கதிர்களைக் கொஞ்சம் கூடுதலாகவே உறிஞ்சிக் கொள்கின்றன. அதனாலே தான் பனிப்பூக்கள் கொஞ்சம் நீலநிறங் கொண்ட வெண்மையாக இருக்கின்றன.

பொதுவாக, பனிப்பூக்கள் ஆறு உறுப்புகளைக் கொண்டிருக்கும் (கட்டாயம் என்றில்லை; கீழே வேறு பல வடிவங்களைக் காணலாம்). இதற்குக் காரணம், பனிப்பூக்களின் மூலப்பொருள்தான்: பனிக்கட்டி. இதனது பளிங்குக் கட்டமைப்பு அறுகோண வடிவமுடையது. நீர் மூலக்கூறுகள் அறுகோணக் கட்டமைப்பில் மேலும் மேலும் இணைந்து கொள்ளும்போது அறுகோணவடிவான உருளைகள் கிடைக்கின்றன. இவ்வுருளைகளின் ஒவ்வொரு மூலையிலும் நீர் மூலக்கூறுகள் மேலும் இணைந்து கொள்ள ஆறு உறுப்புகள் வளர்ச்சியடைகின்றன.

பனிப்பூக்களில் மிக எளிமையான வடிவமுடையது அறுகோண உருளைகள்தான். இரு அறுகோண வடிவம் கொண்ட அடித்தளமும் முடித்தளமும் மற்றும் ஆறு முகங்களையும் கொண்டதாக இவை அமைந்திருக்கும். இவ்வகைப் பனிப்பூக்கள் தட்டையானவையாகவோ அல்லது நீண்ட தம்பம் போன்றவையாகவோ இருக்கலாம். பனிப்பூக்கள் வளர ஆரம்பத்தில் பனிமழை பொழிந்தால், அவை இந்த எளிமையான வடிவைத் தான் கொண்டிருக்கும். அவை மேலும் வளரும்போது அவற்றினது மூலைகளிலிருந்து கிளைகள் உருவாகின்றன. இதன் மூலம் பல சிக்கலான வடிவங்கள் தோன்றுகின்றன.

இவ்வகையான வடிவங்கள் எந்த எந்த நிலைமைகளில் தோன்றுகின்றன என்ற விபரத்தைக் கீழ்க் காணும் வரைபடத்திலிருந்து காணலாம். மெல்லிய தட்டு வடிவங்களும் தாரவை வடிவங்களும் -2C வெப்பநிலையளவில் உருவாகின்றன. தம்பம் வடிவானவையும் நீண்ட ஊசி போன்றவையும் -5C வெப்பநிலையில் வளர்கின்றன. தட்டு வடிவங்களும் தாரவை வடிவங்களும் -15C வெப்பநிலையளவில் மீண்டும் தோன்றுகின்றன. தட்டும் தம்பமும் சேர்ந்த வடிவங்கள் -30C வெப்பநிலையளவில் உருவாகின்றன. மேலும், ஈரப்பதன் குறைவாக இருக்கும்போது, பனிப்பூக்கள் பொதுவாக எளிமையானவையாகக் காணப்படுகின்றன. ஈரப்பதன் அதிகரிக்கும்போது, பனிப்பூக்களின் சிக்கலான வடிவங்கள் தோன்றுகின்றன.

ஒன்று மட்டும் நினைவில் வைத்திருங்கள்: இங்கே படங்களில் உள்ள பல படிகங்கள் சமவடிவாக இருக்கின்றன. ஆனால் உண்மையில் பனிப்பூக்கள் இவ்வாறு மிக அழகாக சம வடிவாக இருக்கமாட்டா.

[Snowflake Pictures: Published with permission from Prof Kenneth G. Libbrecht of California Institute of Technology]

ஒரு கிளிக்கில் மருத்துவர்!

2007-01-12T14:48:00.000Z

நோய்களைப் பற்றியும் அவற்றைக் குணப்படுத்தல் பற்றியும் எண்ணிட முடியாதளவு இணையத்தளங்கள் உருவாகியிருக்கின்றன. கூகுளாண்டவரிடம் கான்சர் என்று கேட்டால் போதும் 13 கோடி 80 லட்சம் இணைப்புகளை தேடிப்பிடித்துக் கொண்டு வருவார். அதே பாலியலோடு சம்பந்தமாகக் கேட்டால் இதைவிடக் கூடுதலான இணைப்புகளைக் கொண்டுவந்து சேர்ப்பார். அப்படியே இருந்தாலும் கூட, மருத்துவம் சம்பந்தமான இணையத்தளங்கள் தான் எண்ணிக்கையில் இரண்டாவது இடத்தில் இருக்கின்றன.

பிரிட்டனின் தேசிய சுகாதார சேவையின் (என் எச் எஸ்) என் எச் எஸ் டைரெக்ட் என்ற இணையத்தளத்திற்கு ஒரு மாதத்தில் மட்டும் 1 கோடி 50 லட்சம் பேர் வந்து தத்தமது நோயின் அறிகுறிகளைப் பற்றி அறிந்து கொள்கிறார்கள். ஒரு மருத்துவருடன் கலந்து பேச வெட்கப்பட்டும் பலர் இவ்வாறு செய்வதுண்டு. எது எப்படியாயினும், தமது நோயைத் தாமே கண்டுபிடிப்பதற்கு பலர் முயல்கிறார்கள். அறிகுறிகளை மட்டும் வைத்து நோயைக் கண்டுபிடித்து விடலாம் என்றால் ஒரு மருத்துவரே எதற்கும் தேவையில்லை என்று ஆகிவிடுமே! இப்படிப் பிழையாக நோயைப் புரிந்து கொள்ளும் அபாயம் ஒரு புறம் இருக்க, இணையத்தில் கிடைக்கும் தகவல்கள் எல்லாமே சரியானவையா?

அண்மையில் நடந்த ஓர் ஆய்வின் படி, எம்மில் 72% பேர் மருத்துவம் சம்பந்தமான விடயங்களுக்கு இணையத்தின் உதவியை நாடியிருக்கிறோம். கூகுளாண்டவர் தேடித்தரும் மருத்துவத் தளங்களில் பெரும்பாலானவை மருந்துற்பத்தி நிறுவனங்கள் நிதி வழங்கி உருவானவை. அங்கு அவர்களது மருந்துகளது விற்பனைக்குத் தான் முதலிடமிருக்கும். நடுநிலையாகத் தகவல்களைத் தருபவையாக அவை இருக்கப் போவதில்லை. அப்படியானால் எவை நல்ல தளங்கள் எனக் கருதப்படலாம்? சிலவற்றை இங்கே குறிப்பிடுகிறேன். ஏனையவற்றை நீங்களும் தாருங்கள். பிரிட்டனில் NHS Information Partner என்ற முத்திரை உடைய தளங்கள், சுவிஸ் நாட்டைச் சேர்ந்த Health on the Net Foundation வழங்கும் HoN முத்திரை உடைய தளங்கள், அமெரிக்காவின் Utilization Review Accreditation Council வழங்கும் URAC முத்திரை கொண்ட தளங்கள்.

மருத்துவம் சம்பந்தமான 10 இணையத்தளங்கள் இதோ:

1. http://www.nhsdirect.nhs.uk/
நோயின் அறிகுறிகள், சோதனைகள், சிகிச்சை போன்ற பல தரப்பட்ட விடயங்களைக் கொண்டுள்ள ஒரு தளம்.

2. http://www.netdoctor.co.uk/
விளம்பரங்களின் உதவியுடன் நடத்தப்படும் ஒரு சிறந்த தளம். மனம் சம்பந்தமான பிரச்சினைகளையும் இலகுவாகப் படிக்கக் கூடியவகையில் இது தருகிறது.

3. http://www.medicineplus.gov/
அமெரிக்காவின் தலைசிறந்த மருத்துவத் தளங்களில் முக்கியமானதொன்று. தற்போது நடந்துகொண்டிருக்கும் ஆராய்ச்சிகள் பற்றிய விபரங்கள் முதல் மிக இலகுவாகப் புரிந்து கொள்ளக் கூடிய வகையில் தரப்பட்டிருக்கும் நோய் சம்பந்தமான தகவல்கள் வரை இந்தத் தளம் பலவாறு உதவுகிறது.

4. http://www.childrenfirst.nhs.uk/
குழந்தைகளுக்கான Great Ormond Street மருத்துவ நிலையத்தின் இணையத்தளம் இது. குழந்தைகளுக்கு வரும் நோய்கள் அவற்றின் சிகிச்சைகள் போன்றவற்றை இந்தத் தளம் விவரிக்கிறது.

5. http://www.cancerbackup.co.uk/
புற்று நோய்கள், அவற்றின் சிகிச்சைகள் மற்றும் அவை சம்பந்தமான பல தகவல்கள் அடங்கிய 4000க்கும் மேற்பட்ட பக்கங்களைக் கொண்டது இந்தத் தளம்.

6. http://www.cancerresearchuk.org/
The Cancer Research UK என்ற அற நிறுவனத்தின் இணையத்தளம். புற்று நோய் சம்பந்தமான பல தகவல்களுடன் தற்போது நடந்துவரும் ஆராய்ச்சிகளின் விபரங்களையும் இது தருகிறது.

7. http://www.allergyuk.org/
அலர்ஜி சம்பந்தமான பல நடுநிலையான தகவல்களை இந்த இணையத்தளம் கொண்டுள்ளது.

8. http://www.mayoclinic.com/
அமெரிக்காவின் புகழ் வாய்ந்த நிறுவனத்தின் மதிப்புமிக்க இணையத்தளம். இணையக்கருவிகள் நிறைந்த ஒரு தளம்.

9. http://www.webmd.com/
மதிப்புமிக்க இன்னொரு பாரிய அமெரிக்க இணையத்தளம். நோயின் அறிகுறிகளைப் பார்ப்பதற்கென வடிவமைக்கப்பட்ட அசைந்தாடும் கருவி கொண்ட தளம் இது.

10. http://www.quackwatch.org/
இன்னோர் அமெரிக்கத் தளம். கள்ள மருத்துவர்களையும் அவர்தம் சிகிச்சை முறைகளையும் தோலுரித்துக் காட்டுவதற்கென்றே உருவாக்கப்பட்டது இந்தத் தளம்.

மேலும் நல்ல தளங்கள் பல உள்ளன. நீங்களும் இந்தப் பட்டியலுக்கு மேலும் பல தளங்களைச் சேருங்களேன்.

எல் நீனோ - காலநிலை மாற்றம்

2007-01-10T15:08:00.000Z

எல் நீனோ என்பது ஸ்பானிஷ் மொழியில் ஓர் ஆண் குழந்தை என்று பெயர். இதைப் பசிபிக் சமுத்திரத்தில் நிகழும் ஒரு மாற்றத்திற்குப் பெயராகப் பயன்படுத்துகின்றனர். பொதுவாக கிறிஸ்மஸ் சமயத்தில் தான் இது நிகழ்வதால் இயேசுவைக் குறிப்பதாக இந்தப் பெயர் அமைந்துள்ளது. ஆரம்பத்தில் எல் நீனோ என்பது ஆண்டு தோறும் கிறிஸ்மஸ் சமயத்தில் பசுபிக் கடலில் எக்குடோர், பேரு நாடுகளின் கரையோரமாகத் தோன்றும் ஒரு வெப்ப நீரோட்டத்தையே குறித்தது. இந்த நீரோட்டம் சில வாரங்களே நீடிக்கும். ஆனால், 2-7 ஆண்டுகளுக்கு ஒருமுறை இந்த நீரோட்டம் பல மாதங்களுக்கு அல்லது வருடங்களுக்கு நீடிக்கும். தற்காலத்தில் இதைதான் எல் நீனோ எனப் பொதுவாகக் கூறப்படுகிறது. உதாரணமாக 1991ல் உருவான எல் நீனோ 1995 வரை நீடித்தது. காலநிலையில் இதனது தாக்கங்கள் உலகளாவியது.

ஒரு சாதாரண வருடத்தில், தாழ்ந்த காற்றழுத்தப் பகுதி ஆஸ்திரேலியா, இந்தோனேசியாவுக்கு மேலாகவும், காற்றழுத்த உயர்வுப் பகுதி பசிபிக் கடலுக்கு மேலும் தோன்றும். இதன் காரணமாக, தென்னமெரிக்-காவிலிருந்து ஆஸ்திரேலியாவை நோக்கி காற்று வீசும். கடலின் வெப்பமான மேற்பரப்பு நீரை இக்காற்று தன்னோடு அணைத்துச் சென்று, இந்தோனேசியாவிலும் வட ஆஸ்திரேலியாவிலும் மழை பொழியச் செய்யும். வெப்பமான மேற்பரப்பு நீரை ஈடுசெய்ய குளிர்ந்த நீர் பசிபிக் கடலின் அடியிலிருந்து எக்குடோர், பேரு நாடுகளின் கரை-யோரமாக மேற்பரப்புக்கு வந்து சேரும். பசிபிக் கடலின் இந்த இரு பகுதிகளுக்கும் இடையில் கடல்நீரின் வெப்பநிலையில் ஏறத்தாழ 10 செல்சியஸ் வித்தியாசம் இருக்கும்.

ஆனால், ஓர் எல் நீனோ வருடத்தில், வட ஆஸ்திரேலியாவின் மேலே காற்றழுத்த உயர்வுப்பகுதி தோன்றும். அதே சமயம், பசிபிக்கின் மையப்பகுதியிலும், எக்குடோர், பேரு நாடுகளின் கரையோரத்திலும் காற்றழுத்தம் குறைந்த பகுதிகள் தோன்றும். காற்றழுத்தத்தில் ஏற்படும் இத்தகைய மாற்றம், வழமையாக தெற்கு அமெரிக்காவிலிருந்து ஆஸ்திரேலியாவை நோக்கி வீசும் காற்றைக் குறைக்கும் அல்லது மறுபுறமாக வீசவைக்கும். இதனால் எக்குடோர், பேரு நாடுகளின் கரையோரத்தில் பூமத்தியரேகையின் வெப்பமான நீர் "தேங்குகிறது". வழமையான குளிர்ந்த சத்துநிறைந்த நீர் கடலடியிலிருந்து மேற்பரப்புக்கு வர வழியில்லாமல் போகிறது. இந்தப் பசிபிக் கடலின் பகுதியில் மீன்களின் எண்ணிக்கை இதன் காரணமாக வெகுவாகக் குறையும்.பசிபிக்கின் இந்தப் பக்கத்தில், அதாவது அமெரிக்கப் பக்கத்தில், மழைவீழ்ச்சியும் அதன் காரணமாக வெள்ளப்பெருக்கும் அதிகமாகும். முரணாக, ஆஸ்திரேலியாவின் பக்கத்தில் மழைவீழ்ச்சி குறைந்துவிடும். வரட்சியும் அதன் காரணமாக காட்டுத்தீயும் அதிகரிக்கும்.

இதுவரை காலமும் எல் நீனோ நடந்த ஆண்டுகள்:

1902-1903 1905-1906 1911-1912 1914-1915

1918-1919 1923-1924 1925-1926 1930-1931

1932-1933 1939-1940 1941-1942 1951-1952

1953-1954 1957-1958 1965-1966 1969-1970

1972-1973 1976-1977 1982-1983 1986-1987

1991-1992 1994-1995 1997-1998

பொதுவாக, எல் நீனோ நடந்து முடிந்த பின்னர், காலநிலை சாதாரண நிலைக்குத் திரும்பிவிடும். ஆயினும், சில ஆண்டுகளில் தென் அமெரிக்காவிலிருந்து ஆஸ்திரேலியாவை நோக்கி வீசும் காற்று மிகப் பலமாக இருக்கலாம். இதனால், பசிபிக்கின் மத்திய மற்றும் கிழக்குப்பகுதிகளில் வழமையைவிட அதிகமான குளிர் நீர் இருக்கும். இந்நிகழ்வை லா நீனோ என்பர்.

எல் நீனோ உலகளவிய அளவில் காற்றோட்டங்களில் தாக்கம் விளைவிக்கக் கூடியது. பேரு, எக்குடோர் ஆகிய நாடுகளில் வெள்ளப்பெருக்கு, இந்தோனேசியா, ஆஸ்திரேலியாவில் வரட்சி போன்றவற்றைத் தவிர, உலகின் பல பாகங்களிலும் அசாதாரண காலநிலையைத் தோற்றுவிக்கும். உதாரணமாக, 1982-83ல் தெற்கு ஆபிரிக்கா, தெற்கு இந்தியா, இலங்கை, பிலிப்பின்ஸ், இந்தோனேசியா ஆகிய நாடுகளில் வரட்சி; பொலிவியா, கியூபா ஆகிய நாடுகளில் வெள்ளப்பெருக்கு; ஹவாயில் புயல். 1997-1998ல் ஐரோப்பாவின் பலபகுதிகளில் குளிர்கால வெப்பநிலை அதிகரித்துக் காணப்பட்டது.

இப்போது மீண்டும் எல் நீனோ ஆரம்பமாகியிருப்பதாகக் கருதப்படுகிறது. கடந்த செப்டெம்பரில் எடுத்த வெப்பநிலை அளவுகள் இதையே சுட்டுகின்றன. 1998ம் ஆண்டு மிகவெப்பமான ஆண்டு என்று கருதப்படுகிறது. ஏற்கனவே 2006ம் ஆண்டு பிரிட்டனில் மிகவெப்பமான ஆண்டு என்று அறிவிக்கப் பட்டுள்ளது. கிழக்கு ஆபிரிக்காவில் வரட்சிக்கும் ஆர்க்டிக் பகுதியில் அதிகமாக உருகும் பனிப் பாறைகளுக்கும் எல் நீனோ தான் காரணமாகக் கூறப்படுகிறது. எல் நீனோவும் உலக வெப்பமாக்கலும் சேர்ந்து இந்த ஆண்டு மீண்டும் மிகவெப்பமான ஆண்டாகவும் மிகமோசமான காலநிலை கொண்டதாகவும் இருக்கப் போகிறதா?

(படங்கள் இணையத்திலிருந்து)

லண்டன் டாக்சி

2006-12-13T17:45:00.000Z

நான் கல்லூரியில் படித்துக் கொண்டிருந்த காலத்தில் ஒரு நாள் டாக்சியில் பயணம் செய்தேன். வழமையாக, அந்நேரத்துக் காலநிலை அல்லது லண்டன் வாகன நெருக்கடி, அதற்கான தனது தீர்வு அல்லது லண்டனின் போக்குவரத்துப் பிரச்சனை, அதற்கான தனது தீர்வு என்று ஏதாவது ஒரு விடயத்தைப் பற்றி ஓட்டுனர் என்னோடு பேசிக்கொண்டு வருவார். இம்முறை நான் எங்கு, என்ன படிக்கிறேன் என்று ஆரம்பித்து, அந்தக் கல்லூரியில் இருக்கும் வேறு என்னென்ன பாடங்கள் கற்றுத் தருகிறார்கள் என்று விரிந்து, இறுதியில் பி.எச்.டி பற்றிய பேச்சில் வந்து நின்றது. அப்போது அந்த ஒட்டுனர் எங்கள் கல்லூரியில் பி.எச்.டி செய்து முடிக்க எத்தனை ஆண்டுகள் தேவை என்று கேட்டார். ஏதோ தெரிந்து கொள்வதற்கு ஆர்வமாகக் கேட்கிறார் என்று நானும் அதைப் பற்றி ஒரு விளக்கத்தைக் கொடுத்தேன்.

பொதுவாக மூன்று அல்லது நான்கு வருடங்கள் எடுக்கும். அதுவும் மிகக் கடுமையாக உழைத்துப் பெற வேண்டும் என்றெல்லாம் அளந்து கொண்டிருந்தேன். அவர் கேட்டார், "லண்டனில் டாக்சி ஓட்டுனராக வர எத்தனை ஆண்டுகள் தேவை என்று நீங்கள் நினைக்கிறீர்கள்?" திடீரென்று இப்படிக் கேட்டால்? சிறிது நேரம் யோசித்து விட்டு இரண்டு வருடங்கள் என்றேன். அவர் சிரித்தார். "குறைந்தது ஐந்து ஆண்டு-களாவது காரை எடுத்துக் கொண்டு ஒவ்வொரு நாளும் லண்டனின் எல்லாப் பகுதிகளுக்கும் ஓடிப் பழகி வரவேண்டும். லண்டனிலுள்ள அத்தனை முகவரிகளும் அத்துப்படி ஆகவேண்டும். அதன் பின்னர், டாக்சி பயிற்சி எடுத்து அநுமதிப் பத்திரம் பெற இன்னும் இரண்டு ஆண்டுகள் ஆகிவிடும்" என்றார்.

உண்மைதான், லண்டனில் நீங்கள் போக வேண்டிய இடம் தெரியவில்லை என்றால் லண்டன் டாக்சி ஓட்டுனர்களிடம் கேட்டால் போதும். உடனே கூறிவிடுவார்கள். லண்டன் வீதிகளின் நெளிவு சுழிவுகள் எல்லாம் அறிந்தவர்கள் இவர்கள். பிறிதொரு சமயம், பேமிங்-ஹாம் போவதற்கு ரயில் எடுக்க வேண்டும் யூஸ்டன் ரயில் நிலையத்திலிருந்து. என்னுடைய மேலாளருக்கும் சேர்த்து முதல் நாளே பயணச்சீட்டுகளை வாங்கி வைத்து விட்டேன். அவரை யூஸ்டன் ரயில் நிலையத்தில் சந்திப்பதாக ஏற்பாடு. நான் தங்கியிருந்த வீட்டிலிருந்து இந்த ரயில் நிலையத்திற்கு பாதாள ரயிலில் போவதென்றால் 45 நிமிடங்கள் தேவை. முதலில் ஒரு ரயிலை எடுத்துப் பின்னர் இன்-னொரு ரயில் எடுத்துப் போய்ச் சேர வேண்டும். காலையில் எழுவதற்குத் தாமதமாகி விட்டது. ரயில் புறப்படுவதற்கு முப்பத்தைந்தே நிமிடங்கள் தான் இருக்கின்றன. இப்போது என்ன செய்வது? டாக்சி எடுப்பதுதான் ஒரே வழி. டாக்சி என்றாலும், அந்த நேரத்துப் போக்குவரத்து நெரிசலில் குறைந்தது 45 நிமிடங்கள் தேவை. வீதிக்கு வந்து ஒரு டாக்சியைப் பிடித்து நிலைமையை விளக்கினேன். முதலில் இது சாத்தியமில்லை என்ற ஓட்டுனர் பிறகு ஒருவாறு ஒப்புக் கொண்டு என்னை ஏற்றிக் கொண்டார். ஏதேதோ குறுக்கு வழிகளால் வண்டியைச் செலுத்தி முப்பதே நிமிடங்களில் அங்கே என்னைக் கொண்டுபோய்ச் சேர்த்தார். இதுதான் இவர்களது சாமர்த்தியம்.

இது ஏன் இப்போது நினைவுக்கு வருகிறது என்றால், சமீபத்தில் நடந்த ஓர் ஆய்வில், பிரிட்டனிலேயே மிகக் கடினமான வேலை லண்டனில் டாக்சி ஓட்டுவது தான் என்று கண்டிருக்கிறார்கள். வட கடலில் எண்-ணெய் துளைத்து எடுப்பதை விடவும் இது கடினமானதாம்! ஆனால் ஒன்று, இங்கு நிறைய மினி-வாடகைக் கார் நிறுவனங்கள் இருக்-கின்றன. இவற்றை அல்ல இந்த ஆய்வு குறிப்பிடுவது. லண்டனுக்கு வந்தால், இந்த மினி-வாடகைக் கார்களை அணுகாதீர்கள். இந்த ஓட்டுனர்களால் எத்தனையோ குற்றச் செயல்கள் நடக்கின்றன. ஒழுங்காகக் கட்டுப்படுத்தப் படுவதில்லையாதலால், அவர்களுக்கு எல்லா இடமும் தெரியாது, இம்மாதிரியான குற்றச் செயல்கள் நடக்கவும் சாத்தியமாகிறது. எனவே லண்டன் டாக்சிகளை வாடகைக்கு அமர்த்தினீர்களானால் ஒரு பிரச்சனையும் வராது. என்ன கொஞ்சம் காசு கூடுதலாக இருக்கும்!

லண்டன் டாக்சிகள் என்கிறபோது, சமீபத்தில் வெளிவந்த இன்னொரு ஆய்வும் நினைவுக்கு வருகிறது. டாக்சியில் மறதியாகப் பயணிகள் விட்டுச் செல்லும் பொருள்கள்! லண்டனில் கடந்த ஆறு மாத காலத்தில் மாத்திரம் 50000க்கும் மேற்பட்ட கைத்தொலைபேசிகள் மறதியாக டாக்சிகளினுள்ளே விட்டுச் செல்லப்பட்டிருக்கின்றன. இந்த வகையில் இரண்டாவது இடத்தில் இருப்பது: மும்பாய். முழு விவரமும் இதோ:

லண்டன் 54872 கைத்தொலைபேசிகள்
மும்பாய் 32970
சிட்னி 6440
வொஷிங்டன் டிசி 6102
பேர்லின் 6100
ஒஸ்லோ 3640
சான் ஃபிரான்ஸிஸ்கோ 2754
மியூனிக் 1485

லண்டன் டாக்சிகளில் மறதியாக விடப்படும் பொருள்களில் முதலிடம் கைத்தொலைபேசிகளுக்கு இருந்தாலும், 4718 கைக்கணினிகள், 3179 மடிக்கணினிகள் ஆகியனவும் விட்டுச் செல்லப் பட்டிருக்கின்றன. இவற்றை விட, முந்தைய வருடங்களில் ஒரு லட்சம் பவுண்டுகள் பெறுமதியான வைரக்கற்கள், பழமை வாய்ந்த தொலை நோக்குக்காட்டி, ஒரு மரக்கால் போன்றவையும் விட்டுச் செல்லப்பட்டிருக்கின்றன. ஒரு தானியங்கித் துப்பாக்கியைக் கூட யாரோ விட்டுச் சென்றிருக்-கிறார்களாம். இதை விட குடிபோதையில் இருந்த யாரோ ஒரு 'குடிமகன்' தனது கேர்ள்பிரண்டையே 'டிப்ஸாக' விட்டுச் செல்ல முயன்றானாம். கணக்கில் அடங்காத குடைகள், பிரீஃப்கேஸ்கள்!

என்ன தான் சொல்லுங்கள், லண்டன் லண்டன் தான். 96 சத வீதமான கைத்தொலைபேசிகளும் 97 சத வீதமான மடிக்கணினிகளும் லண்டன் டாக்சி ஓட்டுனர்களால் திரும்ப ஒப்படைக்கப் பட்டிருக்கின்றன. உலகத்திலேயே மிக அதிக வீதம் இது! திரும்பக் கொடுப்பதிலும் சிக்கல் உண்டு! பயணிகள் ஆசனத்தில் ஒரு பிரீஃப்கேஸை விட்டு விட்டு அவசரமாக ஒருவர் இறங்கிச் சென்றிருக்கிறார். நம்ம உத்தமமான லண்டன் டாக்சி ஓட்டுனரும் அதை எடுத்துக் கொண்டு பின்னாலேயே ஓடிப் போய்க் கொடுத்தாராம். அது தன்னுடையதே அல்ல என்று ஓட்டுனரோடு சண்டை போட்டு விட்டு ஓடி விட்டார் அந்த நபர். அந்தப் பெட்டியில் என்னதான் இருக்கிறதென்று பின்னர் ஆராய்ந்து பார்த்தால், அது முழுவதும் ஆபாசக் குப்பைகளாம்!

கண் செய்யும் மாயம் - படங்கள்

2006-11-07T13:36:00.000Z

நேற்று இங்கே ஒரு மாலைப் பத்திரிகையில் சில விசித்திரமான சித்திரங்கள் கொண்ட டிரக்குகளின் படங்களைப் பார்த்தேன். இணையத்தில் தேடிப் பார்த்தபோது அந்தப் படங்கள் கிடைக்கவில்லை. என்றாலும், வேறு சில படங்களை இணையத்தில் கண்டுபிடித்தேன். அவற்றைக் கீழே தருகிறேன்.

ஐசிசி விருதுகள் 2006 - குறும்பட்டியல்

2006-10-23T16:12:00.000Z

2006ம் ஆண்டிற்கான ஐசிசி விருதுகளுக்காக தெரிவுசெய்யப் பட்டிருக்கும் வீரர்களின் முழுப் பட்டியலைப் பற்றி ஏற்கனவே எழுதியிருக்கிறேன். இப்போது அந்தப் பெரிய பட்டியலிலிருந்து ஒரு குறும்பட்டியலை வெளியிட்டிருக்கிறார்கள். விருதுகள் நவம்பர் 3ம் தேதி வழங்கப் படவிருக்கின்றன.

Player of the Year
Michael Hussey (Australia)
Muttiah Muralitharan (Sri Lanka)
Ricky Ponting (Australia)
Mohammed Yousuf (Pakistan)

Test Player of the Year
Muttiah Muralitharan (Sri Lanka)
Ricky Ponting (Australia)
Shane Warne (Australia)
Mohammed Yousuf (Pakistan)

ODI Player of the Year
Michael Hussey (Australia)
Mahela Jayawardene (Sri Lanka)
Ricky Ponting (Australia)
Yuvraj Singh (India)

Women's Player of the Year
Karen Rolton (Australia)
Anjum Chopra (India)
Katherine Brunt (England)

Emerging Player of the Year
Alistair Cook (England)
Mohammed Asif (Pakistan)
Ian Bell (England)
Monty Panesar (England)

Captain of the Year
Rahul Dravid (India)
Michael Vaughan (England)
Ricky Ponting (Australia)
Mahela Jayawardene (Sri Lanka)

Spirit of Cricket Award
India
England
New Zealand
Sri Lanka

Umpire of the Year
Aleem Dar
Rudi Koertzen
Simon Taufel

சரி. ஐசிசி நவம்பரில் அறிவிக்கும் முன் உங்கள் முடிவைக் கூறுங்களேன்.

மைக்கல் ஷூமக்கர் - படங்கள்

2006-10-23T14:54:00.000Z

நேற்று நடந்து முடிந்த இந்த ஆண்டுக்கான இறுதி F1 கார் ஓட்டப் போட்டியுடன் உலகின் தலைசிறந்த F1 காரோட்டுனரான மைக்கல் ஷூமக்கர் ஓய்வு பெறுகிறார். அவரது F1 வாழ்வின் சில படங்கள் இங்கே.

1991ம் ஆண்டு பெல்ஜியம் பந்தயத்தில் ஜோர்டன் அணிக்காக தனது F1 பயணத்தைத் தொடங்கினார். கார் பழுதடைந்தமையால் முதலாவது சுற்றிலேயே அவரது ஓட்டம் முற்றுப் பெற்றது.

1992ல் பெனெட்டோன் அணிக்குத் தாவி, பெல்ஜியத்தில் ஒரு மழைநாளில் தனது முதலாவது F1 வெற்றியை தழுவினார். அந்த ஆண்டு தொடரில் மூன்றவது இடத்தில் முடித்தார்.

1993ல் அந்த ஆண்டு தொடரில் வெற்றி பெற்ற அலெய்ன் ப்ரொஸ்டையே போர்த்துக்கல் பந்தயத்தில் தோற்கடித்தார்.

1994ல் F1ன் தலைசிறந்த காரோட்டுனரான அயட்டன் சென்னா இத்தாலியில் நடந்த பந்தயத்தில் உயிரிழந்தார். முதல் நான்கு பந்தயங்-களிலும் ஷூமக்கர் தான் வெற்றி.

பெனெட்டோன் கார் வில்லியம்ஸ் காரை விட சற்றே வேகங் குறைவானதாக இருந்த போதிலும் அந்த ஆண்டு முழுவதும் நன்றாக ஓடி எட்டுப் பந்தயங்களில் வென்று ஒரு புள்ளி கூடுதலாகப் பெற்று தொடரில் வெற்றி பெற்றார்.

இறுதிப் போட்டியில் டேமன் ஹில்லின் வில்லியம்ஸ் காரும் ஷூமக்கரின் பெனிட்டோன் காரும் மோதிக் கொண்டன. வேண்டுமென்றே மோதியதாக டேமன் ஹில் குற்றம் சாட்டினார்.

1995ல் எந்த விதமான சந்தேகத்துக்கும் இடமில்லாமல் ஷூமக்கர் தொடரில் வெற்றிவாகை சூடினார்.

1996ல் ஃபெராரி அணிக்குத் தாவி பலரை ஆச்சரியப்பட வைத்தார். 1979க்குப் பிறகு ஃபெராரி அணி F1 தொடரில் வென்றிருக்கவில்லை.

ஃபெராரி காரின் பல பிரதிகூலங்களையும் தனது திறமையால் மறைத்து 1996ல் மூன்று பந்தயங்களில் வெற்றி பெற்று தொடரில் மூன்றாவது இடத்தைப் பிடித்தார்.

1994ம் ஆண்டு போலவே, 1997லும் இறுதிப் பந்தயத்தில் தனது எதிரிக் காரை அடித்து மோதி வெற்றி பெற முயன்றார். அதில் தோல்வியும் தழுவினார். அதில் குற்றவாளியாகக் காணப்பட்டு, அந்த ஆண்டு அவர் பெற்ற அத்தனை புள்ளிகளையும் இரண்டாவது நிலையையும் இழந்தார்.

1998ல் ஆறு பந்தயங்களை வென்றிருந்தும், தொடரில் இரண்டாவதாகவே முடித்தார். வென்றவர் மக்லாரன் காரை ஓட்டிய மிக்க ஹக்கினன்.

1999ல் பிரிட்டிஷ் பந்தயத்தில் தனது காலை உடைத்து இரு பந்தயங்களில் பங்கு பற்றமுடியாமற் போனார். மீண்டும் ஓட வந்தாராயினும், மிக்க ஹக்கினன் தான் மீண்டும் வெற்றி பெற்றார். ஆனால் கார் என்ற வகையில் ஃபெராரி முதலிடத்தைத் தட்டிச் சென்றது.

2000ம் ஆண்டு நடந்த 17 பந்தயங்களில் பத்தில் வென்று மூன்றாவது முறையாக வெற்றிவாகை சூடினார்.

2001லும் தொடரில் வெற்றி பெற்றார்.

2002 தொடரிலும் ஷூமக்கரே வெற்றி பெற்றார். ஆனால், ஆஸ்திரேலியாவில் நடந்த பந்தயத்தில் அவரது சக காரோட்டுனர் ரூபன் பரிக்கலோவை கடைசி முளையில் வைத்து முந்தும்படி ஃபெராரியினர் செய்தனர். இது பலரது விமர்சனங்களுக்கு ஆளானது.

2003 தொடரில் மற்ற ஆண்டுகளைவிட சற்று விறுவிறுப்பாக இருந்த போதிலும் ஷூமக்கரே மீண்டும் வெற்றி பெற்றார்.

2004ல் தனது வாழ்வில் ஏழாவது முறையாக வெற்றி பெற்றார். நடந்த 18 பந்தயங்களில் பதின்மூன்றில் வென்று சாதனை படைத்தார். மொத்தம் 148 புள்ளிகளை அவர் குவித்தார்.

2005ல் ரெனோ காரின் பெர்னாண்டோ அலொசோவிடம் தோற்றார். சில்லுகளின் பாதுகாப்பின்மை காரணமாக ஆறு கார்களைத் தவிர ஏனைய கார்கள் (அலொன்சோவின் கார் உட்பட) பங்குபற்றாத அமெரிக்கப் பந்தயத்தில் மட்டுமே ஷூமக்கர் வெற்றி பெற்றார்.

இந்த ஆண்டில் மேலுமொரு முட்டாள்தனமான வேலையை செய்தார். மொனொகோ பந்தயத்தின் தகுதி பெறும் சுற்றின் முடிவில் ஒரு மூலையில் திடீரென்று காரை நிறுத்தி வத்தார். பின்னால் வந்த எவரும் தமது தகுதிகளை முன்னேற்றிக் கொள்ள முடியாமல் செய்துவிட்டார். இதற்காக அவர் தண்டிக்கப்பட்டு இறுதிக் காராக பந்தயத்தை ஆரம்பித்தார்.

இத்தாலியில் நடைபெற்ற பந்தயத்தில் வெற்றி பெற்றார், இது இவரது 90ஆவது பந்தய வெற்றி. சில பந்தயங்களே வரவிருக்கும் இந்நிலையில் அவர் அளொன்ஸொவை விட 2 புள்ளிகள் மட்டும் குறைவாக இருந்தார்.

ஷூமக்கரும் அலொன்சோவும் சமமான புள்ளிகளைக் கொண்டிருக்கும் போது, கடைசிக்கு முதல் பந்தயமான ஜப்பான் பந்தயத்தில் அவரது காரின் எஞ்சின் பழுதடைந்தது.

அவர் ஓய்வு பெறும் முன் ஓடிய கடைசி பந்தயத்திற்கு முன் பிரேசில் நாட்டின் முன்னாள் கால்பந்து வீரர் பெலே ஷூமக்கருக்கு ஒரு விருதினை வழங்கினார்.

நேற்று நடந்த அந்தப் பந்தயத்தில் சில்லுக் காற்றுப் போய்விட்ட காரணத்தால் இறுதிக்குப் போய்விட்ட ஷூமக்கர், பிரமாதமாக ஓடி நான்காவதாக முடித்தார். அவர் ஐந்தாவது இடத்தில் இருந்து நான்-காவது இடத்திற்கு வருவதற்கு மக்லாரன் கார் ஓட்டும் கிமி ரைக்கனனை முந்தியது நல்ல போட்டியாக இருந்தது. ஆயினும் இந்த ஆண்டுத் தொடரை அலொன்ஸொ 10 புள்ளிகள் வித்தியாசத்தில் வென்றார்.

படங்கள்: பிபிசி

சனிக்கோள் பற்றிய படங்கள்

2006-10-19T13:27:00.000Z

சனிக்கோள் சூரியக் குடும்பத்திலே இரண்டாவது பெரிய கோளாகும். அதற்கு மிக அழகான வளையங்கள் இருப்பதையும் நீங்கள் அறிவீர்கள். இந்த வளையங்கள் கோடானு கோடி துணிக்கைகளை கொண்டிருக்கிறன. கீழே தரப்பட்டிருக்கும் படங்கள் விண்வெளியிலுள்ள ஹப்பிள் தொலைநோக்குக் காட்டி, காஸினி விண்கலம், வொயெஜர் விண்கலம் போன்றவற்றின் துணையுடன் எடுக்கப்பட்டவை. இவை எல்லாமே இணையத்திலிருந்து தேர்ந்தெடுத்துள்ளேன்.

சனிக்கோளைச் சுற்றி சூரியன் நிற்கும் நிலையைப் பொறுத்து சனிக்கோளின் நிழல் வளையங்களில் விழுகிறது.

சனிக்கோளின் வளையங்களின் முக்கிய பகுதிகளைக் காட்டும் படம். ஹப்பிள் தொலை-நோக்குக்காட்டி ஊடாக எடுக்கப்பட்ட படம்.

உண்மையான வண்ணத்தில் சனிக்கோளின் முழு வளையத் தொகுதி: D வளையத்திலிருந்து F வளையம் வரை. படம் எடுத்தது காஸினி விண்கலம்.

சனிக்கோளின் வளையங்களில் காணப்படும் வெப்பநிலை மாறுபாடுகளைக் காட்டும் படமான இது காஸினி விண்கலத்தினால் எடுக்கப் பட்டது. நீலம் மிகக் குளிரான பகுதிகளையும், பச்சை குளிர்ந்த பகுதிகளையும், சிவப்பு சற்று வெப்பமான பகுதிகளையும் காட்டுகின்றன. இவற்றில் B வளையம்தான் மிகக் குளிர்மையானது.

D வளையத்தைக் காட்டும் இப்படத்தை எடுத்தது, வொயேஜர்-2 விண்கலம்.

காஸினி விண்கலம் எடுத்த C வளையத்தைக் காட்டும் படம்.

வொயேஜர்-2 எடுத்த வண்ணமூட்டப்பட்ட படமான இதில், நீல வண்ணம் C வளையத்தையும், மஞ்சள் வண்ணம் B வளையத்தையும் காட்டுகின்றன.

டிஸ்னியின் சத்தற்ற உணவு ஒழிப்பு!

2006-10-17T23:07:00.000Z

மேற்கு நாடுகளில் பிள்ளைகளது உடல் பருமன் கூடிகொண்டே செல்வது பலருக்கு கவலையை அளிக்கும் விடயமாகி வருகிறது. பிள்ளைகளுக்கான டிவி விளம்பரங்களை தடைசெய்யுமாறு ஆங்கிலிகன் சர்ச்சின் தலைமை பேராயர் கோரிக்கை விடுத்திருந்தார். அண்மையில் பிரிட்டனின் அமைச்சர்களும் பிள்ளைகளின் உடல் பருமன் கூடுவதைக் கட்டுப்படுத்துவதற்கான வழிவகைகளை ஆராய்ந்து வருகிறார்கள். ஏற்கனவே பிபிசி பிள்ளைகளுக்கான தனது நிகழ்ச்சி-களில் வரும் கதாபாத்திரங்களை சத்தற்ற உணவுகளை விற்பதற்குப் பயன்படுத்தக் கூடாதென தடை விதித்து விட்டது.

இந்த நிலையில், சத்தற்ற உணவுடனான சகல தொடர்புகளையும் துண்டித்துக் கொள்வதாக டிஸ்னி அறிவித்துள்ளது. தமது டிஸ்னி உலகம் மற்றும் பாரிஸிலுள்ள டிஸ்னிலாண்ட் ஆகியவற்றில் சத்தற்ற உணவுவகைகள் எதிர்காலத்தில் விற்பனை செய்யப்பட மாட்டா. அதற்குப் பதிலாக காய்கறிகளும் பழரசமும் விற்கப்படுமாம். டிஸ்னி படத்தில் அல்லது காட்டூனில் வரும் கதாபாத்திரங்களும் உப்புக்கூடுதலாகக் கொண்டிருக்கும் நொறுக்குத்தீனிகளதும் இனிப்புக் குடிபானங்களதும் விற்பனையைக் கூட்டுவதற்குப் பயன்படுத்தப் பட மாட்டா. அப்படியாயின் இனிமேல் வின்னி த பூ பிஸ்கெட் என்றோ, இன்கெரிடிபிள்ஸ் டாட்ஸ் என்றோ பொருள்களை விற்பனை செய்யமுடியாது. தங்களிடம் வாங்கினால் டிஸ்னி கதாபாத்திரங்களின் வடிவங்கொண்ட பொம்மைகள் இலவசம் என்று விளம்பரம் செய்ய முடியாது. மக்டொனால்டும் ஹப்பி மீல்ஸ் என்று தங்கள் உணவு வைத்துத் தரும் பெட்டியில் டிஸ்னியின் படங்களெதுவும் போட முடியாது. மக்டொனால்டுடனான தனது 100 கோடி டாலர்கள் பெறுமதியான எட்டு வருடகால ஒப்பந்தத்தை முடிவுக்குக் கொண்டுவருகிறது டிஸ்னி நிறுவனம்.

இந்தப் புதிய அணுகுமுறை சிறிது சிறிதாக அடுத்த 18 மாதங்களுக்குள் ஒவ்வொரு ஒப்பந்தமும் முடியும்போது அமுலுக்குவரும். சரி. இவர்கள் எப்படி சத்துள்ள உணவா அல்லது சத்தற்ற உணவா என்று பார்க்கப் போகிறார்கள்? 30%க்கு மேல் கொழுப்பு இருந்தால், 10%க்கு மேல் முதிர்ந்த கொழுப்பு இருந்தால், 10%க்கு மேல் சேர்க்கப்பட்ட சர்க்கரை இருந்தால் அதை சத்தற்ற உணவாகக் கருதுவார்கள்.

டிஸ்னியின் படங்களிலும் டிவி நிகழ்ச்சிகளிலும் கதைக்குள்ளேயே சத்தான உணவு பற்றியும் உடல் பயிற்சி பற்றியும் சேர்த்துவிடவும் திட்டமிட்டு இருக்கிறார்கள்.

எப்படியோ பிள்ளைகளை சத்தற்ற உணவுவகைகளை வாங்கத் தூண்டும் உபாயங்களில் முக்கியமான ஒன்று இல்லாமல் போகப் போகிறது. அந்த வகையில் இது எல்லாப் பெற்றோர்களாலும் வரவேற்கப் படவேண்டிய நல்ல செயல்.

(படங்கள்: இணையத்திலிருந்து)

குழந்தைகளின் மனதுக்குள்ளே....

2006-10-12T22:13:00.000Z

குழந்தையின் மூளையானது பல ரகசியங்களை உள்ளடக்கியது. அதன் விந்தைகளை விஞ்ஞானிகள் இப்போதுதான் கொஞ்சம் கொஞ்சமாக அறிந்து வருகிறார்கள். கருவறையில் தொடங்குகிறது இதன் கதை. கரு உண்டாகி நான்கே வாரங்களில் முதலாவது மூளை உயிரணுக்கள் - நியூரோன்கள் - உருவாகின்றன. என்ன வேகத்தில்? நிமிடத்துக்கு 2 லட்சத்து 50 ஆயிரம் உயிரணுக்கள் என்ற ரீதியில்! கோடிக் கணக்கில் நியூரோன்கள் தோன்றி கோடான கோடி தொடுப்புகளை ஒன்றுடன் ஒன்று உண்டாக்குகின்றன. இவையெல்லாம் மிகக் கவனமாக ஏற்-படுத்தப் பட்டவை. தான்தோன்றித் தனமாக அல்ல.

குழந்தைகள் பிறந்தவுடன் அவர்களின் மூளை ஏறத்தாழ "வெறுமையானது". அதாவது எதனையுமே கற்றுக் கொள்வதற்கு அது தயாராக இருக்கும். அவர்கள் வளர வளர கண்களால் காணும் எதுவும், காதுகளால் கேட்கின்ற எதுவும், தொடுகையினால் உணரும் எதுவும், நாக்கினாலே ருசிக்கின்ற எதுவும் அவர்களது 'புதிய' மூளையில் பதிகின்றன. எங்களுக்கு சாதாரணமாகத் தோன்றும் நடப்புகள் எல்லாம் அவர்கள் புதியதாகக் கற்றுக் கொள்வதாக இருக்கும். இவை அவர்களது மூளையில் மாற்றங்களை ஏற்படுத்துகின்றன. நியூரோன்களின் கோர்-வைகளிலே தாங்கள் புரிந்து கொண்டவற்றைச் சேமிக்கிறார்கள்.

குழந்தையின் மூளை கற்றுக் கொளவதற்கு வசதியான ஓர் எந்திரம்! குறுகிய காலத்தில் அவள் என்ன எல்லாம் கற்றுக் கொள்கிறாள்? தவழுவதற்கு, நடப்பதற்கு, ஓடுவதற்கு, ஆராய்ந்து திரிவதற்கு என்று எல்லாவற்றையும் கற்றுக் கொள்ள வேண்டும். இதற்குப் பின்னர் மனிதருக்கென்றே உரிய சிறப்புத் தன்மையான மொழியைக் கற்க வேண்டும். கல்வி நீண்டு கொண்டே போகும். வாழ்நாள் முழுவதும்.

ஆரம்ப கால மன வளர்ச்சி நாம் எவ்வளவுக்கு குழந்தையுடன் கொஞ்சி கட்டிப்பிடித்து விளையாடுகிறோமோ அந்த அளவுக்கு நல்ல மன வளர்ச்சி இருக்கும். இந்த அவசர உலகில் எத்தனை அவசரமான வேலைகள் இருந்தாலும் குழந்தைக்கென நீண்ட நேரத்தை ஒதுக்க வேண்டியது முக்கியம். அவர்கள் தரத்துக்கு நாம் இறங்கிவந்து விளையாட வேண்டும். மேற்கொண்டு குழந்தையின் மன வளர்ச்சி எப்படி நடைபெறுகிறது?

பெற்றோர்கள் தங்கள் 8-10 மாதக் குழந்தையை அவளது ஆசனத்தில் இருத்திவிட்டு, சமையலறையில் அடுத்த நேரத்திற்கான உணவைத் தயார் செய்கிறார்கள் என்று வைத்துக் கொள்வோம். குழந்தை இவர்கள் செய்யும் ஒவ்வொன்றையும் கவனமாக அவதானிப்பாள். இருவரும் வேகமாக ஓர் இடத்திலிருந்து இன்னோர் இடத்துக்குப் போகிறார்கள். எதை எதையோ எடுக்கிறார்கள். பிறகு அவற்றை வேறு எங்கோ வைக்கிறார்கள். இதையெல்லாம் செய்யும் போது, இருவரும் ஏதோ ஒருவருக்கு ஒருவர் கூறிக் கொள்கிறார்கள். இவ்வளவு சிக்கலான நடப்புகளையும் குழந்தைகள் மிக அவதானமாக தங்கள் மனதுக்குள்ளே வாங்கிக் கொள்கின்றன. அவர்கள் மேலும் வளர்ந்து வர, இவை எவ்வளவு சிக்கலானதாக இருந்தாலும் அவற்றின் தொடர்ச்சியையும் மொழியையும் எவ்வாறோ குழந்தைகள் புரிந்து கொள்ள ஆரம்பிக்கிறார்கள். ஒவ்வொரு பொருளுக்கும் அதைக் குறிப்பிடும் சொல்லுக்கும் இடையே சரியாகத் தொடர்புகளை ஏற்படுத்திக் கொள்வர். அதே போல ஒவ்வொரு செயலுக்கும் அதைக் குறிப்பிடும் சொல்லுக்கும் இடையே சரியாகத் தொடர்புகளை ஏற்படுத்திக் கொள்வர். ஆயிரமாயிரம் பொருள்களுக்கும் ஆயிரமாயிரம் செயல்-களுக்கும் அவர்கள் இவ்வாறான தொடர்புகளை மனதில் உண்டாக்குவார்கள்.

அவர்கள் 12-18 மாத வயதை எய்தும் போது, கண்ணோக்கு, திசை, புறமொழி, சைகைகள், உணர்ச்சிகள், மனநெகிழ்ச்சி போன்றவற்றையும் துல்லியமாகத் தெரிந்து கொள்ளக் கூடிய ஆற்றலைக் கொண்டி-ருப்பார்கள். அச்சமயத்தில் அவர்கள் நாம் பார்க்கின்ற திசையைப் புரிந்து கொண்டு அதை நோக்கிப் பார்ப்பார்கள். அந்தத் திசையில், அதாவது நாம் நோக்குகின்ற திசையில், காணும் பொருளை அந்நேரத்தில் நாம் சொல்லும் வார்த்தையுடன் பொருத்தி மனதில் இருத்திக் கொள்வார்கள். அதே வேளையில் நாம் வெளிப்படுத்தும் சந்தேகங்களையும் அவர்கள் புரிந்து கொள்வார்கள். எடுத்துக் காட்டாக, ஏதோ ஒரு புத்தகத்தைக் குழந்தையுடன் சேர்ந்து படிக்கும்போது, அங்கு படத்தில் இருக்கும் ஒரு மிருகத்தைக் காட்டி அதன் பெயரென்ன என்று அவள் கேட்கும்போது நாம் ஒரு பெயரைச் சொல்லி ஆனால் அது சரியானதா தெரியவில்லை என்று ஒரு சந்தேகத்தையும் சேர்த்துக் கொண்டால் அவள் அந்தச் சொல்லை அந்த மிருகத்துடன் தொடர்பு படுத்தாமல் இலகுவாக மறந்து விடுவாள்.

இவ்வயதுக் குழந்தைகள் எந்தச் சிக்கலான செயலையும் சிறு சிறு செயல்களாகப் புரிந்து கொள்ளக் கூடியவர்களாகவும் இருப்பார்கள். இவர்களுடன் விளையாடும்போது சில பொருள்களை எடுத்து ஒரு விளையாட்டு வண்டியில் வைத்து இழுத்துக் கொண்டு போய் இன்னொரு இடத்தில் அவற்றை வைக்கிறோம் என்று வைத்துக் கொள்வோம். பொருள்களை ஒர் இடத்திலிருந்து இன்னோர் இடத்-திற்குக் கொண்டு போதல் என்ற இந்தச் செயலைக் குழந்தைகள் மிகச் சரியாக சிறிய செயல்களாக அறிந்து கொள்கிறார்கள். இதைக் கவனிக்கும் குழந்தையும் அதே போல ஒவ்வொரு பொருளாக எடுத்து வைத்து நாம் செய்ததை அப்படியே செய்து காட்டும் திறமை வந்துவிடும்.

பிள்ளைகளின் மூளை முதல் மூன்று ஆண்டுகளுக்கு வேகமாக வளர்கிறது. இந்தக் காலகட்டத்தில் பல கோடி தொடுப்புகள் மூளைக்குள் ஏற்படுத்தப் படுகின்றன. இந்தத் தொடுப்புகளே எதிர்காலத்தில் அவர்கள் கற்கும் திறனையும், உணர்ச்சிகளையும், நடத்தையையும் நிர்ண-யிக்கின்றன. குழந்தைகளின் மூளை உயிரணுக்களின் வளர்ச்சி அவர்கள் வளரும் சூழலையும் அனுபவங்களையும் பொறுத்து இருக்கும். பெற்றோர்களாகிய நாம் அவர்களுக்கு நல்ல அனுபவங்களை வழங்க வேண்டும்.

(படங்கள்: இணையத்திலிருந்து)

ஜோர்ஜ் புஷ் - ஏமாற்றுப் படங்கள்

2006-10-11T21:05:00.000Z

Alison Jackson பிரிட்டனைச் சேர்ந்த ஒரு கலைஞி. பல ஏமாற்றுப் படங்களை அவர் உருவாகியிருக்கிறார். அவருடைய திறமைக்குக் கீழே உள்ள படங்கள் சமர்ப்பணம்.

டோனி பிளையரின் சிறப்பு உறவு

டோனி பிளையருடன்

கொண்டலீசா ரைஸுடன்

குர்-ஆன் படிக்கிறார்!

ஈரான் யுத்தம் பற்றி பவலுடன் ஆலோசனை

அராபியரிடம் துப்பாக்கி வியாபாரம்

Belly ஆட்டம்

நன்றி: http://www.saulgallery.com/chronicle/jackson_election.html

இயற்கைச்சூழல் "கடன்"

2006-10-10T14:23:00.000Z

நாம் வாழும் ஒவ்வொரு நாளும் இந்தப் பூமியிலிருந்து மூலவளங்களைப் பயன்படுத்துகிறோம். இங்கு பூமி என்ற பதம் எல்லா இயற்கை வளங்களையும் குறிக்கிறது.பூமியும் அவ்வாறு எடுக்கப்படும் மூலவளங்களை மீள உருவாக்கவோ அல்லது நாம் பயன்படுத்தும் வேகத்தில் அதைத் தருவதற்கோ முயலும். எமது கழிவுப் பொருள் களையும் தன்னுளே ஏற்றுக் கொள்கிறது. ஆனால் எமது தேவைகள் அதிகரிக்க, எமது கழிவுப் பொருள்கள் அதிகரிக்க பூமியின் இந்த இயல்பு ஒரு கட்டத்தில் இயலாமல் போய்விடும். அதாவது மூலவளங்களை மீட்டெடுக்க முடியாது. போடப்படும் கழிவுப் பொருள்களும் உள்ளெடுக்கப் படமாட்டா.

ஒரு மனிதத்தொகைக்குத் தேவையான மூலவளங்களை உற்பத்தி செய்வதற்கும் வெளியாகும் கழிவுப் பொருள்களை உள்ளெடுப்பதற்கும் தேவைப்படும் நிலம், நீர் ஆகியவற்றை அளப்பதன்மூலம் இயற்கைச் சூழலின் காலடிகளை நாம் மதிப்பிடலாம். இவ்வாறு Global Footprint Network (http://www.footprintnetwork.org/) என்ற நிறுவனம் இந்தக் கணிப்புகளைச் செய்துள்ளது. இதன்படி "கடன்" நாள் என்று ஒன்றைக் குறிப்பிடுகிறார்கள். அதாவது ஓர் ஆண்டு முழுவதும் பூமியின் மூல வளங்களை அளவாகப் பயன்படுத்தியிருந்தால் "கடன்" நாள் என்று ஒன்று இருக்காது. ஆனால், மூலவளங்களை பூமி மீள உற்பத்தி செய்யும் ஆற்றலை விட வேகமாக இவற்றை நாம் பயன்படுத்தினால் "கடன்" நாள் என்று ஒன்று வரும். உதாரணமாக, இந்த "கடன்" நாள் டிசெம்பர் 19 என்றால், இந்தத் தேதிக்குப் பின்னர் நாம் பயன்படுத்தும் மூல வளங்கள் எல்லாம் பூமியிலிருந்து சுரண்டுவதாகிறது. 1987ல் இருந்து ஒவ்வொரு ஆண்டும் எந்த நாள் இது என்று கீழே பாருங்கள்:

1987 - டிசெம்பர் 19
1990 - டிசெம்பர் 7
1995 - நவம்பர் 21
2000 - நவம்பர் 1
2005 - அக்டோபர் 11
2006 - அக்டோபர் 9

1961ம் ஆண்டில் பூமி தரக் கூடிய மூலவளங்களில் 80% மட்டுமே பயன்படுத்தியிருக்கிறோம். 2002ல் தேவைகள் 120% ஆக அதிகரித்தது.

இப்போது 2006ல் ஏறத்தாழ 150% ஆகிவிட்டது. அமெரிக்காவுக்கு பூமி தரக் கூடிய அளவில் 5.3 மடங்கு கூடுதலாகத் தேவைப்படுகிறது. பிரிட்டனுக்கு 3.1 மடங்கு தேவைப்படுகிறது. இந்தியாவுக்கு 0.4 மடங்குதான் தேவைப்படுகிறது.

ஒவ்வொரு பிரதேசங்களுக்கும் எவ்வளவு மூல வளங்கள் தேவைப்படுகின்றன என்று பார்த்தால், வட அமெரிக்கா ஆபிரிக்கா-வுக்குத் தேவையானதை விட 9 மடங்கு கூடுதலாகப் பயன்படுத்துகிறது.

சரி. இதை இன்னும் கொஞ்சம் வித்தியாசமாகப் பார்ப்போம். எந்த எந்த நாடுகள் தங்களிடமுள்ள மூலவளங்களுக்குள் தமது தேவைகளை வைத்திருக்கிறார்கள் (பச்சை), எந்த எந்த நாடுகள் தங்கள் மூலவளங்-களுக்கும் மேலாகப் பயன்படுத்துகிறார்கள் (சிவப்பு) என்று பார்த்தால், வளர்ந்த நாடுகளுக்கும் ஏழை நாடுகளுக்கும் இடையேயுள்ள மாபெரும் வேறுபாடு தெரிய வருகிறது.

ஆகவே, இந்த ஆய்விலிருந்து இரண்டு விடயங்கள் தெரிய வருகின்றன. முதலாவது, போதுமானளவு நிலம், நீர் உணவு என்பன இல்லாத லட்சக்கணக்கான மக்களுக்கு அவர்கள் தேவைகளைப் பூர்த்தி செய்தல் மறுக்கப் படுகின்றது. இரண்டாவது, இந்த வேகத்தில் பூமியின் மூலவளங்களை நாம் பயன்படுத்துதல் பூமியின் உயிர்காக்கும் தன்மைகளை ஆபத்தில் கொண்டு போய்விடுகிறது.

புறாக்களுக்கு எதிராக ஒரு போர்

2006-10-08T22:46:00.000Z

நான் பல்கலைக் கழகத்தில் படித்துக் கொண்டு இருந்த காலத்தில் ஒரு சீனத்து நண்பி லண்டனில் சுற்றிப் பார்க்கக் கூடிய இடங்களைப் பற்றிக் கேட்டாள். அவள் லண்டன் வந்து ஓரிரு மாதங்கள் தான் இருக்கும். நான் எனக்குத் தெரிந்தவரை ஒரு பட்டியலை அடுக்கிக் கொண்டு போனேன். பாராளுமன்றக் கட்டிடம், பிக் பென், டவர் பாலம், ட்ரஃபால்கர் சதுக்கம், பக்கிங்ஹாம் மாளிகை, மாபிள் ஆச், மொனுமென்ட், ஹைட் பூங்கா.... பட்டியல் நீண்டு கொண்டே போனது. கவனமாகக் கேட்டுக் கொண்டு வந்தவள் நான் சொன்னதில் திருப்தி அடையாமல், "புறாச் சதுக்கத்தைக் குறிப்பிட வில்லையே? அது எங்கே இருக்கிறது?" என்றாள். அப்படியொரு சதுக்கமே லண்டனில் கிடையாது. அவளோ லண்டனுக்கு வந்து விட்டுச் சீனாவுக்குத் திரும்புவோரெல்லாம் புறாச் சதுக்கத்தின் பெருமைகளைப் பேசுவார்கள் என்றும் லண்டனுக்குப் போனால் அதை தவறாமல் பார்க்க வேண்டுமென்று அவர்கள் கூறினார்கள் என்றும் சொன்னாள். சற்று நேரம் யோசித்தேன். ட்ரஃபால்கர் சதுக்கத்தில் புறாக்கள் பல உண்டு. இந்தச் சதுக்கமாகத்தான் இருக்குமென்று அவளிடம் கூறினேன். அவளுக்குத் திருப்தி ஏற்பட வில்லையாயினும் போய்விட்டாள். சில நிமிடங்களில் திரும்பி வந்த-வளின் முகத்தில் ஆனந்தம் தாங்கவில்லை. "அதேதான். அதேதான். ட்ரஃபால்கர் சதுக்கம் தான்" என்றாள்.

இது நடந்து பல ஆண்டுகள் ஆகி விட்டன. ஆனால் இந்த ட்ரஃபால்கர் சதுக்கமும் புறாக்களும் இணை பிரியாது இருக்கின்றன. ஊரிலே சென்ற இடமெல்லாம் காகங்கள் இருப்பது போல, லண்டனில் எல்லா இடமும் புறாக்களின் அட்டகாசம் தாங்க முடியாது. ரயில் நிலையங்கள், பாதாள ரயில் நிலையங்கள் என்று எல்லா இடங்களிலும் இவற்றின் தொல்லைதான். கென் லிவிங்ஸ்டன் லண்டனின் மேயராகப் பதவி யேற்ற பிறகு 2003ல் புறாக்களுக்கு எதிராகப் போர் தொடுத்தார். எதற்காக? புறாக்கள் வருவோருக்குத் தொந்தரவானவை, உடல் நலத்திற்குத் தீங்கானவை. இவைதான் அவர் கூறும் காரணங்கள்.

முதலாவதாக, உல்லாசப் பயணிகளும் லண்டன்வாசிகளும் (முக்கிய-மாக லண்டன் வயோதிபரும்) புறாக்களுக்கு ட்ரஃபால்கர் சதுக்கத்தில் தீனி போடுவதைத் தடை செய்தார். இதையடுத்து, புறாக்களுக்கான உணவுகளை உல்லாசப் பயணிகளுக்கு விற்பனை செய்யும் பெட்டிக் கடைகளுக்கு மூடு விழா செய்தார். ஆனால், புறாக்களைப் பட்டினி போட்டதாக மிருகநல தாபனங்கள் பொங்கியெழும் என்பதால், ஒவ்வொரு நாளும் காலை 7.30 மணிக்கு 25 கிலோ தானியங்களை புறாக்களுக்கு உணவாக அளிக்க ஏற்பாடு செய்தார். ஊஹும். மேயர் தரும் தீனி போதுமோ என்னவோ புறாக்கள் அசைந்த பாடில்லை. ஏறத்தாழ 4000 புறாக்கள் ட்ரஃபால்கர் சதுக்கத்தில் மகிழ்ச்சியாக குடித்தனம் நடத்தி வந்தன. மேயர் அடுத்த ஆயுதத்தை ஏவினார். பருந்துகள் சிலவற்றை வாங்கி வந்து ட்ரஃபால்கர் சதுக்கத்தில் குடியேற்றினார். இந்தப் பருந்துகளைப் பார்த்தாவது புறாக்கள் பயந்-தோடட்டும் என்பது அவர் எண்ணம்.

இந்த இரண்டாவது உபாயம் ஓரளவுக்கு வெற்றியளித்தது. ஏறத்தாழ 250 புறாக்களை இப் பருந்துகள் வேட்டையாடி உண்டுமகிழ்ந்தன. 2500க்கும் மேற்பட்ட புறாக்கள் உயிர் பிழைத்தால் போதும் என்று தங்கள் பரம்பரைச் சொத்தை வேண்டாமென்று உதறித் தள்ளிவிட்டு எங்கோ ஓடிப் போய் விட்டன. ஆனாலும் சுமார் ஆயிரத்திற்கும் மேற்பட்ட புறாக்கள் இன்னும் ட்ரஃபால்கர் சதுக்கத்தில் உயிரைக் கையில் பிடித்துக் கொண்டு இருக்கின்றன. என்ன செய்தும் அசைகிறபாடில்லை.

சரி இத்தனை செய்தாகி விட்டதே, இதற்கு எவ்வளவு செலவாயிற்று? இரண்டு லட்சத்து ஐம்பதினாயிரம் பவுண்டுகள்! எல்லாம் லண்டன் வாழ் மக்கள் கட்டிய வரிப்பணத்திலிருந்துதான்.

(படங்கள்: இணையத்திலிருந்து)

முஸ்லீம் பெண்கள் பர்தா அணியவேண்டுமா?

2006-10-06T22:01:00.000Z

முஸ்லீம் பெண்கள் பர்தா அணியக் கூடாதென பிரிட்டனின் அமைச்சர்களில் ஒருவரான ஜாக் ஸ்ட்ரோ கூறியுள்ளது இங்கு பலத்த சலசலப்பை உண்டு பண்ணியுள்ளது. வேறு பல மதத்தினரும் இனத்-தவரும் பல்வேறு சின்னங்களையும் உடைகளையும் அணிந்திருக்கும் போது, இவர் முஸ்லீம் பெண்களை மட்டும் இலக்காக வைத்துக் கூறியுள்ளதற்கு பல முஸ்லிம் தாபனங்கள் பலத்த கண்டனம் தெரிவித்துள்ளன.

இது இப்படி இருக்க, என்னுடன் பணியாற்றும் சூடானைச் சேர்ந்த ஒரு முஸ்லீம் நணபரிடம் இது பற்றிக் கேட்டேன். முகம்மது நபிகளுடைய காலத்திற்கு முன்பிருந்தே அரேபிய நாட்டில் பர்தா அணியும் வழக்கம் இருந்து வந்ததென்றும், இந்த வழக்கம் ஒரு கலாச்சார முறையே தவிர ஒரு முஸ்லீம் பழக்கமல்ல என்று அவர் கூறினார். ஆகவே, முஸ்லீம் பெண்கள் பர்தா அணியவேண்டியது கட்டாயமில்லை என்றார். இது சரியா? அப்படியானால் அரபுக்கள் அல்லாத முஸ்லீம்கள் பர்தா அணிவது ஏன்?

காய்ச்சலிலிருந்து உடனடி நிவாரணம்!

2006-10-04T23:22:00.000Z

காய்ச்சலுக்கு எதிரான உடனடிப் பாதுகாப்பு மற்றும் உடனடி நிவாரணம் பெறுவதற்கான வழிவகை ஒன்றை விஞ்ஞானிகள் கண்டுபிடித்து விட்டதாகக் கூறுகிறார்கள். மிருகங்களில் பலதரப்பட்ட காய்ச்சல் வைரஸுக்கு எதிராக இதைப் பயன்படுத்திப் பார்த்த போது நூற்றுக்கு நூறு சத வீதம் வெற்றி கிடைத்தது என்கிறார்கள் இந்த வழியை உருவாக்கிய விஞ்ஞானிகள். சரி இதெப்படி சாத்தியமாகிறது?

சாதாரணமாக ஒரு வைரஸுக்கு எதிராகப் பாதுகாப்பு வேண்டுமாயின், அந்த வைரஸைப் பிடித்து கோழி முட்டைக்குள் பாய்ச்சுவார்கள். அந்த முட்டையில் வளரும் வைரஸை எடுத்து இன்னொரு முட்டைக்குள் பாய்ச்சுவார்கள். இப்படியே ஒவ்வொரு முட்டையிலும் வளரும் வைரஸை அடுத்த முட்டையில் பாய்ச்சுவார்கள். இவ்வாறு பல நூறு முட்டைகளுக்குள் போய் வந்த பிறகு அந்த வைரஸ் கோழியை மட்டும் தாக்குவதாகவும் மனிதர்களைத் தாக்க இயலாததும் ஆகிவிடும். ஆனால் அதன் புறத் தோற்றத்தில் மாற்றம் ஏதும் இருக்காது. இந்தத் தாக்க முடியாத வைரஸை மனிதருக்குள் பாய்ச்சும் போது, மனிதருக்கு ஒரு தீங்கும் செய்யாது; ஆனால் அதை அழிப்பதற்கு உடலில் இயற்கையாகத் தோன்றும் பிறபொருள் எதிரியைத் தோற்றுவிக்கும். இந்தப் பிறபொருள் எதிரி இதே புறத் தோற்றம் கொண்ட வைரஸ்களைத் தாக்கி அழிக்கும். எனவே, எந்த வைரஸுக்கு எதிராகப் பாதுகாப்புத் தேவைப் பட்டதோ அந்த வைரஸ் உடலில் புகும் போது இந்த பிறபொருள் எதிரி அதனைத் தாக்கி அழித்து விடும். இந்தக் காய்ச்சல் வைரஸ்களின் புறத் தோற்றம் மாறுபடுவதாலும், இந்தப் புறத் தோற்றம் அவ்வப் போது மாறுவதாலும் எல்லா வகைக் காய்ச்சல் வைரஸ்களுக்குமென ஒரு குறிப்பிட்ட தடுப்பூசியைத் தயாரிக்க முடியாது. இதுதான் இப்போதைய நிலவரம்.

சரி அப்படியாயின், இப்போது இந்த புதிய வழி முறை எப்படி இதைச் சாதிக்கிறது? இங்கு தான் உயிர் மூலக்கூறுகள் கை கொடுக்கின்றன. மனிதருக்கு இருக்கும் DNA போல வைரஸ்களுக்கு இருப்பவை RNA மூலக்கூறுகள். இந்த RNA மூலக் கூறுகள் தாமாகவே பிரிவடைந்து இனப் பெருக்கம் செய்ய மாட்டா. எனவே தான் வைரஸ்கள் உடலுக்குள் புகுந்து உயிரணுக்களுக்குள்ளே (cells) சென்று அந்த உயிரணுக்-களுக்குள்ளே இருக்கின்ற DNAஐப் பயன் படுத்தி தங்களின் இனவிருத்தியைச் சாதிக்கின்றன. புதிய வழிமுறை வைரஸின் புறத் தோற்றத்தில் தங்கி இருக்கவில்லை. மாறாக வைரஸின் உள்ளே இக்கின்ற RNAஐக் கொண்டு இது தொழில்படுகிறது.

ஒரு காய்ச்சல் வைரஸை எடுத்து அதனுடைய சில RNA பகுதிகளை நீக்கி விடுகிறார்கள். பின்னர், இவை உடலுக்குள் பாய்ச்சப் படுகிறன. உடலினுள் செல்லும் இந்த வைரஸ், உயிரணுக் களுக்குள் சென்று வாழும். ஆனால், தம்மைத் தாமே பெருக்குக் கொள்ளமாட்டா; ஏனெனில், அவற்றிலிருந்து சில RNAக்கள் ஏற்கனவே நீக்கப் பட்டு விட்டன. நோயைத் தோற்றுவிக்கும் ஒரு வைரஸ் இந்த உயிரணு-வுக்குள் வரும் போது இந்த வைரஸின் RNAஐக் கொண்டு முதலில் நாம் அனுப்பிய RNA குறைந்த வைரஸ் தன்னைதானே பெருக்குக் கொள்ளத் தொடங்கும். இதனது வேகம் நோயைத் தோற்றுவிக்கும் வைரஸை விட அதிகமாக இருப்பதால், இந்த பாதகமில்லா வைரஸ்கள் அந்த உயிரணு முழுவதும் நிறைந்து நோய் தரும் வைரஸ் பெருகுவதைத் தடுக்கின்றன!

எல்லாம் சரி. இதை எப்படி உடம்புக்குள் செலுத்துவது? இதில் கவனிக்க வேண்டியது என்னவெனில், தடுப்பூசி முறையில் உடலின் நோய் எதிர்ப்புத் தன்மையில் நாம் தங்கி இருக்கிறோம். எனவே அந்த நோய் எதிர்ப்புத் தன்மை வந்து விட்டால், அது ஏறத்தாழ வாழ் நாள் முழுவதும் பயனளிக்கும். ஆனால், இந்தப் புதிய வைரஸ் முறையில் நாம் ஒரு வைரஸில் முழுமையாகத் தங்கி இருக்கிறோம். அப்படியாயின், வைரஸின் வாழ் நாள் வரைக்கும் தான் எங்களுக்குப் பாதுகாப்புக் கிடைக்கும். ஏறத்தாழ ஒரு ஆறு வாரங்கள். அப்படியானால், வைரஸை உடலினுள் செலுத்த சிறந்த வழி என்ன? Nasal spray! இதை மூக்கினுள் செலுத்தினால் ஆறு வாரங்களுக்கு எங்களுக்குப் பாதுகாப்புக் கிடைக்கும். சரி. காய்ச்சல் வந்து விட்டது என்ன செய்வது? அறிகுறிகள் ஆரம்பித்த 24 மணிநேரத்திற்குள் இதைப் பயன்படுத்தினால் போதும். பலன் கிடைக்கும்.

"அட்டா! நல்ல மருந்தாயிற்றே! எங்கே இது கிடைக்கும்?" என்கிறீர்களா? இது இப்போது இங்கிலாந்திலுள்ள வொரிக் பல்கலைக் கழகத்தின் ஆய்வுகூடத்தில் மிருகங்களில் பயன் படுத்திப் பார்த்திருக்கிறார்கள். இதை இனி nasal spray வடிவில் உற்பத்தி செய்து, பின்னர் மனிதரிடையே சோதனைகளுக்கு விட்டு அதன் பின்னர்தான் புழக்கத்துக்கு வரும். இதற்கு இன்னும் 5-10 ஆண்டுகள் ஆகலாம். காத்திருப்போம்.

சூரியனின் பின்னணியில் ஒரு படம்!

2006-10-03T11:45:00.000Z

இந்தப் படம் சர்வதேச விண்வெளி நிலையமும் விண்வெளி ஓடம் அட்லண்டிஸும் செப்டெம்பர் 17ம் தேதியன்று 13:38:50 GMT மணிக்கு சூரியன் மேல் செல்லும் போது பிரான்ஸின் நோமண்டி பகுதியிலிருந்து எடுக்கப் பட்டது. பூமிக்கு வருவதற்காக விண்வெளி ஓடம் விண்வெளி நிலையத்திலிருந்து பிரிந்து 50 நிமிடங்களில் இந்தப் படம் எடுக்கப் பட்டது. இதன் பின்னணியாக சூரியன் அமைந்துள்ளது. படத்தை எடுத்தவரின் பெயர்: Thierry Legault என்ற பிரெஞ்சுக் காரர். 5000 பவுண்டுகள் மதிப்புள்ள தொலைநோக்கி ஒன்று, சூரியனின் ஒளித் தாக்குதலைக் குறைக்கத் தேவையான ஒளிவடிப்புகளின் உதவியோடு இதற்குத் தேவைப் பட்டிருக்கிறது.

விண்வெளி ஓடம் அட்லாண்டிஸ் தன் 12 நாள் பயணத்தை முடித்துக் கொண்டு அண்மையில் தான் பூமிக்குத் திரும்பியது. அதன் முக்கிய பணியானது விண்வெளி நிலையத்திற்கு 45 அடி நீளமான சூரிய ஒளி-வாங்கிகளைப் பொருத்துவதாக இருந்தது. 1998ல் ரஷ்யாவினால் உரு-வாக்கப் பட்ட இந்த விண்வெளி நிலையம் காலத்துக்குக் காலம் பகுதி பகுதியாக விண்வெளி ஓடம் மூலம் கொண்டு செல்லப் பட்ட உறுப்புகளினால் இப்பொழுது பிரமாண்டமாக வளர்ந்துள்ளது. இங்கே தரப் பட்டிருக்கும் படம் எடுக்கப் பட்ட போது, விண்வெளி ஓடமும் விண்வெளி நிலையமும் பூமிக்கு மேலே 250 மைல்கள் உயரத்தில் பறந்து கொண்டிருந்தன. சூரியனோ பூமியிலிருந்து 9 கோடி 30 லட்சம் மைல்களுக்கு அப்பால் இருக்கிறது. இருப்பினும், இவை இரண்டும் சூரியனின் மேற்பரப்பிலுள்ள தூசு போல தெரிகின்றன! சூரியன் அத்தனை பெரியது!

படங்களைப் பார்ப்பதற்குச் செல்லுங்கள்:

http://www.astrophoto.fr/iss_atlantis_transit.html

Picture is copy-righted. Reproduced with written permission from the owner.

http://www.astrophoto.fr/iss_atlantis_transit.html

விண்வீழ்கொள்ளிகள்

2006-10-02T23:53:00.000Z

விண்வீழ்கொள்ளிகள் என்றால் என்ன? வானத்தில் தெரிகின்ற விண்-மீன்கள் திடீரென்று விழுவது போல் தோன்றி மறைவது தான் விண்வீழ்கொள்ளிகள். சில சமயங்களில் அங்கொன்றும் இங்கொன்று மாகத் தோற்றும். மற்றும் சில வேளைகளில் இவை அடுத்தடுத்துத் தோன்றி மறையும், விண்மீன் மழை போல. ஆனால் இவை விண்-மீன்கள் அல்ல. விண்மீன்களால் ஏற்படுத்தப் படுபவையும் அல்ல. சரி. இவை ஏன் இப்படித் தோன்றுகின்றன? மின்னலைப் போல எங்காவது போய் விழுந்து தாக்குகின்றனவா?

அண்ட வெளியில் இருக்கின்ற பல்லாயிரக் கணக்கான விண் கல் துகள்கள் (குப்பைகள்) பூமியின் வளி மண்டலத்தினுள் பிரவேசிக்கும் போது வளி மண்டலம் கொடுக்கும் எதிர்ப்பினால் அத் துகள்கள் எரியத் தொடங்குகின்றன. இவவாறு விண் கல் துகள்கள் வளி மண்டலத்தில் எரியும் போது வெளியிடப் படும் ஒளியையே விண்வீழ்கொள்ளிகள் என்கிறோம். இந்த விண் கற்களிலே எவையாவது பெரியனவாக இருந்-தால், அவை பூமியிலே விழுவதற்கு முன்பு முழுமையாக எரிந்து விடுவதில்லை. இவ்வாறான கற்கள் பூமியை வந்தடைகின்றன. இத்-தகைய விண் கல் துகள்கள், பூமி சூரியனைச் சுற்றி வரும் பாதை எங்கும் ஆங்காங்கே இருந்தாலும், சில இடங்களில் இவை கூடுதலாகக் காணப்படும். இதற்குக் காரணம் தூமகேதுக்கள் (வால் நட்சத்திரங்கள்). தூமகேதுக்களும் பூமியைப் போலவே சூரியனை சுற்றி வருகின்றன; ஆனால் ஒரு பெரிய நீள்வட்டப் பாதையில்! இவற்றின் பெரும்பகுதி முழுமையாக உறைந்து போன பனிக்கட்டிகளால் ஆனவை. இந்தத் தூமகேதுக்கள் சூரியனுக்கு அண்மையாக வரும் போது, சூரிய வெப்பத்தில் பனிக் கட்டிகளில் ஒரு பகுதி உருகி துகள்களாக உதிர்ந்து போகின்றன. இந்தத் துகள்களே தூமகேதுவின் வாலாகவும் அமை-கின்றன. இவ்வாறு வெளியாகும் துகள்களில் ஒரு பகுதியை தூமகேது தனது சுற்றுப் பாதையில் விட்டுச் சென்று விடுகிறது. மணல் துணிக்-கைகள் அளவு தான் இருக்கும் இந்தத் துகள்களின் அளவு. ஆனாலும் அவற்றின் வேகம் காரணமாக (60 km/s) இவை விண்வீழ் கொள்ளிகள் ஆகின்றன.

சூரியனைச் சுற்றிவரும் தூமகேதுக்களில் மிகப் பிரபலமானது ஹேலி தூமகேது. 76 ஆண்டுகளுக்கு ஒரு முறை இந்தத் தூமகேது சூரியனுக்கு அண்மையில் வருகிறது. 2061ம் ஆண்டில் இந்தத் தூமகேது மீண்டும் சூரியனுக்குக் கிட்ட வரவிருக்கிறது. ஒவ்வொரு முறையும் சூரியனை அண்மிக்கும் போது 6 மீட்டர் அளவுக்கு பனிக் கட்டிகளை இழக்கின்றது. இந்த ஹேலி தூமகேதுவின் பாதையைப் பூமியானது ஆண்டுக்கு இரண்டு தடவை கடந்து செல்கிறது: ஒன்று மே மாதத்தில், மற்றையது அக்டோபர் மாதத்தில். இந்த இரு தடவைகளும் ஹேலி தூமகேது விட்டுச் சென்ற துகள்களினால் விண்வீழ்கொள்ளிகளின் எண்ணிக்கை அதிகரிக்கின்றன.

எனவே இந்த மாதத்தில் கூடுதலான விண்வீழ்கொள்ளிகளை நீங்கள் பார்க்கலாம். அதிலும் அக்டோபர் 21ம் தேதியன்று இது மிகக் கூடுதலாக இருக்கும். இந்நாளில் பூமி ஹேலி தூமகேதுவின் பாதையை தாண்டிச் செல்கிறது. இந்த விண்வீழ்கொள்ளிகளைக் காண விரும்பினால், அதற்கு மிகவும் உகந்த சமயம் அதிகாலை.

(படங்கள்: http://starchild.gsfc.nasa.gov, http://spacescience.com, http://sci.esa.int)

பெற்றோரின் கவனத்துக்கு....

2006-09-28T23:23:00.000Z

சில மாதங்களுக்கு முன், இங்கு இங்கிலாந்தில் ஓர் எட்டு வயதே நிரம்பிய சிறுமி தனக்குத் தானே தூக்கு மாட்டி இறந்து போனாள். இந்தத் துயர சம்பவத்தை விசாரணை செய்த பொலீஸார் அவளது அறையை சோதனை செய்த போது சில விடியோக்களும் டிவிடிக்களும் சிக்கின. அவற்றில் ஒன்று "Girl Interrupted". இதைப் பார்த்ததும் பொலீஸாருக்கு அதிர்ச்சி. இந்தப் படம் எப்படி இவள் கைக்குக் கிடைத்தது. இந்தப் படத்தில் வரும் ஒரு கதா பாத்திரம், தூக்குப் போட்டுத் தற்கொலை செய்து கொள்கிறது. பாவம் இந்த சிறுமி. எதைப் பார்த்தாலும் அதை அப்படியே திரும்ப செய்து பார்க்கும் பருவம். இதையும் செய்து பார்த்து மாண்டு போனாள்.

தற்செயலாக நடந்த இறப்பு என்று தீர்மானிக்கப் பட்டிருப்பினும், இது உண்மையிலேயே தற்செயலாக நடந்தது தானா? வயது வந்தவர்கள் தற்கொலை செய்து கொண்டால், பொதுவாக அதற்கு அவர்களே பொறுப்பு. ஏனென்றால் அதை அவர்கள் சுயமாக சிந்தித்து அந்த முடிவை நாடியிருக்கிறர்கள். ஆனால் அதுவே சிறார்களாக இருக்கும் போது, அதற்கு அவர்கள் எப்படி பொறுப்பேற்க முடியும்? அவர்களால் எது சரி, எது பிழை, என்ன பின் விளைவுகள் வரப் போகின்றன, இப்படி செய்து பார்க்கலாமா கூடாதா என்று எப்படி சிந்திக்க முடியும்? பெற்றொர்கள் இந்த விடயத்தில் மிகக் கவனமாக இருந்திருக்க வேண்டும்.

இந்தக் கருத்தையே பிரேத பரிசோதனையாளரும் குறிப்பிடுகிறார். "என்ன விடியோக்கள், டிவிடிக்கள் பிள்ளைகள் பார்ப்பதற்கு பெற்றோர்கள் அனுமதிக்கிறார்கள் என்பதில் மிகுந்த அவதானம் தேவை", என்கிறார். இந்தச் சிறுமியினுடைய பெற்றோர் அக்கறை எடுத்து அந்த சிறுமி பார்ப்பதற்குக் கொடுத்த டிவிடியின் தணிப்புப் பத்திரத்தைக் கவனித்திருந்தால் இந்த நிலை இருந்திருக்காது. அந்தந்த வயதிற்கேற்ற பத்திரம் கொண்ட படங்களையே பெற்றோர்கள் அனுமதிக்க வேண்டும். இது குறித்த ஒரு விழிப்புணர்வு பெற்றோரி-டையே இருத்தல் அவசியம். மகள்/ன் விரும்புகிறாள்/ன் என்பதற்காகவே அதன் தணிப்புப் பத்திரத்தைப் பார்க்காமலேயே பிள்ளைகளிடம் கொடுக்கும் பெற்றோர்கள் உண்மையாகவே தங்கள் பிள்ளைகளுக்குத் துரோகம் இழைக்கிறார்கள். நல்லதையும் கெட்டதையும் பிள்ளை-களுக்கு எடுத்துக் கூற தவறியவர்களாவார்கள்.

பிரித்தானியாவில் வாழும் தமிழர்களிடம் இந்த கெட்ட பழக்கம் குடி கொண்டிருக்கிறது. அவர்கள் விடியோவிலோ டிவிடியிலோ வரும் படங்களை அப்படியே பிள்ளைகளோடு சேர்ந்திருந்து பார்த்து மகிழுவார்கள். அல்லது அதை பார்க்கச் சொல்லிப் பிள்ளைகளை விட்டு விட்டு தத்தமது வீட்டு வேலைகளில் மூழ்கி விடுவர். டிவியே ஒரு பிள்ளை பார்த்துக் கொள்ளும் சாதனம் ஆகிவிடுகிறது. அதில் வரும் படங்கள் பிள்ளைகள் பார்க்கக் கூடியனவா என்ற சிந்தனை இவர்களுக்கு எழுவதில்லை.

இங்கு இயங்கும் தமிழ் டிவி நிறுவனங்களும் இந்த தணிக்கைப் பத்திரத்தை சரியாகப் பின்பற்றுவதில்லை. பிரித்தானிய சட்டதிட்டப் படி சிறார்களுக்குப் பொருத்தமில்லாத நிகழ்ச்சிகளையோ படங்களையோ இரவு 9.00 மணிக்கு முன் ஒளிபரப்ப முடியாது. ஆனால், இந்தத் தமிழ் டிவி நிறுவனங்கள் இதைக் கவனிப்பதாகத் தெரியவில்லை. பெற்றோர்கள் இதையும் கவனியாமல் பிள்ளைகளை டிவி பார்க்க விடும் போது அவர்கள் பார்க்கக் கூடாத காட்சிகளையும் காண நேரிடுகிறது. இரவு 9.00 மணிக்கு மேல் டிவி பார்க்க விடும் பெற்றோர்களும் இங்கு இருக்கிறார்கள்.

இவ்வாறு டிவி, டிவிடி, இணையம், கைத்தொலைபேசி, விடியோ விளையாட்டுச் சாதனங்கள் என பல வழிகளில் பிள்ளைகள் வன்முறைக் காட்சிகளையோ பாலியல் காட்சிகளையோ பார்த்து விட வாய்ப்பு இருக்கிறது. இது குறித்த விழிப்புணர்வு பெற்றோர்களுக்கு இருக்க வேண்டும்.

தேடுவோமா கூகிளில்?

2006-09-27T22:33:00.000Z

"என்ன? எதையாவது தொலைத்து விட்டாயா? என்ன தேடுகிறாய்?"

"யார்? நானா? என்ன வேண்டும்?"

"ஆமாம். நீயே தான். நீ கூகிள் தலைமுறை என அறிவாயா?"

"என் தலை முறையாகத் தானே இருக்கிறது??"

"தலை இருக்கிறதோ இல்லையோ, வால் நன்றாக ஆடுகிறது. திருமா திமுக கூட்டணியில் மீண்டும் சேர்ந்து விட்டது உனக்குத் தெரியுமா?"

"குழப்பாதீர்கள். நான் தேடுவது இன்னும் கிடைக்கவில்லை."

"அப்படியா? அது திராவிடர்களின் குமுறலாக இருக்கலாம். தமிழ் மணத்தில் தேடினாயா?"

"தமிழ் எப்படி மணக்கும்? மல்லிகை போலா ரோஜா போலா?"

"தமிழுக்கும் அமுதென்று பேர்."

"இதை எங்கோ கேட்டது போலிருக்கிறதே. கூகிளில் தேடுவோம்."

இன்ஸமாமின் விசாரணை இன்று ஆரம்பம்

2006-09-27T11:50:00.000Z

பாகிஸ்தான் அணித் தலைவர் இன்ஸமாமுக்கு எதிராக ஐசிசி சுமத்திய இரண்டு குற்றங்களுக்கான விசாரணை லண்டன் ஓவல் மைதான வளாகத்தில் இன்று ஆரம்பமானது. ஐசிசியின் ரஞ்சன் மதுகல்ல இந்த இரண்டு நாள் விசாரணையை நடத்துகிறார். இதன் முடிவு வெள்ளிக் கிழமையன்று தெரிய வரும். மடுகல்ல காலை எட்டரை மணிக்கே வந்து விட்டார். பாகிஸ்தான் அணித் தலைவரும் பயிற்சியாளரும் ஏற்கனவே வந்துவிட்டனர். அதன் பின்னர், இங்கிலாந்துக்கு எதிரான கடைசி டெஸ்ட்டில் கடமையாற்றிய நடுவர்கள் நால்வரும் வந்து சேர்ந்தனர்.

பந்தை ஊனப்படுத்தியதான குற்றச்சாட்டு நிரூபணமானால், அவருக்கு அபராதமும் ஒரு டெஸ்ட் அல்லது இரு ODI விளையாடத் த்டை விதிக்கப் படலாம். ஆனால், பந்தயத்துக்குக் களங்கம் விளைவித்ததான குற்றச் சாட்டு நிரூபிக்கப் படும் பட்சத்தில், அவருக்கு 2-4 டெஸ்ட்டில் அல்லது 4-8 ODI விளையாடத் தடை விதிக்கப் படலாம்.

இதில் சம்பந்தப்பட்ட பலரிடமிருந்து எழுத்து மூலமான சாட்சியங்களை மதுகல்ல பெற்றுள்ளார். இவற்றை விட, நிபுணர் சாட்சியங்களாக முன்னாள் இங்கிலாந்து ஆட்டக்காரர் போய்கொட் மற்றும் சைமன் ஹியூஸ் ஆகியோரையும் பாகிஸ்தான் அழைக்க இருக்கிறது.

எவ்வாறாயினும், இந்த விசாரணையின் முடிவுகளை எதிர்த்து இன்ஸ-மாமோ அல்லது ஐசிசியோ மேன்முறையீடு செய்யலாம். மீண்டும் ஒரு விசாரணை வரலாம்.

லண்டனுக்கு வருவோரே கவனம் :-)

2006-09-26T16:29:00.000Z

லண்டன் ஹீத்ரோ விமான நிலையத்-திலிருந்து லண்ட-னுக்கு வரும் பாதாள ரயில் (Piccadilly line) வண்டிகளின் முக்கிய பாகமொன்றில் வெடிப்புகளைக் கண்டுபிடித்திருக்கிறார்கள். மொத்தம் 86 ரயில்களில் பதினைந்தின் சில்லு அச்சுக்களில் மேல் பொருத்தப்பட்ட பாகங்களில் இந்த வெடிப்புகள் காணப்பட்டன. இந்தப் பதினைந்து ரயில்களும் சேவையி-லிருந்து நீக்கப்பட்டு விட்டன.

ஆனால், மிகக் கவலை தரும் விடயம் என்னவென்றால், இந்த வெடிப்புகள் ஏன் ஏற்பட்டன என்று இன்னும் தெரியவில்லை. எதற்கும் அடுத்த முறை லண்டன் வந்து இந்த ரயில்களில் ஏறும்போது எச்சரிக்-கையாக இருங்கள். என்னை விடுங்-கள். ஒவ்வொரு நாளும் வேலைத்-தளத்துக்கும் வீட்டுக்கும் போய்வர இந்த ரயில்களை விட்டால் வேறு வழி. நீங்கள் எதற்கு இங்கு வந்து இதில் மாட்டிக் கொள்ள வேண்டும்.

:-)

லண்டன் ரயில்களை உடைக்கத் தீவிரவாதிகளா வேண்டும். இவர்களே அவற்றை நொருக்கி விடுவார்கள் போலிருக்கிறதே!

கற்றாழையிலிருந்து சர்க்கரை?

2006-09-26T11:19:00.000Z

ஒருவகை கற்றாழையிலிருந்து செயற்கைச் சர்க்கரைபோல் பயன்தரவல்ல ஒரு தேன் போன்ற பதார்த்ததை பிரித்தானியாவில் முதன்முறையாக ஒரு சூப்பர் மார்க்கெட் அறிமுகப் படுத்துகிறது. இதற்கு இதைத் தயாரிப்பவர்கள் வைத்த பெயர் Agave Nectar. இது சர்க்கரையைப் போல் உடனடியாக இரத்தத்தில் சேராமல் மெதுவாக உடலினுள் செல்கிறது என்பது இதன் சிறப்பம்சம். சர்க்கரையை விட தித்திப்பும் (நான்கு மடங்கு) அதிகம் கொண்டது இந்தப் பாகு. சர்க்கரை வியாதியுள்ளோருக்கு ஒரு வரப் பிரசாதம்.

Blue Weber Agave எனப்படும் கற்றாழை இனம் ஒன்று மெக்சிக்கோவின் எரிமலைப் பகுதிகளில் வளர்கிறது. இத்தாவரம் முழுமையாக வளர்வதற்கு ஆறு ஆண்டுகள் ஆகின்றன. அன்னாசி இலைகள் போல இத்தாவரங்களுக்கும் இருக்கும். இந்த இலைகளுக்குள் தித்-திப்பான பிசுபிசுப்பான சாறு இருக்கும்.

சரி, இதற்குள் என்ன இருக்கின்றன?

Solids 74 - 76 %

Calories/100 gr. 320

Fructose 69 - 71%

Dextrose 23 - 24%

Inulin 3 - 5%

Sucrose 1.1 - 1.4%

இங்கு இனுலின் எனப்படுவது மிகச் சிக்கலான அமைப்புடைய ஒரு காபோ ஐதரேட். இந்த காபோ ஐதரேட்டை உடைக்கும் போது பிரக்-டோஸை முக்கியமாகக் கொண்ட பாகு கிடைக்கிறது. பிரக்டோஸ் என்ற சர்க்கரைப் பகுதி பொதுவாகப் பழங்களிலும் காய்கறிகளிலும் கிடைக்கின்றன. இது ஸுக்குரோஸை விட 50% தித்திப்பானது. இதனால் தான் Agave Nectar சர்க்கரையை விட மிகத் தித்திப்பானதாக இருக்கிறது.

இது கொண்டிருக்கும் சக்தியும் (கலோரிகளும்) குறைவானது. மற்றும் இதனது Glycemic Index, அதாவது எவ்வளவு எளிதாக ஒரு பதார்த்தம் இரத்தத்திலுள் உறிஞ்சப்படும் என்று குறிக்கும் ஒரு எண், மிகக் குறைவு. இதனது Index 27 தான் (தேனுக்கோ அது 83. குளுக்கோஸுக்கு 100). ஆகவே, சர்க்கரை வியாதி உள்ளவர்களும் இந்தத் தித்திப்புப் பாகைப் பயன்-படுத்தலாம். இது இயற்கை முறையிலேயே தயாரிக்கப் படுவதால், இதிலுள்ள விட்டமின்களோ தாதுப் பொருள்களோ அழிந்து போவதில்லை. ஒன்றை மட்டும் நினைவில் வைத்துக் கொள்ளுங்கள். எந்தத் தித்திப்புப் பதார்த்தமுமே அதிக அளவில் உட்கொள்ளக் கூடாது. என்வே இதையும் மிதமாகப் பயன்படுத்த வேண்டும்.

எல்லாம் சரிதான். இதில் ஏதாவது தீமைகள் உண்டா என்றால், இது வரை தெரியவில்லை. வலைஞர்களில் யாராவது இதைப் பயன்படுத்தி இருந்தால் தங்கள் அனுபவத்தை இங்கே பகிர்ந்து கொள்ளலாம். அத்துடன், மருத்துவ வலைஞர்களும் இதில் தீமைகள் ஏதாவது உண்டா என்று விளக்குங்களேன்!

லண்டனில் Bollywood!

2006-09-25T23:24:00.000Z

அபிஷேக் பச்சானும் ப்ரீத்தி ஜின்டாவும் இணைந்து நடிக்கும் ஜூம் என்ற படத்தை லண்டன் Chelsea Football Clubம் யஷ்ராஜ் நிறுவனமும் இணைந்து தயாரிக்கின்றன. இதன் ஹீரோ ரிக்கீ இந்த Football Clubஇன் பரம ரசிகனாம். இப்படத்தின் சில பகுதிகள் Football Clubன் மைதானமான Stamford Bridge Stadiumல் படமாக்கப்படவிருக்கின்றன. அண்மையில் அபிஷேக் பச்சான், ப்ரீத்தி ஜின்டா, முன்னாள் உலக அழகி ஐஸ்வர்ய ராய், லாரா ஆகியோர் Chelsea Football Clubக்கு வருகை தந்து ஓரிரு ஆட்டங்களையும் பார்த்தார்களாம். அபிஷேக்குக்கு ரிக்கீ என்ற பெயர் பொறித்த ஒரு Chelsea Jersey கொடுக்கப் பட்டிருக்கிறதாம்.

இந்தியாவில் தங்களது பிரபல்யத்தை அதிகரிப்பதற்காகவே இந்த Football Club இந்தப் படத் தயாரிப்பில் இறங்கியிருப்பதாகக் கூறப்படுகிறது. ஏற்கனவே Manchester United, Liverpool Football Club போன்றவை தென்கிழக்காசியாவில் மிகப் பிரபலமானவை. இவற்றைப் போல் தாங்களும் பிரபலமாக வேண்டுமென்பதே இவர்களது அவா. ஆனால் மற்றைய அணிகளைப் போலில்லாமல் இவர்கள் படங்கள் மூலமாக இந்திய மக்களை அடைய நினைக்கிறார்கள். இந்தியர்களின் மனதில் மட்டும் இடம்பிடித்து விட்டால் போதும்; அவர்களுக்கு Football Club பொருள்களை விற்றே கோடிக்கணக்கான பவுண்டுகளைச் சம்பாதிக்கலாம்.

இரண்டு முறை அடுத்தடுத்து Premier League வென்றுவிட்ட Chelsea இப்போது மூன்றாம் முறை வெல்வதற்கு முயல்கிறார்கள். அடுத்த மே மாதமளவில் அவர்கள் வென்றார்களா இல்லையா எனத் தெரியவரும். அதே சமயத்தில் தான் இந்தப் படத்தையும் வெளியிடவிருக்கிறார்கள்.

A380 விமானம் மேலும் தாமதமாகிறது!

2006-09-21T12:09:00.000Z

ஏர்பஸ் நிறுவனம் 1400 கோடி அமெரிக்க டாலர்கள் செலவில் உரு-வாக்கி வரும் உலகின் மிகப் பெரிய விமானமாகிய A380 உற்பத்தி செய்வது ஏற்கனவே ஓர் ஆண்டு தாமதமாகி விட்டது. இதன் உற்பத்தி மேலும் தாமதமாகும் என்று இன்று அறிவித்திருக்கிறார்கள். இதன்படி இந்த விமானம் பயன்பாட்டுக்கு வருவதற்கு இன்னும் ஆறு மாதங்கள் வரை எடுக்கலாமாம்.

2000ம் ஆண்டு ஆரம்பிக்கப்பட்ட இந்த முயற்சி கடந்த ஆண்டு ஏப்ரல் மாதத்தில் முதலாவது A380 விமானம் தனது கன்னிப் பயணத்தைத் தொடங்கும்வரை தொடர்ந்தது. பலவகை சோதனைகளுக்கு உட்படுத்தப் பட்ட இந்த விமானம் கடந்த மார்ச் மாதத்தில் 850 பயணிகளும் 20 விமான ஊழியர்களும் 80 வினாடிகளில் விமானத்தை விட்டு வெளி-யேறி பயணிகள் பாதுகாப்புக்கு முக்கியமான சோதனையில் வெற்றி பெற்றது.

இந்த விமானத்தைப் பற்றிய சில தகவல்கள்:
நீளம்: 73m; இறக்கை விரிப்பு: 79.8m; உயரம்: 24.1m; கொள்ளளவு: பொதுவில் 555 பேர், ஆகக் கூடியது 853 பேர்; எஞ்சின்கள்: 4; பறக்கக் கூடிய தூரம்: 15,000km; வேகம்: ஒலியின் வேகத்தைப் போல் 85 வீதம். இவ்வாண்டு இறுதியில் வெளிவர இருந்த இந்த A380 ரக விமானத்தின் விலை 25 கோடி அமெரிக்க டாலர்கள்! இது வரை 159 A380 விமானங்கள் விற்கப்பட்டு விட்டன.

Emirates: 43; Lufthansa: 15; Qantas: 12; Air France: 10; Singapore Airlines: 10; FedEx: 10; International Lease Finance: 10; UPS: 10; Thai Airways: 6; Virgin Atlantic: 6; Korean Air Lines: 5; Etihad Airways: 4; Qatar Airways: 2; China Southern Airlines: 5; Kingfisher Airlines: 5; Malaysia Airlines: 6

இந்த செயல்திட்டத்தில் செலவுசெய்த பணத்தை மீளப் பெறுவதற்கு ஏர்பஸ் நிறுவனம் 250 A380 விமானங்களை விற்றாக வேண்டும். இதில் ஏர்பஸ் நிறுவனத்துக்கு இன்னும் நஷ்டம் வரவும் வாய்ப்பு இருக்கிறது. இந்த A380 விமானங்களை வாங்குவதற்கு முன்வந்த இந்த நிறுவனங்-கள் விமானங்கள் கிடைப்பது தாமதம் ஆவதால் அதற்கு நஷ்ட ஈடு கேட்கக் கூடும்.

பிள்ளைகளுக்கு கைத்தொலைபேசியைக் கொடுக்காதீர்!

2006-09-19T22:48:00.000Z

கைத்தொலைபேசி பிள்ளைகளுக்கு மிகப் பயனுடையது. அவசர தேவைகளுக்கு அவர்கள் பெற்றோரை உடனடியாகத் தொடர்பு கொள்ளலாம். அது போல, பெற்றோரும் பிள்ளைகளுடன் எந்த நேரத்திலும் தொடர்பு கொள்ள இது வசதியானது. மேலும், பிள்ளை-களினது கலந்துரையாடும் ஆற்றலை விருத்தி செய்யவும் கைத்தொலைபேசி உதவுகிறது. அண்மையில் பிரித்தானியாவில் நடத்தப்பட்ட ஓர் ஆய்வின் படி, 12 வயதுக்குக் உட்பட்டோரில் 91 சதவீதமானவர்கள் கைத்தொலைபேசி வைத்திருக்கிறார்கள்.

ஆனால், பெற்றோரே கவனமாக சிந்தியுங்கள். இத்தகைய நன்மை-களைத் தரும் கைத்தொலைபேசியினால் பல தீமைகளும் உண்டு என்பதை மறவாதீர்கள். இக் கைத்தொலைபேசிகளிலிருந்து வீசப்படும் மின்காந்த கதிர்வீச்சுக்களால் உடலின் கலங்கள் (cells), மூளை, உடலின் நோயெதிர்ப்புத் தொகுதி போன்றவை பாதிக்கப் படலாம் என சில ஆய்வுகள் கூறுகின்றன. மேலும், புற்று நோய் மற்றும் மூளை சம்பந்தமான நோய்களும் தோன்றக்கூடிய சாத்தியக் கூறுகளை இது அதிகரிக்கிறது. வளர்ந்தோருக்கே இம்மாதிரியான அபாயங்கள் இருக்கி-ன்றன எனில், சிறு பிள்ளைகளைப் பற்றிக் கூறத் தேவையில்லை. அவர்களுக்குத் தான் பாரிய பாதிப்பு இருக்கும். அத்துடன், கைத்-தொலைபேசிகள் பயன்படுத்துதலால் உருவாகக்கூடிய உண்மையான பாதிப்புகள் என்ன என்பதும் இன்னும் பல ஆண்டுகளுக்கு முன் தெரியப் போவதில்லை.

ஆகவே, உங்கள் பிள்ளைகளுக்குக் கைத்தொலைபேசியை வாங்கிக் கொடுக்கமுன், அதன் நன்மைகளையும் தீமைகளையும் பற்றித் தீவிர-மாகச் சிந்தியுங்கள். தீமைகளை விட நன்மைகள் முக்கியமானவையா? பெறக்கூடிய நன்மைகளுக்காக இந்தளவு அபாயங்களை, கேடுகளை எதிர்நோக்குவது சரியா? அந்தச் சின்னஞ்சிறு மூளைக்கு அத்தகைய கதிர் வீச்சு தேவைதானா? அந்தப் பிஞ்சுகளின் எதிர்காலத்தைப் பாதிக்க நாம் அனுமதிக்கலாமா?

அவசரத் தேவைகளுக்கு மட்டும் பயன்படுத்த என வேண்டுமானால் வாங்கிக் கொடுக்கலாம். அத்துடன் அதில் பேசுவதை விட தகவலை அனுப்புமாறு அவர்களை ஊக்குவிக்கலாம். அதை விடுத்து எந்நேரமும் கைத்தொலைபேசியைக் காதில் வைத்தபடியே திரிவது அபாயகரமானது. பெற்றோரே கவனம்!

பள்ளிப் பயணங்களும் சுற்றாடல் மாசுபடுதலும்

2006-09-19T16:01:00.000Z

ஒவ்வொரு ஆண்டும் லண்டனில் மட்டும் 10 லட்சம் டன்னுக்கு மேலாக கார்பன் டை ஆக்ஸைட் வளி மண்டலத்துக்குள் போய் சேர்கிறது. எப்படி? பள்ளிக் குழந்தைகளைப் பள்ளிக்குக் கூட்டிப் போவதற்கும் வருவதற்குமாக 4,50,000 கார் பயணங்கள் நடக்கின்றன. இந்தப் பயணம் செய்வதில் நானும் ஒரு குற்றவாளி. காலையில் வேலைக்குப் போகும் போக்குவரத்து அதி கூடிய தருணத்தில் இது ஏறத்தாழ 20 சத வீதப் போக்குவரத்தாகும். அதிலும் இப்போது இங்கு எழுந்துள்ள 4x4 கார் மோகத்தினால் மாசுபடுதல் இன்னும் அதிகமாகிறது. ஏனைய சராசரிக் கார்களை விட மூன்று மடங்கு வளிமண்டல மாசுபடுத்தலை செய்கிறது இந்த 4x4 கார். நான் பயன்படுத்துவது மிகச் சிறிய கார் (அப்பா தப்பித்தேன்).

இந்த ஆய்வை நடத்தியது BP நிறுவனம். பள்ளிப் பயணங்களினால் வெளிவரும் கார்பனின் அளவுக்குப் பணம் தருமாறு இவர்கள் (BP) இப்போது பெற்றோர்களை ஊக்குவிக்கிறார்கள். இந்தப் பணத்தை இந்தியாவில் முதலீடு செய்து அங்கு "தூய" மின்சாரத்தை உற்பத்தி செய்ய இருக்கிறார்கள். இதற்கான ஆரம்ப நிதியை BP நிறுவனமே முதலீடு செய்திருக்கிறது. அதாவது, இந்தியாவில் மின்சாரம் உற்பத்தி செய்யப்படும் போது வெளிவிடப்படும் கார்பனின் அளவைக் கணிசமாகக் குறைக்கவுள்ளார்கள். இதுவும் நான் முன்பே விவரித்த கார்பன் வணிகம் போன்றது தான். எப்படியோ வளிமண்டல மாசு படுத்தலைக் குறைத்தால் சரிதான்.

பிள்ளைகளுக்கான டிவி விளம்பரங்கள்

2006-09-19T10:55:00.000Z

ஆங்கிலிக்கன் சர்ச்சின் தலைமை பேராயர், பிள்ளைகளுக்காகவென வெளியிடப்படும் டிவி விளம்பரங்களைத் தடை செய்யவேண்டும் என்று கோரிக்கை விடுத்துள்ளார். சமீப காலமாக பிள்ளைகளைப் பொருள்களை வாங்கத்தூண்டும் பல விளம்பரங்கள் இங்கு டிவியில் குவிந்திருக்கின்றன. இவர்களை நம்பியே பல கோடி டாலர்களில் தொழிற்சாலைகளே இயங்குகின்றன. இந்த விளம்பரங்களைப் பார்த்துப் பிள்ளைகள் கொடுக்கும் நச்சரிப்பைத் தாங்காமல் அவற்றைப் பெற்றோர் வாங்கிக் கொடுப்பதும் நடந்துவருகிறது. பேராயரோ இந்த முறையையே சாடுகிறார். பிள்ளைகள் மனதளவில் முதிர்ச்சியடைய முன்பே அவர்களை இம்மாதிரியான வியாபாரச் சூழலுக்கு இழுப்பது சரியல்ல. இதை இவ்வாறு தடை செய்வது ஒருவேளை பிரச்சனைகளைத் தீர்க்காதாயினும், இப்படி ஒரு முயற்சி செய்து பார்க்கலாம் என்கிறார்.

எஸ்கே அவர்கள் பெற்றோருக்காக எழுதிவரும் தொடருடன் இது கொஞ்சம் சம்பந்தப் பட்டதுதான். பெற்றோர்கள் இந்த டிவி விளம்பரங்-களினால் வரும் தாக்கத்தை எப்படி சமாளிக்கிறார்கள்? இதைவிட கடைகளிலும் சிறுவருக்கான பொருள்களை கீழ்த் தட்டுகளில் வைக்கிறார்கள். பிள்ளைகள் இவற்றை எடுத்துப் பார்த்து வாங்கித் தருமாறு பெற்றோரை வற்புறுத்துவர். இந்தத் தாக்கங்களிலிருந்து நானும் விதிவிலக்கல்ல. ஆயினும், எஸ்கே அவர்களுடைய பதிவில் கூறியிருப்பது போல், பிள்ளைகளுடன் நட்புடன் இருந்தால் இவற்றை ஓரளவுக்குச் சமாளிக்கலாம். உங்கள் அனுபவம் எப்படி?

இந்தியாவிலும் இப்படிப் பிள்ளைகளைத் தூண்டும் விளம்பரங்கள் டிவியில் ஒளிர்கின்றனவா?

அவுஸ்திரேலியாவுக்கு பயிற்சியாளர் தேவையில்லையா?

2006-09-15T16:09:00.000Z

ஆஸ்திரேலியாவின் சுழல் பந்து வீச்சாளர் Shane Warne, தங்கள் அணிக்கு ஒரு பயிற்சியாளர் தேவையில்லை என்றும் ஒரு மனேஜர் இருந்தாலே போதும் என்றும் இன்று கூறியுள்ளார். அவர் மேலும் கூறுகையில்:

ஒரு சர்வதேச ஆட்டக்காரர் என்ற முறையில், நாம் எவ்வளவு திறமை-யானவர் என்று எமக்குத் தெரியும். அதிகம் நுட்பமாகப் போவதற்கு ஒரு பயிற்சியாளர் தேவையில்லை.

இவ்வாறு இவர் சொல்கிறார். இது சரியா? அல்லது வழமை போல Shane Warneஇடமிருந்து வரும் உளறலா? உண்மையிலேயே இந்தியா போன்ற சர்வதேச தரம் வாய்ந்த அணிகளுக்கு பயிற்சியாளர் தேவைதானா?

இங்கிலாந்தைப் பொறுத்தவரை Duncan Fletcher பயிற்சியாளராக வந்த பின்னர் தான் இந்த அளவுக்கு அந்த அணி முன்னேற்றம் அடைந்திருக்கிறது. இது தற்செயலாகக்கூட இருக்கலாம். தரமான ஆட்டக்காரர்கள், முக்கியமாக நல்ல பந்து வீச்சாளர்கள், கிடைத்த-மையால் இங்கிலாந்து நன்றாக விளையாடுவதாக இருக்கலாம். ஆயினும், கடந்த ஆண்டு நடந்த Ashes தொடரில் Duncan Fletcherஇன் பங்கு மறுக்க முடியாதது. ஒவ்வொரு ஆஸ்திரேலிய ஆட்டக்காரருக்கு எதிராகவும் ஒரு திட்டம் வகுத்து அதை வெற்றிகரமாக Michael Vaughan மூலம் நிறைவேற்றி வைத்ததை மறக்க முடியாது. அப்படிப் பார்த்தால் பயிற்யாளரின் பங்கு முக்கியமானது. ஒரு வேளை ஆஸ்திரேலியா போன்ற மிகச் சிறந்த அணிகளுக்கு தேவையில்லையோ என்னவோ.

உங்கள் கருத்து என்ன?

லண்டன் பாதாள ரயிலில் இரு மணிநேர தவிப்பு!

2006-09-14T14:19:00.000Z

நேற்று முன்தினம் லண்டன் பாதாள ரயிலில் 900க்கு மேற்பட்ட மக்கள் மாட்டிக் கொண்டு அவதிப்பட்டனராம். மாலை ஒரு ஐந்தரை மணி-யளவில், யாரோ ஒரு பெண், வாழ்க்கையில் என்ன பிரச்சனையோ, ஒரு பாதாள ரயிலுக்கு முன்னே பாய்ந்து விட்டள். ரயிலில் அடிபட்டு கீழே விழுந்தவள் உயிருடன் இருந்ததால் அவளை மீட்டெடுக்க பாதையில் கொடுக்கப்படும் மின்சாரத்தைத் துண்டித்து விட்டார்கள். குகைகளுக்குள் அகப்பட்ட ரயில்களில் ஏறத்தாழ 900 பேர் இருந்திருப்பார்கள். ஒரே இருட்டு - அவசர விளக்குகளைத் தவிர. வெப்பநிலை வேறு அங்கே 30-35 டிகிரி இருந்திருக்கும். காற்றோட்டம் மிகக் குறைவு. இல்லை என்றே சொல்லலாம். ஒரே புழுக்கம்.

ஓரிரு மாதங்களுக்கு முன்னர் பாதாள ரயில் குகைகளில் 45-50 டிகிரி வெப்பநிலை இருந்திருக்கும். நான் போய்க் கொண்டிருந்த ரயில் திடீ-ரென நின்று விட்டது. கதவுகள் முழுமையாக மூடிவிட்டன என்றவுடன் ஒரு சிக்னல் எஞ்சினுக்குக் கிடைக்கும். அதன் பின்னரே ரயிலை எடுக்க முடியும். அன்று என்ன நடந்ததோ, குகைக்குள் ஓடிக்கொண்டிருந்த ரயிலுக்கு இந்த சிக்னல் கிடைக்கவில்லையாம். நல்லவேளை நேற்று முன்தினம் போல் வெளிச்சம் இல்லாமல் போய் விடவில்லை. ஆனால் தாங்க முடியாத வெப்பம். புழுக்கம். ஒரே மக்கள் கூட்டம் வேறு. முப்பது நிமிட நேரத்தில் எப்படியோ ரயில் புறப்பட்டது அன்று.

நேற்று முன்தினம் நடந்த சம்பவத்தில், மின்சாரம் திரும்பி வர 6.50 மணியாகி விட்டது. இதற்குள் பயணிகள் மிகவும் தவித்துப் போய் விட்டனராம். மின்சாரம் வந்த பிறகும் ஒரு ரயில் ஸ்டார்ட் செய்ய மாட்டேன் என்று மக்கர் பண்ண, பின்னர் வேறு ஒரு ரயில் வண்டியை அந்த இடத்துக்கு அனுப்பி அதிலிருந்த பயணிகளை கிட்டவுள்ள ஸ்டேசனுக்குக் கொண்டு வந்த போது மணி இரவு 8.00!

இப்படி இருக்கிறது லண்டன் பாதாள ரயில் போங்கள்.

ஆஷஸ் தொடர் எதிர்பார்ப்பை திருப்திப் படுத்துமா?

2006-09-13T13:10:00.000Z

நவம்பரில் ஆஸ்திரேலியாவில் நடைபெற இருக்கும் Ashes தொடர் கடந்த ஆண்டு இங்கிலாந்தில் நடந்தது போல் விறுவிறுப்பாக இருக்குமா? இந்தத் தொடரில் பங்குபற்றும் இங்கிலாந்து அணியின் தலைவராக Andrew Flintoff தெரிவு செய்யப் பட்டிருக்கிறார். கணுக்காலில் இரு மாதங்களுக்கு முன்னர் ஆபரேஷன் செய்த பிறகு இன்னும் அவர் பந்து வீச ஆரம்பிக்கவில்லை. அடுத்த மாதம் இந்தியாவில் நடை-பெறும் Champions Trophy தொடரிலும் இவரே இங்கிலாந்தின் தலைவராக இருப்பார்.

Flintoff உட்பட சில முன்னணி வீரர்கள் இல்லாமலே Andrew Strauss தலைமையில் இங்கிலாந்து அணி பாகிஸ்தானுக்கு எதிரான டெஸ்ட் தொடரில் இப்போதுதான் வென்றிருக்கிறது. Straussஐ ஒதுக்கி Flintoffஐ தலைவராக்கியது ஒருபுறம் இருக்க, ஆபரேஷனுக்குப் பிறகு முழுமை-யாக இன்னும் விளையாட ஆரம்பிக்காத Flintoff ஆஸ்திரேலியாவில் முழு தொடரிலும் விளையாடுவாரா? அதில் சந்தேகங்கள் இருப்பின், அவரை அணியிற் சேர்த்தது முறையா? இவர் மட்டுமில்லை. இன்னும் குறைந்தது மூன்று பேராவது காயப்பட்டிருந்து தேறி வருபவர்கள்: Ashley Giles, James Anderson & Liam Plunkett. அத்துடன், Marcus Threscothick வேறு உடல்நிலை சரியில்லை என்று கூறிவிட்டார். இன்று Matthew Hoggard காயமுற்று விட்டார் என்றும், ஸ்கான் செய்து பார்த்ததில் தசைகளில் பாதிப்பேதும் இருப்பதாகத் தெரியவில்லை என்றும் தெரிகிறது. ஆயினும், நாளை மீண்டும் MRI scan செய்யப் போகிறார்களாம்.

இந்நிலையில் இங்கிலாந்தின் Ashes கனவு முடிவடைந்து விட்டது என்றே தோன்றுகிறது. நீங்கள் என்ன நினைக்கிறீர்கள்?

கார்பன் வணிகம்

2006-09-12T09:33:00.000Z

கார்பன் என்பது, நிலத்தடி கிடைக்கின்ற நிலக்கரி, எண்ணெய், நில வாயு போன்ற எரிபொருள்களிலுள்ள முக்கிய மூலகங்களில் ஒன்று. இந்த எரி பொருள்கள் பல தொழில் மயமாக்கப்பட்ட நாடுகளில் நடப்பது போல எரிக்கப்படும் போது ஆக்ஸிசனுடன் சேர்ந்து, கார்பன் டை ஆக்சை-டையும் நீராவியையும் உருவாக்கும். மின்சார உற்பத்திக்கோ அல்லது தொழிற்சாலைகளின் சக்தித் தேவைக்கோ (உதாரணமாக கண்ணாடித் தொழிற்சாலை, சீமெந்துத் தொழிற்சாலை) அல்லது வீட்டில் சமையல் மற்றும் வீட்டை சூடாக வத்திருப்பதற்கோ அல்லது கார் போன்ற வாகனங்களிலோ இந்த எரிபொருள்கள் நாள்தோறும் பெருமளவில் பயன்படுத்தப் படுகின்றன. இதில் வெளியாகும் கார்பன் டை ஆக்சைட் தான் வளி மண்டலத்தினுள் சென்று பூமியிலிருந்து தெறித்து வெளியே போகும் சூரியனுடைய வெப்பத்தின் ஒரு பகுதியை அவ்வாறு போக விடாது தடுக்கிறது. இதனால் பூமியின் வெப்பநிலை ஆண்டு தோறும் அதிகரித்துக் கொண்டே போவதாக விஞ்ஞானிகள் கூறுகிறார்கள். இந்த வெப்பநிலை அதிகரிப்பு காரணமாக, கடல் நீரின் வெப்பநிலையும் கூடிக்கொண்டே போகிறதாம். இதன் மூலம் காலநிலையும் முற்று முழுதாக மாறி வருகிறதாம்.

வேறு வகையான வாயுக்களும் வெப்பநிலை அதிகரிப்புக்குக் காரணமாக இருந்தாலும், கார்பன் டை ஆக்சைட்டுத்தான் மிக முக்கிய-மானது. எழுபது வீதம் இந்த வாயுதான் காரணம். தாவரங்கள் போன்றவை அழுகும்போது வெளிவரும் மீதேன் வாயுவும் (நாமோ மிருகங்களோ வெளி விடும் வாயுவும் இதுதான் என்கிறீர்களா? அதுவும் சரி தான்) வெப்பநிலை அதிகரிப்பைத் தூண்டுகிறதுதான்.

இவற்றையெல்லாம் கருத்திற் கொண்டு, ஏறத்தாழ 180 நாடுகள் சேர்ந்து, 1997ம் ஆண்டு ஜப்பானின் க்யோட்டோ நகரில் ஓர் ஒப்பந்ததிற்கு வந்தனர். அதன்படி, தொழில் மயமாக்கப் பட்ட நாடுகள் 2008ம் ஆண்டிலிருந்து 2012ம் ஆண்டு வரை தங்களது கார்பன் டை ஆக்சைட் உருவாக்கத்தை 1990ம் ஆண்டு இருந்த நிலையை விட 5.2% குறைப்பதாக இந்நாடுகள் ஒப்புக் கொண்டிருக்கின்றன. இந்த ஒப்பந்தத்-தின் போதுதான் 'கார்பன் வணிகம்' என்ற உபாயம் உதித்தது.

கார்பன் வணிகம் என்றால் என்ன? பங்கு சந்தையில் பண்டங்கள் மற்றும் செக்கியூரிட்டிகள் வாங்கி விற்கப் படுதல் போன்றதே இந்த வணிகம். கார்பனுக்கு (அதாவது கார்பன் டை ஆக்சைட்டுக்கு) ஒரு பெறுமதி வழங்கப் படும். மக்களோ, நிறுவனங்களோ அல்லது நாடுகளோ கார்பனை வாங்கவோ விற்கவோ முடியும். ஒரு நாடு கார்பனை வாங்கினால், அந்த அளவுக்கு அந்த நாடு கூடுதாலாக எரிபொருளை எரிக்கலாம். அதே போல இன்னொரு நாட்டுக்குத் தேவையானதை விட அதிக கார்பன் கையிருப்பில் இருக்குமாயின், அந்த நாடு அதை விற்கலாம். ஆகவே, இது நாடுகளுக்கும் நிறுவனங்களுக்கும் இரண்டு வழிகளைக் கொடுக்கிறது: ஒன்று கார்பனைக் குறைப்பதற்கான வழிமுறைகளில் பணத்தைச் செலவிட்டு கார்பனை கட்டுப்படுத்தல்; இரண்டு வேறு யாருக்காவது பணத்தைக் கொடுத்து (கார்பன் வணிகம் மூலம்) அவர்களது கார்பன் உற்பத்தியை குறைப்பித்தல்.

2005ம் ஆண்டில் நடந்த கார்பன் வணிகத்தின் பெறுமதி 1000 கோடி அமெரிக்க டாலர்களாக இருக்கலாம் என்று கருதப் படுகிறது. இந்தக் கார்பன் வணிகம் விரிவடையும் போது, ஏழை நாடுகளுக்கும் வளர்ந்து வரும் நாடுகளுக்கும் 2500 கோடி அமெரிக்க டாலர் வரை ஆண்டு தோறும் கிடைக்கவும் வாய்ப்பு இருக்கிறதாம்.

இதெல்லாம் சரிதான், கார்பன் வணிகம் வெப்பநிலை அதிகரிப்பைக் கட்டுப்படுத்துமா என்று கேட்கிறீர்களா? பதில் எவருக்கும் இன்னும் தெரியவில்லை. அடுத்த ஆண்டிலிருந்து தான் புதிய தரவுகளை வைத்து இதைத் தெரிந்து கொள்ள வேண்டும்.

இன்ஸமாமாமுக்கு எதிரான ஐசிசியின் விசாரணை

2006-09-07T22:53:00.000Z

பாகிஸ்தான் அணித்தலைவர் இன்ஸமாம் உல் ஹக்குக்கு எதிரான ஐசிசியின் விசாரணை எதிர் வரும் 27 - 28ம் திகதிகளில் இடம் பெறும் என ஐசிசி இன்று அறிவித்துள்ளது. கடந்த ஓவல் டெஸ்ட்டின் போது பாகிஸ்தான் அணியினர் பந்தை ஊனப்படுத்தினார்கள் என்று முடிவு செய்து நடுவர் டறில் ஹேயர் அந்தப் பந்தினை மாற்றியதோடு, இங்கிலாந்து அணிக்கு 5 ஓட்டங்களை கொடுத்தார். தேநீர் இடை வேளைக்கு பின்னர், இன்ஸமாமும் அணியினரும் ஆட வர மறுத்து ஒர் எதிர்ப்பைத் தெரிவித்ததை அடுத்து, இங்கிலாந்து அணி அந்த டெஸ்டில் வென்றதாக நடுவர்கள் அறிவித்தனர். 129 வருட டெஸ்ட் வரலாற்றில் இவ்வாறு ஒரு அணி விளையாட மறுத்ததால், மற்ற அணிக்கு வெற்றியைக் கொடுத்தது இதுவே முதல் தடவை. இதைத் தொடர்ந்து இன்ஸமாம் பந்தை ஊனப்படுத்தியதற்காகவும், ஆட்டத்தில் தொடர மறுத்து விளையாட்டின் கௌரவத்திற்குப் பங்கம் விளை-வித்ததற்காகவும் என இரு விடயங்களில் குற்றம் சாட்டப்பட்டார்.

நடுவர்கள் அவ்வாறான முடிவுக்கு வந்ததற்கு முதலாவது இன்னிங்ஸில் உணரப்பட்ட சம்பவம் காரணமாக இருக்கக் கூடும். முக்கியமாக அந்த வியாழக்கிழமை ஒரு 45 ஓவர்கள் வீசி முடிக்கப்பட்ட நிலையில் பந்து ஸ்விங் செய்ய ஆரம்பித்தது. இன்னிங்ஸின் முடிவில் அந்தப் பந்து ஊனப்படுத்தப் பட்டுள்ளதாக நடுவர்கள் உணர்ந்ததாகக் கூறப்படுகிறது. ஆக இதை மனதில் வைத்துக் கொண்டு தான் நடுவர்கள் இரண்டாவது இன்னிங்ஸில் 56 ஓவர்கள் வீசி முடிக்கப் பட்ட நிலையில் பந்து ஊனப்படுத்தப் பட்டுவிட்டதாக முடிவுக்கு வந்துள்ளார்கள் என்று அறியப்படுகிறது. எந்த ஒரு தனி நபராவதுபந்தை ஊனப்படுத்தும் போது நடுவர்களோ ஏனையோரோ காணவில்லை என்பதால் அணித் தலைவர் என்ற வகையில் இன்ஸமாம் குற்றம் சாட்டப்பட்டுள்ளார். மேலும், தனது அணியினை ஆட்டத்திற்குக் கொண்டு செல்லத் தவறியதால் விளையாட்டின் கௌரவத்திற்குப் பங்கம் விளைவித்ததாக ஒரு பாரிய குற்றச் சாட்டினையும் இன்ஸமாம் மீது சுமத்தியுள்ளார்கள். இதில் குற்றவாளி யாகக் காணப்படுமிடத்து, இவர் 2-4 டெஸ்ட்களுக்கும், 4-8 ஒருநாள் பந்தயங்களுக்கும் தடை செய்யப் படக்கூடும். அவ்வாறு நடைபெறுமானால், ஏற்கனவே அடுத்த மாதம் இந்தியாவில் நடைபெற இருக்கும் சாம்பியன் விருதுக்கான போட்டிகளுக்கு பாகிஸ்தான் அணியின் தலைவராக இன்ஸமாம் நியமிக்கப் பட்டுள்ளமையால் அவ்வணி இப்போட்டிகளில் கலந்து கொள்ளுமா? இல்லையெனில், ஐசிசி அதற்கு மேற் கொண்டு என்ன நடவடிக்கை எடுக்கும்? இவையெல்லாம் நடப்பதற்கான சாத்தியங்கள் குறைவு போல் தான் தோன்றுகிறது.

மைதானத்தைச் சுற்றிலுமாக 25 கமராக்கள் இருந்தும் எந்த விதமான விடியோ ஆதாரங்களும் கிடையாது என்று இந்த டெஸ்ட் பந்தயத்தை நேரடி ஒளிபரப்பு செய்த ஸ்கை நிறுவனம் கூறிவிட்டது. ஆனால், இப்போதெல்லாம் பந்து வீச்சாளர்கள் தமது ஓட்ட ஆரம்பத்துக்கு நடந்து போகின்ற போது அதைக் காட்டுவது மிகவும் குறைந்து விட்டது. கிரபிக்ஸ் அல்லது பழைய சம்பவமொன்றின் விடியோ அல்லது நிபுணர் ஒருவரின் கருத்து என்று ஏதாவது ஒன்றை காட்டி நேரத்தை நிரப்பி விடுவார்கள். ஆக பந்து வீச்சாளர் என்ன செய்தார் என்பது விடுபட்டுப் போக வாய்ப்புண்டு. மேலும், நேரடி ஒளிபரப்பில் வரும் காட்சிகளைத் தவிர மற்ற கமராக்களில் இருந்து வரும் காட்சிகள் சேமித்து வைக்கப்பட்டிருக்க மாட்டா.எனவே, ஒட்டு மொத்தமாக விடியோவை முழுமையாக நம்ப முடியாது. எவ்வாறாயினும், விடியோ ஆதாரம் இல்லை என்பதாலேயே இந்தக் குற்றச்சாட்டை நிராகரிக்க முடியாது என்றும் நிபுணத்துவமான சோதனையின் மூலம் பந்து ஊனப்படுத்தப் பட்டதா என்று நிர்ணயிக்க முடியும் என்றும் ஐசிசியின் மல்கம் ஸ்பீட் கூறியுள்ளது கவனிக்கத் தக்கது. அப்படியாயின், அந்த ஆட்டத்தின் ரெபெரீ மைக் புரொக்டர் இந்த விசாரணையில் முக்கிய பங்கு வகிப்பார்.

இதனிடையே இன்னொரு காமடிப் பேச்சும் வெளியாகியிருக்கிறது. சம்பந்தப்பட்ட பந்தை விஞ்ஞானப் பரிசோதனைக்கு உட்படுத்த ஒரு யோசனை இருப்பதாக ஐசிசி தெரிவித்துள்ளது. என்ன இவர்கள் கண்டு பிடிக்கப் போகிறார்கள்? அந்தப் பந்திலே அப்படி என்னதான் இருக்கும்? அழுக்கு, புல், சீமெந்து, விளம்பரப் பலகையிலிருந்து கொஞ்சம் பெயிண்ட், மனித தோல், வியர்வை, துப்பல், இனிப்புகளிலிருந்து வந்த சர்க்கரை, சன் கிறீம், மொயிஸ்சறைசர், தலைமயிருக்கான ஜெல், கால்சட்டையிலிருந்து வந்த நூல்கள். ஒருவேளை இதற்கு மேலாக அதற்குள் மாட்டிக் கொண்டிருக்கும் ஒரு நகத் துண்டு அகப்படக் கூடும்!! ரஞ்சன் மடுகல்ல விசாரணையை முடித்த பின் தான் ஏதாவ-தொரு வகையில் முடிவு தெரியவரும்.

2006ற்கான ஐசிசி விருதுகள்

2006-09-06T21:51:00.000Z

2005-2006ற்கான விருதுகளுக்கு கருத்திற் கொள்ளவிருக்கும் விளையாட்டு வீரர்களின் பட்டியலை ஐசிசி வெளியிட்டுள்ளது. இம்முறை புதிதாக சிறந்த அணித்தலைவர் விருது ஒன்றையும் சிறந்த பெண் வீரர் விருது ஒன்றையும் உருவாக்கி யிருக்கிறார்கள். கடந்த ஆண்டு ஆகஸ்ட் முதலாந் திகதி முதல் இவ்வாண்டு ஆகஸ்ட் எட்டாந்திகதி வரையிலான காலப் பகுதியில் நடைபெற்ற போட்டிகளின் அடிப்படையில் இவ் விருதுகள் வழங்கப்பட விருக்கின்றன. மும்பாயில் அக்டோபர் 23ம் திகதியன்று நடைபெற விருக்கும் வைபவ மொன்றில் இவ் விருதுகள் வழங்கப்படவிருப்பதாக ஐசிசி அறிவித்துள்ளது. இரண்டு ஆண்டுகளுக்கு ஒருமுறை நடை பெறும் சாம்பியன் விருது போட்டிகள் அக்டோபரில் இந்தியாவில் நடக்கும்போது இவ்வைபவம் இடம்பெறும்.

இந்த விளையாட்டு வீரர்கள் பட்டியலை கிரிக்கெட் கமிட்டித் தலைவர் சுனில் காவஸ்கர், முன்னாள் வீரர்களான தென்னாபிரிக்காவைச் சேர்ந்த அலன் டொனால்ட், பாகிஸ்தானியர் வகார் யூனிஸ், இலங்கையின் அர்ஜுனா ரணதுங்க மற்றும் அவுஸ்திரேலிய இயன் ஹீலி ஆகியோர் அடங்கிய குழு தேர்ந்தெடுத்துள்ளது. அக்டோபர் 14ம் திகதியன்று இந்தப் பெரிய பட்டியலில் இருந்து ஒரு குறும்பட்டியலைத் தயாரித்துப் பின்னர், 23ம் திகதியன்று விருதுகள் வழங்கப்படும். பட்டியலில் இடம் பெறும் விளையாட்டு வீரர்களின் விபரங்கள் இதோ:

Test Player:

Michael Hussey (Aus), Ricky Ponting (Aus), Mohammed Yousuf (Pak), Andrew Flintoff (Eng) Shane Warne (Aus), Muttiah Muralidaran (SL), Kumar Sangakkara (SL), Rahul Dravid (Ind), Mahela Jayawardene (SL), Kevin Pietersen (Eng), Younis Khan (Pak), Matthew Hayden (Aus), Makhaya Ntini (SA).

ODI Player:

Yuvraj Singh (Ind), Michael Hussey (Aus), Ricky Ponting (Aus), Shane Bond (NZ), Irfan Pathan (Ind), Andrew Flintoff (Eng), Mahela Jayawardene (SL), Muttiah Muralidaran (SL), Rahul Dravid (Ind), Kevin Pietersen (Eng), Mohammed Yousuf (Pak), Herschelle Gibbs (SA), Brett Lee (Aus), Shahid Afridi (Pak), Inzamam-ul-Haq (Pak), Adam Gilchrist (Aus), Kumar Sangakkara (SL).

Emerging Player:

Monty Panesar (Eng), Alastair Cook (Eng), Denesh Ramdin (WI), Malinga Bandara (SL), Mohammed Asif (Pak), Upul Tharanga (SL), Ian Bell (Eng), Shahriar Nafees (BD).

Cricketer of the Year:

Ricky Ponting (Aus), Shane Warne (Aus), Muttiah Muralidaran (SL), Michael Hussey (Aus) Andrew Flintoff (Eng), Mohammed Yousuf (Pak), Rahul Dravid (Ind), Mahela Jayawardene (SL) Younis Khan (Pak), Monty Panesar (Eng), Brett Lee (Aus), Makhaya Ntini (SA), Adam Gilchrist (Aus).

Captain of the Year:

Michael Vaughan (Eng), Rahul Dravid (Ind), Ricky Ponting (Aus), Mahela Jayawardene (SL).

Umpire of the Year:

Simon Taufel, Aleem Dar, Rudi Koertzen.

Women's Cricketer of the Year:

Karen Rolton (Aus), Cathryn Fitzpatrick (Aus), Anjum Chopra (Ind), Neetu David (Ind), Claire Taylor (Eng), Katherine Brunt (Eng), Emily Drumm (NZ).